Okupula egameno
Episalomi lyaDavid
1 Kalunga, uva ndje mokulila kwandje;
gamena omwenyo gwandje komatilitho gaatondi.
2 Holeka ndje omolwondjuvanena yaadhudhu
nongundu yaakolokoshi.
3 Otaa upike omalaka gawo ngaashi omagonga;
otaa zi iitya iilulu ya fa omaholongo.
4 Otaa uluma okutaandelitha iifundja yawo;
omuyuuki otaye mu langele e taye mu yaha.
5 Otaa kolekelathana mokulonga uukolokoshi
notaa uvanene, nkene ye na okutega oomwigo dhawo.
Otaa ti: “Olye te dhi mono?”
6 Otaa uvanene okulonga uudhudhu
e taa ti: “Otu na ompangela ya kola.”
Omutima gwomuntu oshilongo shi ili.
7 Ihe Kalunga ote ya yaha niikuti ye,
e taa gwile po mbala.
8 Kalunga ote ya geele molwoohapu dhawo;
ayehe mboka taye ya tala,
otaa pukapuka komitse ye ya dhina.
9 Aantu ayehe otaa ka tila;
otaa ka hokolola iilonga yaKalunga
notaa ka dhiladhila shoka e shi longa.
10 Aayuuki naa nyanyukilwe Omuwa
yo naa konge eholameno muye.
Ayehe mboka yaa na iihelele,
otaye ke mu hambelela.
© Oshindonga Bible © Bible Society of Namibia, 2008.
