Johannes Omushashi
(Mrk. 1:1-18Luk. 3:1-18Joh. 1:19-28)1 Pomasiku ngeyaka Johannes Omushashi okwa holoka noku uvitha mombuga yaJudea 2 a ti: “Itedhululeni, oshoka Oshilongo shegulu she ya popepi.”
3 Johannes oye naanaa ngoka a popiwa komuhunganeki Jesaja, sho ta ti:
“Ewi lyanakwiigidha mombuga tali ti:
‘Longekidhileni Omuwa ondjila,
yelekanitheni omapola ge.’ ”
4 Johannes okwa li a zala onguwo yiifufu yongamelo nepaya lyoshipa mombunda ye. Iikulya ye oya li oombahu nomagadhi goonyushi. 5 Nena aantu ayehe yomuJerusalem noyomuJudea noyomomikunda adhihe dhaJordan oye ya kuye. 6 Oye okwe ya shashele momulonga gwaJordan, sho ya hempulula oondjo dhawo.
7 Ihe Johannes sho a mono aafarisayi naasadukayi oyendji taye ya keshasho, okwa ti kuyo: “Oluvalo lwomayoka ne, olye e mu londodha okuya ontuku egeelo lyaKalunga ndyoka tali ya? 8 Imikeni ano iiyimati mbyoka tayi holola kutya omwi itedhulula. 9 Inamu isimaneka ne yene, mu tye: ‘Tse otu na tate Abraham’, oshoka otandi mu lombwele: Kalunga ota vulu okushitila Abraham aanona momamanya ngaka. 10 Ekuya olya egekwa nokuli pekota lyomuti. Okehe tuu omuti itaagu imi iiyimati iiwanawa, otagu kewa po e tagu umbilwa momulilo. 11 Ongame tandi mu shasha nomeya, mu itedhulule, ihe nakuya konima yandje ngoka e vule ndje oonkondo, oongoka ngame inaandi gwana okuhumbata oongaku dhe, oye te mu shasha nOmbepo Ondjapuki nomulilo. 12 Oye e na oshiyelitho miikaha ye. Oye ota kombo olupale lwe e ta yele. Iilya ote yi pungula miigandhi ye, ihe etutu ote li fike po nomulilo ihaagu dhimi po.” Oye e na oshiyelitho miikaha ye. Oye ota kombo olupale lwe e ta yele.
Jesus ta shashwa
(Mrk. 1:9-11Luk. 3:21-22)13 Jesus okwa zi kuGalilea nokwe ya kuJordan, a shashwe kuJohannes. 14 Ihe Johannes okwa kambadhala oku mu tinda e ta ti: “Ongame nda li ndi na okushashwa kungoye, ihe ngoye oto ya kungame, ndi ku shashe.”
15 Jesus okwe mu yamukula a ti: “Zimina ashike, opo tu gwanithe ashihe shoka Kalunga e shi hala.” Johannes nokwe mu pitika.
16 Jesus sho a shashwa, okwa zi momeya mbalambala. Nena egulu olye eguluka, nokwa mono Ombepo yaKalunga ya kuluka ya fa onguti e tayi mu lambele. 17 Megulu nomwa zi ewi lya ti: “Nguka Omumwandje omuholike nde mu hokwa.”
© Oshindonga Bible © Bible Society of Namibia, 2008.
