Euvitho lyokondundu: Okupangulathana
(Luk. 6:37Luk. 38Luk. 41-42)1 “Inamu pangula yakweni, opo Kalunga kee mu pangule. 2 Oshoka omukalo ngoka tamu gu pangulitha yakweni, ogwo Kalunga te ke mu pangulitha, noshiyelekitho shoka tamu shi yelekitha yakweni, osho Kalunga te ke mu yelekitha. 3 Ongiini ano wa tala okahwandu okashona ke li meho lyamukweni, ihe endangalati li li meho lyoye ku li wete? 4 Nenge oto vulu ngiini okulombwela mukweni: ‘Andiya, ndi kuthe mo okahwandu ke li meho lyoye,’ ihe ngoye ou na endangalati meho lyoye mwene? 5 Mufudhime ngoye, kutha mo tango endangalati meho lyoye mwene, opo ihe u tale, ngele oto vulu okukutha mo okahwandu ke li meho lyamukweni.”
6 “Shoka oshiyapuki inamu shi gandja koombwa, opo dhaa ka galuke e tadhi mu ponokele. Iimona yeni inamu yi umbila iingulu, opo yaa ke yi lyatagule nomakondo gayo.”
Okugalikana
(Luk. 11:9-13)7 “Indileni, e tamu pewa; kongeni, e tamu mono; konkoleni, e tamu egululwa. 8 Oshoka kehe ngoka ti indile, ota pewa; naangoka ta kongo, ota mono; naangoka ta konkola, ote egululwa. 9 Nenge mokati keni omu na tuu omuntu, omwana ngele te mu indile oshikwiila, ye te mu pe emanya? 10 Nenge te mu indile ohi, ye te mu pe eyoka? 11 Ano one mboka aawinayi ngele omu shi okupa aana yeni omagano omawanawa, unene tuu Ho yeni yomegulu ota gandja omagano omawanawa kumboka taye mu indile.”
12 “Onkee ano shaa shoka mwa hala aantu ye mu ningile, osho ya ningileni wo. Ndjika oyo ompango nomahunganeko.”
Ondjila yeso noyomwenyo
(Luk. 13:24)13 “Indeni mo, mu pitile mosheelo shoka sha patekidha, oshoka osheelo shoka oshinene nondjila ndjoka ya mbwalangandja otayi fala mekano, noku na oyendji mboka taye yi lamba. 14 Ihe osheelo shoka oshishona nondjila ndjoka ya thinana otayi fala komwenyo, naashona yowala mboka taye yi mono.”
Aahunganeki aafundja
15 “Angaleni aahunganeki aafundja mboka taye ya kune molupe lwoonzi, ihe meni lyawo omambungu haga lyana. 16 Otamu ya dhimbulula kiiyimati yawo. Ndishi oomviinu ihadhi likolwa komano nenge oonkwiyu komankono? 17 Ano okehe tuu omuti omwaanawa otagu imi iiyimati iiwanawa, ihe omuti omwiinayi otagu imi iiyimati iiwinayi. 18 Omuti omwaanawa kagu wapa okwiima iiyimati iiwinayi, nomuti omwiinayi kagu wapa okwiima iiyimati iiwanawa. 19 Kehe omuti itaagu imi iiyimati iiwanawa, otagu kewa po e tagu umbilwa momulilo. 20 Onkee ano otamu ya dhimbulula kiilonga yawo.”
Egwanitho lyehalo lyaKalunga
21 “Hakehe ngoka ti ithana ndje ‘Omuwa, Omuwa’, ta yi mOshilongo shegulu, aawe, oye tuu ngoka ta gwanitha ehalo lyaTate yomegulu. 22 Mesiku ndyoka oyendji otaa ka lombwela ndje taa ti: ‘Omuwa, Omuwa! Hatse tuu mboka tu uvitha medhina lyoye notwa tidha mo oompwidhuli medhina lyoye notwa longo iilongankondo oyindji medhina lyoye?’ 23 Nena ongame tandi ya lombwele: ‘Kandi mu shi noshitonale. Zii po pungame, one aakolokoshi!’ ”
Aatungingulu yaali
(Luk. 6:47-49)24 “Oshoka kehe tuu ngoka tu uvu oohapu ndhika dhandje nota vulika kudho, oye ta yelekwa nomulumentu omunandunge a tungile ongulu ye kemanya. 25 Omvula oya loko, efundja lye ya, noombepo odha pepe dhi itsu mongulu ndjoka, ihe inayi kumuka po, oshoka ekankameno lyayo olya li kemanya.”
26 “Nakehe tuu ngoka tu uvu oohapu ndhika dhandje, ye ita vulika kudho, ota yelekwa nomulumentu egoya a tungile ongulu ye pehekevi. 27 Omvula oya loko, efundja lye ya, noombepo odha pepe dhi itsu mongulu ndjoka, e tayi kumuka po, nekumuko lyayo olya li enene.”
28 Jesus sho a mana okupopya oohapu ndhoka, aantu oya kuminwa elongo lye. 29 Oshoka okwe ya longo ngaangoka e na oonkondo, haangaashi aalongimpango yawo.
© Oshindonga Bible © Bible Society of Namibia, 2008.
