NEHEMIA 10 - Oshindonga Bible (ONDB)

1 Omushaini gwotango oye omunashikandjo Nehemia yaHakalia, okwa landula Sedekia. Aashaini ooyakwawo oyo mbaka:

2-8 Aayambi:

Seraia, Azaria, Jeremia,

Pashhur, Amaria, Malkija,

Hattush, Shebania, Malluk,

Harim, Meremot, Obadia,

Daniel, Ginneton, Baruk,

Meshullam, Abia, Mijamin,

Maasia, Bilgai naShemaia.

9-13 Aalevi:

Jeshua yaAsania,

Binnui gwoludhi lwaHenadad,

Kadmiel, Shebania, Hodia,

Kelita, Pelaia, Hanan,

Mika, Rehob, Hashabia,

Sakkur, Sherebia, Shebania,

Hodia, Bani naBeninu.

14-27 Aawiliki yoshigwana:

Parosh, Pahat Moab,

Elam, Sattu, Bani,

Bunni, Asgad, Bebai,

Adonia, Bigvai, Adin,

Ater, Hiskia, Assur,

Hodia, Hashum, Bezai,

Harif, Anatot, Nebai,

Magpiash, Meshullam, Hesir,

Meshesabel, Sadok, Jaddua,

Pelatia, Hanan, Anaia,

Hosea, Hanania, Hasshub,

Hallohesh, Pilha, Shobek,

Rehum, Hashabna, Maaseia,

Ahia, Hanan, Anan,

Malluk, Harim naBaana.

Euvathano

28 Tse Aaisraeli, aayambi, Aalevi, aalangeli yotempeli, aayimbi yomotempeli, aakalele yomotempeli naayehe yalwe mboka haa vulika kompango yaKalunga noyi iyoolola mokati kaakwiilongo ya kala mevi lyetu, otse atuhe pamwe naakiintu yetu naamwetu ayehe ya koka noyu uvite ko, 29 otatu hangana pamwe naawiliki yetu mokugana nokuganenena kutya otatu kala pampango yaKalunga, ndjoka Kalunga e yi pele omuntu gwe Moses, notatu vulika kwaayihe mbyoka Omuwa, Kalunga ketu, te yi tu lombwele; e tatu dhiginine iipango ye ayihe nomautho ge agehe.

30 Tse itatu hokanathana we naakwiilongo mboka ya kala mevi lyetu.

31 Aakwiilongo ngele otaye tu etele iilya nenge sha shilwe, tu shi lande mEsabati nenge mesiku lilwe eyapuki, itatu shi landa nando.

Kehe omumvo omutiheyali otatu vululukitha omapya, notatu dhimi po oongunga adhihe.

32 Omumvo kehe otatu ka gandja oshititatu shoshimaliwa oshisiliveli, tu kwathe iiniwe yotempeli.

33 Otatu ka sila oshimpwiyu elongelokalunga lyomotempeli miinima mbika: iikwiila iiyapuki, iikulyandjambo yesiku kehe, omafikilondjambo gesiku kehe, omayambo omayapuki gOmasabati, giituthi yomwedhi omupe nogiituthi yilwe, omayambo omakwawo omayapuki, omayonondjambo naashihe shilwe tashi pumbiwa motempeli.

34 Tse, oshigwana, aayambi nAalevi, otatu ka umba oshihogololitho omumvo kehe, opo tu mone omaludhi ngoka tage tu tyayele iikuni yokulungunitha po omafikilondjambo taga yambelwa Omuwa, Kalunga ketu, ngaashi shu uthwa mompango.

35 Oshipe shometeyo lyetu niiyimati mbyoka tayi tiligana tango komiti dhetu, otatu yi eta kotempeli yOmuwa omumvo kehe.

36 Omumati kehe osheeli ta valwa, otatu mu fala kaayambi kotempeli, ngaashi tashi pulwa kompango, tu mu yapulile Kalunga. Uutana auhe wi iyelipwa kooyina, otatu u yapulile Omuwa, osho wo uunzigona nenge uukombwena wi iyelipwa koonzi nokiikombo.

37 Ongundo ndjoka tayi zi miilya mbyoka tatu teya kehe tango omumvo, otatu yi fala kaayambi, nomayambo getu galwe gomaviinu, gomagadhi gooholivi, nogiiyimati yomaludhi agehe.

Aalevi mboka taa kunguna oshitimulongo momikunda dhi na omapya, otatu ya faalele oshitimulongo sheteyo lyetu. 38 Aayambi aana yaAaron oye na okukala pamwe nAalevi, uuna iitimulongo tayi etwa, nAalevi oye na okukutha oshitimulongo mwaayihe mbyoka ye etwa e taye shi fala moompungulilo dhomotempeli. 39 Aaisraeli nAalevi oye na okufala iigandjwa yiilya, yomaviinu noyomagadhi gooholivi moompungulilo moka iikwaniipangitho yomotempeli hayi pungulwa naamoka hamu kala aayambi, aalangeli yotempeli naayimbi mboka ye na olufo lwiilonga.

Tse itatu etha nande egumbo lyaKalunga ketu.