Omautho gomauvaneko
1 Moses okwa lombwele aawiliki yomazimo gaIsrael e ta ti: “Omuwa okwa gandja omautho ngaka: 2 Ngele ope na omuntu tu uvanekele Omuwa sha nenge ta gana kutya oti idhilike sha, ina yona tuu euvaneko lye, ihe na gwanithe shoka a popi.
3 “Ngele oku na omukiintu omugundjuka e li maandjahe e tu uvanekele Omuwa sha nenge ta gana kutya oti idhilike sha, 4 na gwanithe shoka u uvaneke nenge a gana, he ngele ite mu indike, sho e shi uvu. 5 Ihe he ngele te mu indike okugwanitha egano, sho e li uvu, nena ita pumbwa oku li gwanitha. Omuwa ote mu dhimine po, oshoka he okwe mu indike.
6 “Ngele omukiintu ngoka u uvaneke sha nenge a popi shoka tashi mu manga, ta ka hokanwa, 7 nena na gwanithe shoka u uvaneke nenge a ganene, ngele omulume ite shi indike, sho e shi uvu. 8 Ihe omulume ngele ote mu indike okugwanitha euvaneko lye, sho e li uvu, nena ita pumbwa we oku li gwanitha. Omuwa ote mu kuthile po.
9 “Omuselekadhi nenge omukiintu a hengwa na gwanithe euvaneko lye kehe e li uvanekele Omuwa.
10 “Omuhokanwa ngele ta gana nenge tu uvaneke okwiidhilika sha, 11 na gwanithe shoka a ganene nenge u uvaneke, ngele omulume ite shi indike, sho e shi uvu. 12 Ihe ngele omulume te mu indike okugwanitha egano, sho e li uvu, ita pumbwa oku li gwanitha. Omuwa ote mu dhimine po, oshoka omulume okwe mu indike. 13 Omulume oku na uuthemba okukoleka nenge okudhima po egano nenge euvaneko kehe ndyoka omukadhi a gana nenge u uvaneka. 14 Ihe ngele omulume ine mu indika, uuna u uvu egano nenge euvaneko ndyoka, nena na gwanithe shoka a gana nenge u uvaneka. Okwa koleke egano nenge euvaneko, sho inee li tinda, uuna e li uvu. 15 Ihe ngele ota dhimi po egano nenge euvaneko konima, nena ota humbata ondjo yomukadhi.”
16 Ngaka ogo omautho ngoka Omuwa e ga pe Moses kombinga yomauvaneko gu uvanekelwa Omuwa komukiintu e li maandjahe nenge komuhokanwa.
© Oshindonga Bible © Bible Society of Namibia, 2008.
