Eningililomo lyoohepele
1 Konima yaambika aantu oyendji, aalumentu naakiintu, oya tameke okungungutulila Aajuda ooyakwawo. 2 Yamwe oya ti: “Otu na aanona oyendji, otatu pumbwa iilya, tu paluthe omagumbo getu.”
3 Yamwe oya ti: “Otwa gandja omapya, iitsambe yomiviinu nomagumbo getu ombambyona, opo tu mone iilya twaa se ondjala.”
4 Yamwe ishewe oya ti: “Otwa hehela iimaliwa, opo tu fute oompale dhuuwa molwomapya niitsambe yetu yomiviinu. 5 Tse atuhe aantu yoludhi lumwe nAajuda ooyakwetu. Kape na eyooloko pokati kaana yetu noyawo. Ihe tse otu na okugandja po aana yetu, ya ninge aapika. Yamwe yomaana yetu aakadhona oya landithwa po nokuli ya ningi aapika. Ihe tse itatu vulu sha, oshoka omapya niitsambe yetu yomiviinu otwe yi yugwa.”
6 Ngame sho ndu uvu omayemato gawo, onda geye 7 e tandi tokola okuninga po sha. Onda nyenyetele aawiliki nomalenga goshigwana e tandi ya lombwele te ti: “Otamu hepeke unene aamwanyoko!”
Onda hiya oshigongi shaayehe, ya gongalele omukundu nguka 8 e te ti: “Sho twa kaleni sigo oompaka, otwa kulile Aajuda ooyakwetu mboka ya li ya landwa po kaapagani. Ndele nena ne otamu thiminike aamwanyoko, yi ilandithe po kune, kAajuda ooyakwawo!” Aawiliki oya mwena yo inaa tya we sha.
9 Onda ti: “Otamu ningi nayi! Omu na okutila Kalunga, ne mu longe shoka shu uka. Nena aatondi yetu aapagani itaa vulu oku tu sheka. 10 Ngame nooyakwetu naakalele yandje otwa gandja wo iimaliwa niilya kaantu. 11 Etheni oongunga adhihe ye dhi mu lile — iimaliwa nenge iilya nenge omaviinu nenge omagadhi gooholivi. Ya shunithileni wo mbala omapya, iitsambe yomiviinu, omiti dhomiolivi nomagumbo gawo!”
12 Aawiliki oya yamukula ya ti: “Tse atuhe otatu ningi shoka to ti. Tse otatu shunitha omaliko gawo, tse itatu ya pula we oongunga.”
Ondi ithana aayambi e tandi ganitha aawiliki montaneho yawo, ya dhiginine euvaneko ye li uvaneke. 13 Nena ondi ihula ongama yi na ondjato, nde yi shikumuna e te ti: “Kalunga osho ne mu shikumune ngeyi, ngele itamu gwanitha euvaneko lyeni. Ne mu kuthe omagumbo geni noshaa shoka mu shi na e te mu thigi pontundulu.”
Nena oshigongi ashihe osha ti: “Amen,” noya hambelele Omuwa. Aawiliki noya dhiginine euvaneko lyawo.
Okwaaihola kwaNehemia
14 Momimvo omulongo nambali ndhoka nda li omunashikandjo mevi lyaJuda, okuza komumvo omutimilongombali gwelelo lyomupangeli Artakserkses sigo okomumvo omutimilongondatu nambali gwelelo lye, tse nooyakwetu inatu lya iikulya yuunenentu. 15 Aanashikandjo ayehe mboka ya tetekela ndje, oya kala omutenge koshigwana. Oya li taa pula iimaliwa iisiliveli omilongo ne mesiku, ya lande iikulya nomaviinu. Aapiya yawo oya hepeke wo aathigona. Ihe ngame onda longo shi ililela, oshoka onda tila Kalunga. 16 Ondi itula wo metungululo lyekuma pamwe naakalele yandje ayehe. Inandi ikongela nande epya. 17 Poshililo shandje onda palutha Aajuda ethele nomilongo ntano naawiliki yawo, kakele kaantu ayehe mboka ye ya kungame taa zi miigwana yopuushiinda. 18 Esiku kehe onda gandja ondumetana yimwe, oonzi oohogololwa hamano noondhila odhindji. Lumwe momasiku omulongo otwi imonene omaludhi gi ili nogi ili gomaviinu omape. Ihe onda tseya omitenge ndhoka omidhigu tadhi humbatwa koshigwana, onkee inandi pula oshipewa shoka omunashikandjo e na uuthemba washo.
19 Otandi ku galikana Kalunga, dhimbulukwa ndje, naayihe mbyoka nda ningile oshigwana shika.
© Oshindonga Bible © Bible Society of Namibia, 2008.
