Kalunga oku li pamwe natse
Eimbilo lyomezimo lyaKora
1 Kalunga oye epopilongulu noonkondo dhetu.
Okwi ilongekidha aluhe okukwatha momathimbo guudhigu.
2 Onkee ano itatu tila sha,
evi nando nali kakamithwe
noondundu nando nadhi gwile muule wefuta;
3 omafuta nando naga geye nokupindjala,
niikulundundu nando oyi ndjingandjingithwe kepiyagano.
4 Oku na omulonga tagu eta enyanyu moshilando shaKalunga,
omuuwa uuyapuki waanguka gwokombandambanda.
5 Kalunga oku li moshilando shoka,
noitashi ka yonagulwa po;
petendo lyeluwa ote ya, e shi gamene.
6 Iigwana oya kuyunguta, iilongo otayi pegeya;
Kalunga ota ndunduma, evi notali hemuka po.
7 Omuwa Omunankondoawike oku li pamwe natse;
Kalunga kaJakob oye omupopili gwetu.
8 Ileni, mu tale iilonga yOmuwa.
Konekeni iikumithalonga
mbyoka e yi longo kombanda yevi.
9 Ota hulitha po omalugodhi kombanda yevi alihe;
ota teya omatati, ta ndonyona omagonga,
niikandekitho ote yi fike po.
10 Oye a ti: “Etheni okukondja.
Shi tseyeni kutya ongame Kalunga, ndi li kombanda yiigwana
nokombanda yuuyuni auhe.”
11 Omuwa Omunankondoawike oku li pamwe natse;
Kalunga kaJakob oye omupopili gwetu.
© Oshindonga Bible © Bible Society of Namibia, 2008.
