Aantu taa hempulula oondjo dhawo
1-2 Mesiku etimilongombali nagane lyomwedhi tuu ngoka omutiheyali Aaisraeli oya gongala yi idhilike, opo ya holole oluhodhi molwoondjo dhawo. Oya adhika yi iyoolola maakwiilongo ayehe. Oya li ya zala omahahi e tayi igundu omutoko momitse dhawo endhindhiliko lyoluhodhi. Nena oya thikama e taa tameke okuhempulula oondjo dhawo ndhoka ya yono noohekulu. 3 Oya leshelwa ompango yOmuwa konyala ootundi ndatu, nootundi ndatu dha landula oya hempulula oondjo dhawo e taa galikana Kalunga, Omuwa gwawo.
4 Oko kwa li omutuni gwAalevi, nkoka kwa thikama Jeshua, Bani, Kadmiel, Shebania, Bunni, Sherebia, Bani naKenani. Oya galikana mokule Omuwa, Kalunga kawo.
5 Aalevi Jesua, Kadmiel, Bani, Hashabneia, Sherebia, Hodia, Shebania naPetahia oyi ithanene aantu kegalikano ya ti:
“Thikameni, mu hambelele Omuwa, Kalunga keni;
mu hambeleleni sigo aluheluhe!
Shaa ngoka na hambelele edhina lye lya simana,
nando ehambelelo lyopantu kali na mupondo gwasha.”
Egalikano lyehempululo
6 Aaisraeli oya galikana egalikano ndika:
“Ngoye Omuwa, ongoye awike Omuwa;
ongoye wa shiti ewangandjo noonyothi dhomewangandjo.
Ongoye wa shiti evi nefuta naayihe yi li mo;
ayihe owe yi pe omwenyo.
Aanankondo yomegulu otaa ku inyongamene
e taa ku simaneke.
7 Ongoye, Omuwa Kalunga wa hogolola Abram
e to mu piitha mo muUr shomuBabilon;
owa lundulula edhina lye, li ninge Abraham.
8 Owe shi tseya kutya okwe ku inekela, e to hangana naye.
Owe mu uvanekele u mu pe evi lyAakaanana, evi lyAaheti nolyAayamori,
evi lyAaperesi, lyAayebusi nolyAagirgashi, li ninge eliko lyoluvalo lwe.
Owa gwanitha euvaneko lyoye, oshoka ngoye omudhiginini.
9 “Owa mono, nkene ootatekulu taa hepekwa muEgipiti;
owa uvu onkugo yawo, sho taa kugile ekwatho pEfuta lyomanenge.
10 Owa longo iinyengandunge we yi longele omukwaniilwa gwaEgipiti,
nomalenga ge naantu yevi lye,
oshoka owa li wa mono, nkene ya hepeke aantu yoye.
Owa kolekitha nena esimano ndyoka u li na sigo onena.
11 Aantu yoye owe ya longele ondjila mefuta
e to ya endithile mo puukukutu.
Oomboka ye ya tidhagana, owe ya undulile muule womeya,
oya ka ningina mo ya fa omamanya mefuta lya pindjala.
12 Omutenya owe ya enditha noshikogo shomuzile,
nuusiku owa minikile ondjila yawo noshikogo shomulilo.
13 Pondundu Sinai owa kulukile pevi wa zi megulu;
owa popitha aantu yoye
e to ya pe oompango oombwanawa nomalongo gu uka.
14 Owe ya longo, ya dhiginine okuyapula Omasabati goye,
nomomumati gwoye Moses owe ya pe iipango yoye.
15 “Uuna ya sa ondjala,
owe ya pe oshikwiila sha zi megulu,
nomeya ga zi memanya, uuna ya sa enota.
Owe ya lombwele ya ka pangele evi ndyoka wa uvaneke, u li ya pe.
16 Ihe ootatekulu oya li aainenepeki naatangalali
noya tindi okuvulika kiipango yoye.
17 Oya tindi okuvulika;
oya dhimbwa ayihe we yi longo;
oya dhimbwa iinyengandunge we yi longo.
Muuntsa wawo oyi ihogololele omuwiliki,
e ya shune muupika muEgipiti.
Ihe ongoye Kalunga to dhimi po oondjo;
ongoye omunamutimahenda nomunahole, iho geye mbala.
Esilohenda lyoye enene; ino ya ekelela.
18 Oyi ihambulile oshimenka molupe lwongombe
e taa ti osho kalunga ngoka e ya tembudha muEgipiti!
Oye ku hindi unene, Omuwa!
19 Ihe ngoye ino ya thiga po mombuga,
oshoka esilohenda lyoye enene.
Ino kutha po oshikogo shomuzile noshomulilo
shoka she ya ulukile ondjila omutenya nuusiku.
20 Muuwanawa woye owe ya lombwele shoka ya li ye na okuninga;
owe ya paluthitha omanna e to ya pe omeya gokunwa.
21 Moomvula omilongo ne,
owe ya gwanithile oompumbwe dhawo adhihe mombuga;
oonguwo dhawo inadhi kulupa, noompadhi dhawo inadhi zinda.
22 “Owe ya sinditha iigwana niilongo,
omavi ngoka ge ya kunduka.
Oya sindi oshilongo Heshbon sha lelwa kuSihon,
noshilongo Baasha shomukwaniilwa Og.
23 Owe ya pe aanona ye thike poonyothi dhomewangandjo,
oya sindana e taa kala moshilongo
shoka wa uvanekele oohekulu.
24 Oya lala evi lyaKaanan;
owa sindi aantu mboka ya kala mo.
Owa pe aantu yoye oonkondo,
ya ninge aantu naakwaniilwa yaKaanan, ngaashi ya hala.
25 Aantu yoye oya kwata po iilando ya kola,
evi lyo ondoka, omagumbo guuyamba
nomithima dha pandwa momamanya, omiti dhomiolivi, omiti dhiiyimati niitsambe yomiviinu.
Oya li ashihe shoka ya hala e taa ondoka;
oya nyanyukilwa iiwanawa ayihe we yi ya pe.
26 Aantu yoye inaa vulika noya tsu ondumbo nangoye,
oya pilamene ompango yoye.
Oya dhipaga aahunganeki mboka ye ya londodha,
mboka ye ya lombwele, ya galukile kungoye.
Aantu oye ku hindi olwindji.
27 Omolwashoka we etha aatondi yawo,
ye ya sinde yo ye ya pangele.
Muudhigu wawo oye ku kugile onkugo,
ongoye nowe ya yamukula megulu.
Mesilohenda lyoye enene owe ya tumine aawiliki
mboka ye ya hupitha maatondi yawo.
28 Ombili sho ye ya, oya yono ishewe,
nowa etha ishewe aatondi yawo, ye ya sinde.
Ihe uuna yi itedhulula noye ku pula, u ya hupithe,
owe ya uvu megulu.
Ethimbo nethimbo owe ya hupitha
omolwohenda yoye onene.
29 Owe ya londodha ya vulike komalongo goye,
ihe muuntsa oye ekelehi iipango yoye,
nando okudhiginina iipango yoye okwo okukala nomwenyo.
Oya tindi okuvulika, ya tangalala noya li oontseyele.
30 Omumvo nomumvo owe ya londodha neidhidhimiko.
Owa hwameke aahunganeki yoye, ye ya uvithile,
ihe aantu yoye oya li oombolo,
onkee we ya etha, ya sindike kiigwana yilwe.
31 Molwesilohenda lyoye enene,
ino ya thiga po nenge u ya yone po.
Ongoye Kalunga omunalukeno nomunesilohenda.
32 “Kalunga, Kalunga ketu, ngoye omunene ngiini!
Omunankondo nomutilithi shili!
Uudhiginini woye otau gwanitha omauvaneko goye.
Okuza mpoka aakwaniilwa yaAssur ye tu hepeke,
sigo onena nokuli, otwa tala iihuna ngiini!
Aakwaniilwa yetu, aawiliki yetu, aayambi yetu naahunganeki yetu,
ootatekulu naantu yetu ayehe oya hepekwa.
Dhimbulukwa, nkene twa mono iihuna!
33 Owa longo nawa, sho we tu geele;
owa kala omudhiginini, nando twa yono.
34 Ootatekulu, aakwaniilwa yetu,
aawiliki yetu naayambi yetu inaa dhiginina ompango yoye.
Inaa pulakena iipango yoye nomalondodho goye.
35 Nando oya kalele meloolo
mevi ndyoka enene nolyo ondoka we li ya pe,
inaye etha iilonga yawo iiwinayi yo ye ku longele.
36 Ngashingeyi otwa ninga aapika mevi ndyoka we li tu pe,
mevi ndika lyo ondoka lyoku tu palutha.
37 Eloolo lyeteyo lyalyo otali pewa aakwaniilwa mboka we ya tula po ye tu pangele,
molwaashoka twa yono.
Otaye tu ningi ngaashi ya hala,
tse niimuna yetu, notu li momupya omunene!”
Aantu taa hangana naKalunga
38 Omolwaayihe mbyoka ya ningwa po, tse Aaisraeli otatu nyola euvaneno lyolela, naawiliki yetu, Aalevi yetu naayambi yetu otaye li shaina.
© Oshindonga Bible © Bible Society of Namibia, 2008.
