Oshipotha shaKora, Datan na Abiram
1-2 Kora kaIzhar, omutekulu gwaKohat yaLevi, yo pamwe naDatan naAbiram, aana yaEliab, naOn yaPelet yaReuben oya tsile Moses ondumbo pamwe naalumentu 250 yomAaisraeli, aawiliki ya simana ya hogololwa kegongalo. 3 Oya gongalele Moses naAaron e taa ti kuyo: “Omwa pitilila unene! Iilyo ayihe yegongalo oyOmuwa, nOmuwa oku li pamwe natse atuhe. Omolwashike ano ngoye, Moses, to inenepekele kombanda yegongalo lyOmuwa?”
4 Moses sho e shi uvu, okwi ihata pevi e ta galikana. 5 Opo ihe okwa ti kuKora naalanduli ye: “Ongula yanakwasha Omuwa ota ka ulika, olye ngoka gwe. Ngoka gwe, kokutya ngoka e mu hogolola, ote mu pitika a hedhe koshiyambelo. 6-7 Ongula yanakwasha, ngoye Kora naalanduli yoye, kutheni iikangwa yomulilo, tulii mo omakala ga hanya niitsinino ne mu yi fale koshiyambelo. Opo mpoka tatu ka mona, olye gwomutse a hogololwa kOmuwa. Aalevi ne, omakamba geni oga vuka unene!”
8 Moses okwa lombwele natango Kora a ti: “Aalevi ne, pulakeneni! 9 Inashi mu gwanena nani, Kalunga kaIsrael sho e mu yoolola megongalo lyaIsrael mu hedhe kuye metsalihangano, opo mu thikame montaneho yegongalo noku li yakula? 10 Okwe mu pe esimano ndika pamwe nAalevi ooyakweni, ihe ngashingeyi omwa hala ishewe noshilonga shuuyambi. 11 Sho tamu tsu ondumbo naAaron, otashi ti otamu kondjitha Omuwa.”
12 Moses okwa tumu elaka i ithana Datan naAbiram, ihe oya ti: “Itatu ya ko! 13 Inashi gwana nani, sho we tu tembudha mevi lya tondoka omahini nomagadhi goonyushi, opo u tu dhipagele mombuga? Ngashingeyi owa hala u tu pangele? 14 Ou shi owe tu eta kevi ndyoka lya tondoka omahini nomagadhi goonyushi nowe tu pe omapya niitsambe yomiviinu? Ou shi oto vulu u tu kotokele? Itatu ya ko!”
15 Moses okwa geye nokwa lombwele Omuwa a ti: “Ino taamba omayambo gaalumentu mbaka taye ga yamba. Ngame inandi ya ninga nayi. Ine kutha nando ogumwe nando oko okasino.”
16 Moses okwa ti kuKora: “Ongula yanakwasha ngoye naalanduli yoye ayehe omu na okuholoka ketsalihangano. Aaron oko ta ka kala wo. 17 Shaa ngoka gwomune ota kutha oshikangwa she shomulilo a tula mo iitsinino note yi yamba koshiyambelo.” 18 Omulumentu kehe okwa kutha ihe oshikangwa she a tula mo omakala ga hanya niitsinino nokwa thikama posheelo shetsalihangano pamwe naMoses naAaron. 19 Kora okwa gongaleke egongalo alihe, nolya thikama lya taalela Moses naAaron posheelo shetsalihangano. Ohaluka eadhimo lyOmuwa olya adhimine egongalo alihe, 20 Omuwa nokwa lombwele Moses naAaron ta ti: 21 “Zii po utale paantu mbano, notandi ya kombo po mbalambala.”
22 Ihe Moses naAaron oya tsu iipala yawo pevi e taa ti: “Akutu, Kalunga, Kalunga, ongoye othithiya yomwenyo aguhe. Ndishi omuntu gumwe awike a yono noto geele egongalo alihe?”
23 Omuwa okwa ti kuMoses: 24 “Lombwela aantu ya ze po pomatsali gaKora, Datan naAbiram.”
25 Moses okwa yi kuDatan naAbiram a thindikilwa kaawiliki yAaisraeli. 26 Okwa lombwele aantu a ti: “Thikameni kokule nomatsali gaantu mbaka aadhudhu, ne inamu guma iinima yawo ayihe, opo mwaa kombwe po pamwe nayo moluulunde wawo.” 27 Aantu noya zi po pomatsali gaKora, Datan naAbiram.
Datan naAbiram oya piti mo ya thikama piiyelo yomatsali gawo, ye li pamwe naakulukadhi yawo noyana. 28 Moses okwe ya lombwele a ti: “Nena otamu ke shi tseya kutya Omuwa okwa tumu ndje ndi longe iilonga mbika noitandi yi longo pahalo lyandje mwene. 29 Aantu mbaka ngele otaa si, ngaashi aantu ayehe haa si pwaa na egeelo lyaKalunga, nena Omuwa ina tuma ndje. 30 Ihe ngele Omuwa ota ningi sha inaashi uvika nale, nevi otali makula okana kalyo noku ya huta po niinima yawo ayihe, e taa kulukile muusi ye na omwenyo, otamu ka tseya kutya aantu mbaka oya sheke Omuwa.”
31 Mbalambala Moses manga inaa mana okupopya, evi olye ekama mpoka ya li 32 nolya nina po Datan naAbiram, omatsali gawo, aalanduli yaKora ayehe nomaliko gawo agehe. 33 Oya kulukile muusi ye na omwenyo, pamwe nomaliko gawo. Evi olye ya siikile noya ningine mo. 34 Aaisraeli ayehe mboka ya li ko, oya yi ontuku, sho yu uvu onkugo yawo. Oyi igidha ya ti: “Tu fadhukii po! Evi otali ningi li tu nine po wo!”
35 Omuwa okwa tumu omulilo gwa hwama, nogwa lungunitha po aalumentu 250 mboka ya li ye na iitsinino.
Iikangwa yomulilo
36 Omuwa okwa lombwele Moses a ti: 37 “Lombwela omuyambi Eleasar lyaAaron a kuthe mo iikangwa yomulilo momutoko noku halakanithe omakala muyo shaa mpoka, oshoka iikangwa yomulilo oyo iiyapuki. 38 Oya yapulwa, sho ya tulwa poshiyambelo shOmuwa. Ano kuthii po iikangwa yomulilo yaalumentu mboka ya dhipagwa moluulunde wawo, yi hambulii po iisha ya pepuka e tamu yi siikilitha oshiyambelo. Otayi ka londodha Aaisraeli.” 39 Omuyambi Eleasar okwa kutha iikangwa yomulilo e te yi hambulitha iisha ya pepuka yi siikile oshiyambelo. 40 Ndika olya li elondodho kAaisraeli kutya hamuntu gulwe kee shi oluvalo lwaAaron ta hedha koshiyambelo, opo a fikile Omuwa iitsinino. Ota ningi a yonwe po ngaashi Kora naantu ye. Ayihe mbika oya ningwa, ngaashi Omuwa a popitha Moses e shi lombwele Eleasar.
Aaron ta hupitha aantu
41 Esiku lyanofu egongalo alihe olya tamaneke Moses naAaron lya ti: “Ne omwa dhipaga aantu yOmuwa.” 42 Ayehe sho ya gongala ya tamaneke Moses naAaron, oya pilamene etsalihangano noya mono lya siikilwa koshikogo, neadhimo lyOmuwa olya monika. 43 Moses naAaron oya yi noya thikama komeho getsalihangano. 44 NOmuwa okwa lombwele Moses a ti: 45 “Zii po paantu mbaka, notandi ya kombo po mbala!”
Ayehe yaali oya tsu iipala yawo mevi, 46 naMoses okwa lombwele Aaron a ti: “Kutha oshikangwa shoye shomulilo, tula mo omakala ga hanya gokoshiyambelo e to tula mo iitsinino momakala. Endelela u ye mokati kaantu, opo u ya gwanithile eyelithoyapulo. Endelela! Ondjahi yOmuwa oya hwama nokuli, nelega olya tameka.” 47 Aaron okwa ningi, ngaashi Moses e mu lombwele. Okwa yi, a kutha oshikangwa e ta matukile mokati kaantu. Sho a mono oshiponga sha tameka nale nokuli, okwa tula iitsinino momakala e ta ningi eyelithoyapulo. 48 Elega olya kodha, nokwa li a thikama pokati kaanamwenyo noonakusa. 49 Omwaalu gwaantu mboka ya si, ogwa li 14 700, moka inaamu yalulilwa mboka ya sile moshipotha shaKora. 50 Elega sho lya kodha, Aaron okwa galukile kuMoses posheelo shetsalihangano.
© Oshindonga Bible © Bible Society of Namibia, 2008.
