1 Ndika olyo ehokololo ndyoka Nehemia omuna gwaHakalia a tsakanitha.
Nehemia ti ipyakidhilile Jerusalem
Momwedhi Kislev momumvo omutimilongombali sho Artakserkses a li omupangeli gwaPersia, ngame onda li moshilandohote Susa. 2 Hanani, gumwe gwomaamwameme, okwa thiki mo a zi kuJuda e li pamwe nongundu yaalumentu ooyakwawo. Ngame onde ya pula kombinga yaJerusalem noyAajuda ooyakwetu mboka ya zi muupika muBabilon. 3 Oya hokololele ndje kutya mboka ya hupile ko noya galukile kevi lyooyina, oye li muudhigu uunene, naakwiilongo mboka ye li puyo, otaye ya tala nondhino. Oya hokololele ndje ishewe kutya omadhingililokuma gaJerusalem oga kumunwa po, nomiyelo dhasho inadhi longwa we, hela dha fikilwe po. 4 Sho nda kundana ayihe mbika, onda gwile po e te lili.
Onda lili omasiku ogendji nondi idhilike iikulya. Onda galikana Kalunga nda ti: 5 “Omuwa, Kalunga komegulu! Ongoye omunene, tse otatu ku tila. Ongoye to dhiginine ehangano lyoye naamboka ye ku hole e taa gwanitha shoka wa ti. 6 Tala ndje, Omuwa, ngoye u uve omagalikano gandje, sho te galikanene aantu yoye Aaisraeli omutenya nuusiku. Otandi hempulula kutya tse Aaisraeli otwa yona. Onda yono pamwe nootatekulu. 7 Otwa ningi nayi, sho twa tsu ondumbo nangoye tse inatu gwanitha shoka wa ti. Inatu dhiginina iipango mbyoka we yi tu pele ye endele muMoses, omuntu gwoye. 8 Ngashingeyi dhimbulukwa shoka wa lombwelele Moses to ti: ‘Ngele ne Aaisraeli tamu iteka ndje, otandi mu halakanithile mokati kiigwana. 9 Ihe ngele otamu galukile kungame e tamu ningi shoka nde mu lombwele, otandi ke mu fala kehala ndyoka nde li hogolola, ndi simanekelwe mo, nonando mu kale mwa halakanithilwa sigo okooha dhuuyuni.’
10 “Omuwa, mbaka aapiya yoye, aantu yoyelela, ongoye we ya mangulula koonkondo dhoye oonene nokomatha goye. 11 Ano ngashingeyi pulakena egalikano lyandje nomagalikano gaapiya yoye yalwe mboka ya hala oku ku simaneka. Nena ndjika monitha ndje elago, opo omupangeli a etele ndje olukeno.”
Pethimbo ndiyaka onda li omupindi gwoondjupa dhuuwa.
© Oshindonga Bible © Bible Society of Namibia, 2008.
