Onzigona nembo enene lya patwa
1 Ngame onda mono embo enene li li moshikaha shokolulyo shaangoka a kuutumba koshipangelapundi, lya nyolwa meni nokombanda nolya patwa niipatitho iheyali. 2 Opo ihe onda mono omuyengeli omunankondo ta popi newi enene ta ti: “Olye ngoka a gwana okupatulula iipatitho mbika nokupandja embo ndika?” 3 Ihe inaku monika nando ogumwe megulu nenge kombanda yevi nenge meni lyevi, ngoka ta vulu okupatulula embo ndika nokutala mo. 4 Ongame nonda lili noonkondo, oshoka inaku monika nando ogumwe ngoka a gwana okupatulula embo ndika nokutala mo. 5 Nena gumwe gwomaakuluntu okwa lombwele ndje ta ti: “Ino lila! Tala, Onime yomezimo lyaJuda, omuvalwa gwomuDavid, okwa sindana nokwa gwana okupatulula iipatitho mbika iheyali nokupandja embo ndika.”
6 Ngame onda mono Onzigona a thikama pokati koshipangelapundi, a kundukwa kiinamwenyo ine nokaakuluntu. Onzigona okwa li a fa a dhipagwa. Okwa li e na ooniga heyali nomeho gaheyali, ngoka ogo oombepo heyali dhaKalunga ndhoka dha tumwa nuuyuni auhe. 7 Opo Onzigona okwa yi nokwa kutha embo ndyoka moshikaha shokolulyo shaangoka a kuutumba koshipangelapundi. 8 Manga te shi ningi, iinamwenyo mbyoka ine naakuluntu omilongo mbali nayane oya tsu oongolo koshipala shOnzigona. Kehe gumwe okwa li e na okashandja niiyaha yoshingoli yi na iitsinino, oyo omagalikano gaantu yaKalunga. 9 Oyo oyi imbi eimbilo epe ya ti:
“Ongoye wa gwana okutaamba embo ndika nokupatulula iipatitho yalyo,
oshoka owa li wa dhipagwa.
Nomolwokusa kwoye owe eta aantu kuKalunga,
oomboka ya za momaludhi agehe, momalaka agehe, miigwana ayihe nomomihoko adhihe.
10 Ongoye owe ya ningi ombala yaayambi okulongela Kalunga ketu,
oyo notaa ka pangela kombanda yevi.”
11 Ongame onda tala ishewe nondu uvu aayengeli oyendjiyendji ya kundukidha oshipangelapundi pamwe niinamwenyo mbiyaka ine naakuluntu 12 taa imbi newi enene taa ti:
“Onzigona ngoka a li a dhipagwa,
oye a gwana okutaamba epangelo, uuyamba, uunongo noonkondo, esimano, eadhimo nehambelelo!”
13 Nena ondu uvu iishitwa ayihe yomegulu, yokombanda yevi noyomeni lyevi naambiyaka ayihe yomefuta noyomewangandjo tayi imbi tayi ti:
“Ehambelelo, esimano, eadhimo noonkondo
kungoka a kuutumba koshipangelapundi nokOnzigona,
aluhe sigo aluhe!”
14 Iinamwenyo mbiyaka ine oya yamukula ya ti: “Amen,” naakuluntu oyi isizimike e taa galikana.
© Oshindonga Bible © Bible Society of Namibia, 2008.
