Kegongalo lyokuEfeso
1 “Nyolela omuyengeli gwegongalo lyomuEfeso, u tye:
“ ‘Ngoka e na oonyothi heyali moshikaha she shokolulyo note ende pokati kiihukikwanyeka iheyali yoshingoli, ota ti:
2 “ ‘Iilonga yoye ondi yi shi; onda tseya, nkene wa longo nuudhiginini nowa kala nokwiidhidhimika. Onda tseya kutya iho mwenene aakolokoshi naamboka haa iti aayapostoli; owe ya konakona nowe ya dhimbulula kutya oyo aafundja. 3 Owa kala momaudhigu omolwandje, ihe owi idhidhimike noino vulwa. 4 Ihe natango ondi na oohapu nangoye: sho waa hole ndje we ngaashi wa li petameko. 5 Dhimbulukwa ano okushuna kwoye monima mpoka ku thike. Itedhulula, u longe ngaashi wa li petameko. Ihe ngele ito itedhulula, otandi ke ya kungoye e tandi kutha po oshihukikwanyeka shoye pehala lyasho. 6 Eeno, ou na po ngaa uuwanawa washa, sho ho tondo iilonga yAaniikolaiti ngaashi nangame wo osho ndi li.
7 “ ‘Ngoka e na omakutsi, nu uve ko shoka Ombepo te shi lombwele omagongalo!
“ ‘Aasindani otandi ke ya pitika okulya iiyimati yokomuti gwomwenyo gwa kala mOshikunino shaKalunga.’ ”
Kegongalo lyokuSmirna
8 “Nyolela omuyengeli gwegongalo lyomuSmirna, u tye:
“ ‘Omutango nomuhugunini, ngoka a li a sa, ihe ngashingeyi oku na omwenyo, ota ti:
9 “ ‘Uudhigu woye ondi u shi; onda tseya oluhepo lwoye — ihe ongoye omuyamba. Onda tseya, nkene ho popilwa muuwinayi kwaamboka haa iti Aajuda, ihe hayo; paushili oyo aantu yaSatana. 10 Ino tila omahepeko ngoka tage ku adha. Kotoka! Omuhindadhi ote ke mu makela nokutulitha yamwe yomune mondholongo, ihe uudhigu mbuka otau ka kala owala omasiku omulongo. Idhidhimika ano sigo okusa, ongame otandi ku pe oshishani shomwenyo.
11 “ ‘Ngoka e na omakutsi, nu uve ko shoka Ombepo te shi lombwele omagongalo.
“ ‘Aasindani itaa ke ehamekwa keso etiyali.’ ”
Kegongalo lyokuPergamo
12 “Nyolela omuyengeli gwegongalo lyomuPergamo, u tye:
“ ‘Ngoka e na egongamwele lyoongenge mbali lya tsa, ota ti:
13 “ ‘Onda tseya mpoka wa kala kutya opu na omutumba gwaSatana. Ngoye owa dhama ndje noino etha okwiinekela ndje nopethimbo ndyoka Antipas, omutumwa gwandje omwiinekelwa, a dhipagelwa pehala opo tuu mpoka pwa kala Satana. 14 Ihe oku na iinima yimwe ndi na oohapu nangoye, sho wa kala pamwe naamboka ya taamba elongo lyaBileam, ngoka a longo Balak, a pukithe Aaisraeli nokulya iikulya ya yambelwa iimenka nokuhondela. 15 Naasho wa kala pamwe naantu ya taamba elongo lyAaniikolaiti. 16 Itedhulula ano! Ngele ito shi ningi, otandi ke ya kungoye e tandi kondjitha aantu ayehe mboka negongamwele tali zi mokana kandje.
17 “ ‘Ngoka e na omakutsi, nu uve ko shoka Ombepo te shi lombwele omagongalo.
“ ‘Aasindani otandi ke ya pa, ya lye omanna omaholekwa. Kehe gumwe gwomuyo ota ka pewa wo emanya etokele kwa nyolwa edhina epe itaali tseyika nando okulye, okomutaambi awike.’ ”
Kegongalo lyokuTiatira
18 “Nyolela omuyengeli gwegongalo lyomuTiatira, u tye:
“ ‘Omuna gwaKalunga, ngoka e na omeho ga fa oohandje dhomulilo noompadhi dha fa osheela oshikushu sha yelithwa, ota ti:
19 “ ‘Iilonga yoye ondi yi shi; ohole yoye, okwiinekelwa kwoye, eyakulo neidhidhimiko lyoye onde yi tseya. Onda tseya kutya ngashingeyi oto ningi oshindji shi vule petameko. 20 Ihe ondi na oohapu nangoye, sho wi idhidhimikile Isebel, omukiintu ngoka hi iti omutumwa gwaKalunga. Oye ota longo nota pukitha aapiya yandje moku ya fala moluhondelo noku ya litha iikulya ya yambelwa iimenka. 21 Omukiintu nguka onde mu pe ethimbo lyokwiitedhulula, ihe ina hala, e ethe okuhondela kwe. 22 Ngame otandi mu langeke kombete yuuvu, naamboka haa hondele naye, otaa ka mona egeelo edhigu. Otandi shi ningi mbala, ngele itaa etha iilonga yuulunde mbyoka ya longo nomukiintu nguka. 23 Otandi dhipaga po aalanduli ye, nomagongalo agehe otaga ka tseya kutya omadhiladhilo niiholekwa ayihe yaantu oyi li puuyelele koshipala shandje. Otandi ka futila kehe gumwe shi thike piilonga ye.
24 “ ‘Ihe oku na yamwe yomune muTiatira inaa taamba elongo ndika lya puka, oomboka inaa taamba shoka haku tiwa “iiholekwa yaSatana”. Itandi mu tsike uudhigu ulwe. 25 Ihe dhiginineni owala shoka mu shi na, sigo tandi ya. 26-28 Aasindani mboka taa gwanitha ehalo lyandje sigo okehulilo, otandi ke ya pa oonkondo ndhoka nde dhi pewa kuTate: otandi ke ya pa oonkondo dhokupangela iigwana nondhimbo yosheela noku yi tatula, ngaashi omuntu ta tatula oshuma sheloya. Otandi ke ya pa wo onyothi yongula.
29 “ ‘Ngoka e na omakutsi, nu uve ko shoka Ombepo te shi lombwele omagongalo.’ ”
© Oshindonga Bible © Bible Society of Namibia, 2008.
