Eyumuko lyaJesus
(Mat. 28:1-8Luk. 24:1-12Joh. 20:1-10)1 Esabati sho lya piti, Maria Magdalena naMaria, yina yaJakob, nosho wo Salome oya landa omugwayo gwa nika nawa, ya ka gwayeke omudhimba. 2 Ongula onene yesiku lyotango lyoshiwike, etango sho tali piti, oye ya kombila. 3 Manga ye li mondjila, oya pulathana ya ti: “Olye te ke tu kandulila po emanya posheelo shombila?” 4 Ano sho ya yelutha omeho gawo, oya mono kutya emanya olya kandulwa po nale, nonando olya li enene noonkondo. 5 Sho ya yi meni lyombila, oya mono mo omugundjuka a kuutumba kombinga yokolulyo, a zala onguwo onde ontokele. Oyo noya haluka.
6 Ye okwe ya popitha a ti: “Inamu tila. Otamu kongo Jesus Omunasareti, ngoka a li a alelwa komushigakano. Ke mo muka, okwa yumudhwa kuusi. Tala, eha olyo ndika mpoka ye mu langekele. 7 Indeni ihe, mu ka lombwele aalongwa ye naPetrus ngeyi: ‘Ote mu tetekele kuGalilea, oko tamu ke mu mona, ongaashi e mu lombwelele.’ ”
8 Oyo noya zi mo mombila nokumatuka, oshoka oya li ya haluka taa kakama. Onkee inaa popya nando osha komuntu, oshoka oya li ya tila.
Jesus ti ihololele Maria Magdalena
(Mat. 28:9-10Joh. 20:11-18)[ 9 Ongula onene yesiku lyotango lyoshiwike Jesus sho a yumuka kuusi, okwi ihololele tango Maria Magdalena, mungoka a li a tidha oompwidhuli heyali. 10 Maria okwa yi nokwa hokololele mbeyaka ya li ya kala naJesus noya li ya nika oluhodhi notaa lili. 11 Sho yu uvu, Maria ta ti kutya Jesus oku na omwenyo nokwe mu mona, inaye mu itaala.
Jesus ti ihololele aalongwa yaali
(Luk. 24:13-35)12 Konima yaambika Jesus okwi iholele yaali yomaalongwa molupe lwi ili, manga taa zi moshilando. 13 Sho ya shuna, oya hokololele yakwawo, ihe kakwa li nando ogumwe e ya itaale.
Jesus ti ihololele aalongwa omulongo nagumwe
(Mat. 28:16-20Luk. 24:36-49Joh. 20:19-23Iil. 1:6-8)14 Lwahugunina Jesus okwi ihololele aalongwa omulongo nagumwe, manga ya li taa li. Okwe ya nyenyetelele okwaayitaala nokwaavulika kwawo, oshoka inaa itaala mboka ye mu mono, sho a yumudhwa kuusi.
15 Jesus okwa ti kuyo: “Indeni nuuyuni auhe, mu ka uvithile aashitwa ayehe elaka etoye. 16 Ngoka i itaale e ta shashwa, ota hupithwa; ihe ngoka ini itaala, ota pangulilwa ekano. 17 Mboka yi itaala, otaa ka longa iikumithalonga. Medhina lyandje otaa ka tidha mo oompwidhuli notaa ka popya omalaka galwe. 18 Ngele taa kwata omayoka nenge taa nu uuzigo, itau ya ningi sha. Otaa ka tenteka iikaha yawo kaavu naambaka otaa aluka.”
Jesus ta yi megulu
(Luk. 24:50-53Iil. 1:9-11)19 Jesus sho a kundathana naalongwa ye, okwa kuthwa po e ta yi megulu nokwa kuutumba kolulyo lwaKalunga. 20 Aalongwa oya yi noyu uvithile akuhe, Omuwa okwa longo pamwe nayo nokwa koleke euvitho lyawo niikumithalonga e yi ya longitha.]
© Oshindonga Bible © Bible Society of Namibia, 2008.
