Aalongi meyana lyomiviinu
1 “Oshilongo shegulu osha fa omusamane a meneka, a ka kongele eyana lye lyomiviinu aalongi. 2 Sho yu uvathana naalongi oshimaliwa shesiku, okwe ya tumu keyana lye lyomiviinu. 3 Ano sho a piti mo potundi ontimugoyi, okwa mono ko yamwe ya thikama owala pomalandelo. 4 Oye a ti kuyo: ‘Nane wo indeni keyana lyomiviinu, otandi ke mu futa pauyuuki.’ 5 Oyo noya yi. Oye a piti mo ishewe potundi ontimulongo nambali nopontitatu nokwa ningi ngaashi a ningile. 6 Oye a piti mo ishewe potundi ontintano nokwa adhele ko ishewe yamwe ya thikama e ta ti kuyo: ‘Omolwashike mwa thikama owala mpaka esiku alihe?’ 7 Oyo ya ti kuye: ‘Oshoka katu na ngoka e tu hiya.’ Oye a ti kuyo: ‘Nane wo indeni keyana lyandje lyomiviinu.’
8 “Ano sho kwa ningi ongulohi, mwene gweyana lyomiviinu okwa lombwele elenga lye a ti: ‘Ithana aalongi, u ya fute ondjambi yawo. Tameka kumboka yahugunine sigo okumboka yotango.’ 9 Mboka ye ya potundi ontintano, oya pewa kehe gumwe oshimaliwa she. 10 Mbeyaka yotango sho ye ya, oya li ye shi, otaa pewa oshindji shi vule shayakwawo, ihe nayo wo oya pewa ondjambi oyo tuu ndjoka. 11 Sho ye yi pewa, oya tameke okutamaneka mwene gweyana 12 e taa ti: ‘Aahugunini oya longo otundi yimwe ayike, ihe ngoye owe ya yeleke natse mbaka twa longo esiku alihe momutenya omupyu.’
13 “Nena mwene gweyana okwa yamukula gumwe gwomuyo e ta ti: ‘Kuume kandje, inandi ku yuga. Inatu uvathana nani ondjambi oyo tuu ndjono? 14 Kutha po yoye, u ye. Ngame onda hala okupa nguka omuhugunini shi thike pushika shoye. 15 Ondi indikwa nani okuninga ngaashi nda hala niimaliwa yandje? Nenge ou na efupa molwashoka ngame ndi na ohenda?’ ”
16 Jesus nokwa hulitha a ti: “Osho aahugunini otaa ka ninga aatango, naatango otaa ka ninga aahugunina.”
Jesus ta popi ishewe okuhepekwa kwe
(Mrk. 10:32-34Luk. 18:31-34)17 Jesus sho kwa li ta londo ta yi kuJerusalem, okwa kutha aalongwa mboka omulongo nayaali. Manga ya li mondjila, okwe ya lombwele yi ikalela a ti: 18 “Tala, otatu yeni kuJerusalem, hoka Omuna gwOmuntu ta ka gandjwa miikaha yaayambi aakuluntu noyaalongimpango, notaye mu pangulile eso. 19 Oyo otaye ke mu gandja ishewe kaapagani, mboka taye mu sheke e taye mu dhenge notaye mu alele komushigakano, ihe esiku etitatu ota yumudhwa.”
Jesus ta pukulula aalanduli ye
(Mrk. 10:35-45)20 Nena yina yaana yaSebedeus okwe ya kuJesus pamwe noyana mboka nokwa tsu oongolo koshipala she oku mu pula sha.
21 Jesus okwe mu pula a ti: “Owa hala shike?”
Oye a yamukula a ti: “Pitika aamwandje mbaka yaali, ya ka kuutumbe gumwe okolulyo lwoye nomukwawo okolumoho lwoye mOshilongo shoye.”
22 Jesus okwe mu yamukula a ti: “One inamu tseya shoka mwe shi hala. Otamu vulu tuu okunwa oshitenga shoka tandi ke shi nwa?”
Oyo oya ti kuye: “Otatu shi vulu.”
23 Jesus okwa ti kuyo: “Oshitenga shoka otamu ke shi nwa, ihe okukuutumba kolulyo lwandje nenge kolumoho lwandje hangame tandi ku utha, ihe okwaamboka ye ku longekidhilwa kuTate.”
24 Aalongwa mbeyaka omulongo sho ye dhi uvu, oya geyele aamwayinathana mboka yaali. 25 Jesus okwe ya ithana ayehe e ta ti kuyo: “One omu shi shi, aapangeli ohaa lele iigwana, naanenentu ohaye yi pangele pankondo dhawo. 26 Ihe inashi kala ngaaka mokati keni. Ngoka gwomune a hala, a ninge omunene, oye na ninge omuyakuli gweni. 27 Naangoka gwomune a hala, a ninge gwotango, oye na kale omupika gweni. 28 Oshoka nOmuna gwOmuntu ine ya okuyakulwa, ihe okuyakula nokugandja omwenyo gwe, a hupithe oyendji.”
Jesus ta aludha aaposi yaali
(Mrk. 10:46-52Luk. 18:35-43)29 Sho ya zi mo muJeriko, aantu oyendjiyendji oya landula Jesus. 30 Aaposi yaali oya kuutumba mooha dhondjila. Sho yu uvu, Jesus te ende po, oyi igidha mokule ya ti: “Omuwa, Omuna gwaDavid, tu sila ohenda!”
31 Aantu oye ya ganda, ya mwene. Ihe oya dhiginine okwiigidha mokule ya ti: “Omuwa, Omuna gwaDavid, tu sila ohenda!”
32 Jesus okwa thikama nokwe ya ithana e te ya pula: “Omwa hala, ndi mu ningile shike?”
33 Oyo oya ti kuye: “Omuwa, otwa hala, omeho getu ga tonatithwe.”
34 Jesus okwe ya sile ohenda nokwa gumu omeho gawo; mbalambala oya tonata e taye mu landula.
© Oshindonga Bible © Bible Society of Namibia, 2008.
