Omuwa tu uvaneke emanguluko
1 Indileni kOmuwa omvula yontemuna. Omuwa ota tumu iikogo yomvula niihomo nota zizitha omapya gaayehe. 2 Aantu otaa pula omayele kiikalunga nokaayanekeli, ihe omayamukulo ngoka taa mono, ogiifundja noguugoya. Yamwe otaa fatulula oondjodhi, ihe otaye mu pukitha ashike; itaa vulu oku mu kwatha. Onkee aantu taa endagula ya fa oonzi dha kana. Oye li muudhigu, oshoka kaye na omuwiliki.
3 Omuwa ota ti: “Onda geela aakwiilongo mboka taa pangele aantu yandje, otandi ke ya pangula. Oshigwana shaJuda oshandje, nangame, Omuwa Omunankondoawike, otandi ke ya sila oshimpwiyu. Otaa ka ninga uukambe wandje wuukwiita uunankondo. 4 Mokati kawo otamu ka za aaleli, aawiliki noondjayi okupangela aantu yandje. 5 Aantu yaJuda otaa ka kala aasindani ya fa aakwiita taa lyatele aatondi yawo mondoya yomuuyanda. Otaa ka kondja, oshoka Omuwa oku li pamwe nayo, notaa ka sinda aatondi, nonando oya kale haa kayile uukambe.
6 “Otandi koleke Aajuda;
otandi hupitha Aaisraeli.
Otandi ya sile ohenda,
notandi ya eta ayehe kegumbo.
Otaa ka kala ya fa
inaandi ya ekelahi nande.
Ongame Omuwa Kalunga kawo;
otandi ka yamukula omaindilo gawo.
7 Aaisraeli otaa ka nkondopala ya fa aakwiita;
taa nyanyukwa ya fa aantu ya nwa omaviinu.
Oluvalo lwawo otalu ka dhimbulukwa esindano ndika
notaa ka nyanyukilwa shoka Omuwa a longo.
8 “Otii ki ithana aantu yandje
noku ya gongela kumwe
Otii ke ya hupitha
e tandi ya indjipalitha, ngaashi ya li nale.
9 Nonando nde ya halakanithila mokati kiigwana,
natango otaa ka dhimbulukwa ndje komahala gokokule.
Oyo pamwe noyana otaa ka hupa
notaa galukile kegumbo ayehe kumwe.
10 Otandi ke ya eta kegumbo okuza Egipiti naAssur,
e taa kala mevi lyawo yene.
Otii ke ya tula muGilead naLibanon;
oshilongo ashihe otashi ku udha aantu.
11 Sho taa taguluka efuta lyuudhigu wawo,
ongame, Omuwa, tii ka lotitha omakuthikuthi,
nomeya omale gaNiili otaga ka pwina.
Assur shuuntsa otashi ka shonopekwa,
Egipiti oshinankondo otashi ka tyololoka.
12 Otii ka nkondopaleka aantu yandje;
otaa ka simaneka ndje nokuvulika kungame.”
Omuwa oye a popi adhihe ndhika.
© Oshindonga Bible © Bible Society of Namibia, 2008.
