Uukolokoshi waantu
(Eps. 14)Oshitewo shaDavid
1 Aagoya otaa ilombwele taa ti: “Kaku na Kalunga!”
Aantu mbaka oya shunduka noya longo omasithahoni;
kaku na nando ogumwe ta longo uuwanawa.
2 Kalunga oku li megulu noto ontamene aantu kombanda yevi,
opo a tale, ngele oku na omunandunge
nongele oku na nando ogumwe te mu simaneke.
3 Ihe ayehe oya puguma; ayehe oya yonana.
Kaku na nando gumwe ta longo shoka shi li mondjila,
nando ogumwe.
4 “Aakolokoshi mbaka inaye shi tseya nani?” Kalunga ta pula.
“Oyo haa hupu mokuyuga aantu yandje
yo ihaa galikana ndje.”
5 Oyo taa ka adhika kehaluko enene inaaye li mona nale,
oshoka Kalunga ota ka halakanitha iipongo yaambo ye tonde aantu ye.
Kalunga okwe ya ekelehi,
naIsrael ote ke ya sinda thilu.
6 Ando muSion mu zile Israel ekwatho!
Uuna Omuwa ta ka hepulutha natango aantu ye,
nena Aaisraeli otaa ka nyanyukwa ngiini!
© Oshindonga Bible © Bible Society of Namibia, 2008.
