Jesus ta makelwa
(Mrk. 1:12-13Luk. 4:1-13)1 Nena Ombepo oya fala Jesus kombuga, a ka makelwe komuhindadhi.
2 Ano Jesus sho a ningi omasiku omilongo ne inaa lya sha, okwa li a sa ondjala. 3 Omumakeli okwe ya kuye e ta ti: “Ngele ngoye Omuna gwaKalunga, lombwela omamanya ngaka, ga shituke iikwiila.”
4 Ihe Jesus okwa yamukula a ti: “Okwa nyolwa: ‘Omuntu ita kala e na omwenyo koshikwiila ashike, ihe okukehe ohapu tayi zi mokana kaKalunga.’ ”
5 Opo ihe omuhindadhi okwe mu fala kOshilando oshiyapuki nokwe mu londeke koshihoko shotempeli 6 e ta ti kuye: “Ngele ngoye Omuna gwaKalunga, iyundulila pevi, oshoka okwa nyolwa:
‘Kalunga ote ku tumine aayengeli ye:
Otaye ku papatele momaako gawo,
opo waa pume oompadhi dhoye komamanya.’ ”
7 Jesus okwa ti kuye: “Okwa nyolwa natango. ‘Ino makela Omuwa, Kalunga koye.’ ”
8 Omuhindadhi okwa fala ishewe Jesus kondundu ondeendeka e te mu ulukile omapangelo agehe gomuuyuni nomasimano gago 9 e ta ti: “Ayihe mbika otandi yi ku pe, ngele to tsile ndje oongolo e to galikana ndje.”
10 Jesus okwa ti kuye: “Za po, Satana, oshoka okwa nyolwa: ‘Omuwa Kalunga koye oye awike u na oku mu galikana noye awike u na oku mu longela.’ ”
11 Ano osho ngaaka omuhindadhi okwa thigi po Jesus; aayengeli noye ya e taye mu yakula.
Etameko lyiilonga yaJesus muGalilea
(Mrk. 1:14-15Luk. 4:14-15)12 Jesus sho u uvu, Johannes e edhililwa mondholongo, okwa shuna kuGalilea. 13 Ye ina tula we muNasaret, ihe okwa ka kala muKapernaum, shi li pomunkulo gwefuta, omiikandjo yaSebulon naNaftali, 14 opo oohapu dhi gwanithwe ndhoka dha popiwa komuhunganeki Jesaja, sho ta ti:
15 “Evi lyaSebulon nevi lyaNaftali, ombinga yefuta,
handiyaka yaJordan, Galilea yaapagani!
16 “Oshigwana sha kuutumba momilema,
otashi mono uuyelele owindji.
Naamboka ya kuutumba mevi lyomilema nomomuzizimba gweso,
uuyelele otau ya yelele.”
17 Okuza mpoka Jesus okwa tameke okuuvitha ta ti: “Itedhululeni, oshoka Oshilongo shegulu she ya popepi.”
Jesus ti ithana aayuli yoohi yane
(Mrk. 1:16-20Luk. 5:1-11)18 Jesus sho a li ta kunkula nefuta lyaGalilea, okwa mono ko aamwayinathana yaali, Simon, ngoka i ithanwa Petrus, naAndreas. Oyo ya adhika taa umbile iiyulitho yawo mefuta, oshoka oya li aayuli yoohi. 19 Jesus okwa ti kuyo: “Landulii ndje, ngame otandi mu ningi aayuli yaantu.” 20 Mbalambala oye etha iiyulitho yawo, noye mu landula.
21 Sho a humu ko ishewe, okwa mono ko yalwe yaali aamwayinathana, Jakob naJohannes yaSebedeus. Oyo ya li mowato pamwe nahe taa andeke iiyulitho yawo. Jesus okwe ya ithana. 22 Mbalambala oye etha owato nahe noye mu landula.
Jesus tu uvitha e ta aludha
(Luk. 6:17-19)23 Jesus okwe endagula muGalilea ashihe nokwe ya longo moosinagoga dhawo. Oye oku uvitha elaka etoye lyOshilongo nokwa panga uuvu noshigombo kehe maantu. 24 Okupopiwa kwe okwa taandele muSiria ashihe. Aantu oye eta kuye aavu yomikithi dhi ili nodhi ili nuuwehame kehe: aanampwidhuli, aanashintona naasilombanda, Jesus okwe ya aludha ayehe. 25 Oongundu oonene dhaantu ya zi kuGalilea, Dekapolis, Jerusalem, Judea nokiilongo yahandiyaka yaJordan, oye mu landula.
© Oshindonga Bible © Bible Society of Namibia, 2008.
