Jesus ta kutitha aalumentu omayuvi gane
(Mat. 15:32-39)1 Pomasiku ngeyaka ongundu onene yaantu oya gongala ishewe, ihe molwashoka ya li yaa na shoka taa li, Jesus okwi ithana aalongwa ye e ta ti kuyo: 2 “Aantu mbaka ondi ya uvitile olukeno, oshoka oya menekele pungame omasiku gatatu nokuli yo kaye na shoka taa li. 3 Ngele tandi ya laleke, ya ye komagumbo gawo inaaya lya sha, nena otaa ka gundila mondjila, oshoka yamwe yomuyo oya zile kokule.”
4 Aalongwa ye oye mu yamukula: “Iikulya otayi monika peni mombuga yowala muno, opo yi kutithe aantu ye thike mpano?”
5 Opo Jesus okwe ya pula: “Omu na po iikwiila ingapi?”
Oyo ya ti: “Iheyali.”
6 Jesus okwa lombwele aantu, ya kuutumbe pevi. Nena okwa kutha iikwiila mbyoka iheyali. Sho a hambelele, okwe yi pambula e te yi pe aalongwa ye, ye yi topolele aantu. Oyo noye shi ningi. 7 Oyo ya li ye na po wo uuhi umwe waa shi owindji. Jesus sho a hambelele, okwa lombwele ishewe aalongwa ye, ye u topolele aantu. 8 Aantu oya li e taa kuta, aalongwa noya toola uupambu mboka wa hupu po, oontungwa heyali dhu udha. 9 Opwa li pu na aantu ye thike pomayuvi gane. Jesus sho a laleke aantu mboka, 10 okwa yi mbala mowato pamwe naalongwa ye e ta yi komukunda gwaDalmanuta.
Aafarisayi oya hala oshikumithalonga
(Mat. 16:1-4)11 Aafarisayi oye ya noya tameke okuludhikitha Jesus noye mu makele noku mu pula, e ya talithe oshikumithalonga tashi zi megulu. 12 Jesus okwa fudha olule e ta ti: “Omolwashike epipi ndika lya hala okutalithwa oshikumithalonga? Ngame otandi mu lombwele: Epipi ndika itali talithwa oshikumithalonga.”
13 Jesus okwe ya thigi po e ta yi ishewe mowato nokwa taagulukile handiyaka yefuta.
Efulika lyaafarisayi nolyaHerodes
(Mat. 16:5-12)14 Aalongwa oya adhika ya dhimbwa okweetelela iikwiila; mowato oya adhika ye na mo oshikwiila shimwe ashike. 15 Jesus okwe ya kumagidha a ti: “Kotokeni, ne mu iyageke efulika lyaafarisayi nolyaHerodes.”
16 Oyo ya pulathana ya ti: “Ota popi molwaashoka inaatu za ko niikwiila?”
17 Jesus sho e shi dhimbulula, okwa ti kuyo: “Omolwashike tamu ilombwele kutya omolwashono inaamu za ko niikwiila? Kamu uvite ko natango? Omitima dheni odha kukuta? 18 Omeho omu ga na, ihe kamu wete ko. Omakutsi omu ga na, ihe kamu uvite ko. Inamu dhimbulukwa, 19 sho nda topolele aalumentu omayuvi gatano iikwiila mbiyaka itano kutya oontungwa ngapi dhu udha mwa toola dhiihupe?”
Oyo ya ti kuye: “Omulongo nambali.”
20 “Osho wo iikwiila iheyali kaalumentu omayuvi gane kutya oontungwa ngapi mwa toola dhu udha uupambu?”
Oyo ya ti kuye: “Heyali.”
21 “Ndele natango kamu uvite ko?”
Jesus ta aludha omuposi
22 Oyo oye ya muBetsaida. Aantu noye eta omulumentu omuposi kuJesus noye mu indile, e mu gume. 23 Jesus okwa kwata omuposi mokwaako nokwe mu fala kokule nomagumbo. Nena okwe mu hiyile omayeye momeho nokwe mu tenteke iikaha ye e te mu pula ta ti: “Ou wete sha?”
24 Omuposi okwa tameke okumona ko e ta ti: “Ondi wete aantu taa ende ya fa omiti.”
25 Jesus okwa tula ishewe iikaha ye komeho gomuposi. Nena okwa aluka ihe nokwa mono ko nawa. Ayihe okwa li e yi wete. 26 Opo Jesus okwe mu laleke, a ye kaandjawo, nokwa ti: “Ukilila kaandjeni. Ino ka pitapita, u shi lombwele omuntu.”
Ehempululo lyaPetrus
(Mat. 16:13-20Luk. 9:18-21)27 Jesus okwa yi pamwe naalongwa ye komikunda dhaKesarea Filippi. Manga ye li mondjila, okwe ya pula e ta ti: “Aantu otaa tile ndje ngiini, ongame lye?”
28 Oyo ye mu yamukula ya ti: “Yamwe otaa ti oJohannes Omushashi, yamwe otaa ti oElia, nayamwe otaa ti gumwe gwomaahunganeki.” 29 Oye okwe ya pula natango: “Ne otamu tile ndje ngiini, ongame lye?”
Petrus okwe mu yamukula a ti: “Ongoye Kristus.”
30 Nena okwe ya indike, kaaye mu popye nando okulye.
Jesus ta popi okuhepekwa kwe nokulandulwa kwe
(Mat. 16:21-28Luk. 9:22-27)31 Jesus okwa tameke okulonga aalongwa ye, Omuna gwOmuntu oku na okuhepekwa nomahepeko ogendji note ekelwahi kaakuluntu, aayambi aakuluntu nokaalongimpango. Oye ota ka dhipagwa, ihe esiku etitatu ota ka yumudhwa. 32 Oye okwa popi ngeyi inaa holeka nando osha. Petrus okwe mu kutha paantu nokwa tameke oku mu ganda. 33 Nena Jesus okwa punguluka e ta tala kaalongwa ye nokwa ganda Petrus a ti: “Za po pungame, Satana! Ngoye ito dhiladhila shoka shopaKalunga, ihe ooshoka shopantu.”
34 Jesus okwi ithana ihe ongundu yaantu nosho wo aalongwa ye, ye ye kuye, nokwa ti kuyo: “Ngele ku na ngoka a hala okulandula ndje, oye ni idhimbwe ye mwene, ni itsike omushigakano gwe, ye na landule ndje. 35 Oshoka oongoka a hala okuhupitha omwenyo gwe, oye te gu kanitha, ihe ngoka ta kanitha omwenyo gwe molwandje nomolwokutaandelitha elaka etoye, ote guhupitha. 36 Otashi kwatha shike omuntu, nando ni ilikolele uuyuni auhe, ye e ta kanitha omwenyo gwe? 37 Omuntu ota gandja ando shike, shi ninge ekulilo lyomwenyo gwe? 38 Ngele ku na ngoka ta si ndje ohoni nosho wo oohapu dhandje mokati kepipi ndika lyaahondeli nolyaalunde, nena Omuna gwOmuntu ote ke mu sa wo ohoni, uuna te ke ya e li mesimano lyaHe pamwe naayengeli ye aayapuki.”
© Oshindonga Bible © Bible Society of Namibia, 2008.
