Jerusalem tashi kondekwa kaatondi
1 Aabenjamin ne, tembukii mo, mu ka holame! Zii mo muJerusalem! Hikeni enkuma muTekoa! Dhikeni endhindhiliko muBetakerem! Oshiponga nehanagulo otali ziilile kuumbangalantu. 2 Oshilando Sion osho opala, ihe otashi ka hanagulwa po. 3 Aakwaniilwa pamwe nomatangakwiita gawo otaa ka yungila ko oontanda. Taa dhike omatsali gawo ya kunduka oshilando, noshaa ngoka ote li dhike mpoka a hala. 4 Otaa ka tya: “Ilongekidheni, mu ponokele Jerusalem! Langeleni komauta! Tu shi matukileni moshanga shomutenya!” Ihe otaa ti ishewe: “Okwa fa kwa toko, etango lya peguka, omizile dha ningi omile. 5 Thikameni utale tu shi ponokele uusiku; tu kumunii po omankolokuma goshilando.”
6 Omuwa, Omunankondoawike okwa lombwele aakwaniilwa mbaka ya ke po omiti noya tungile Jerusalem omutuni gwekondekela. Okwa ti: “Otandi geele oshilando shika, oshoka oshu udha uukolokoshi. 7 Otashi zi uuwinayi sha fa omuthima tagu vile omeya. Ondu uvite omayugathano nomahanagulo moshilando nondi wete mo ashike uuwehame niilalo. 8 Aajerusalem ne, uudhigu mbuka nau kale elondodho kune; ngele hasho, otandi mu thigi po; oshilando sheni otandi shi shitukitha ombuga, ehala lyaa na aantu.”
9 Omuwa Omunankondoawike ota ti: “Israel ota ka toononwa thilu a fa omuviinu gwa kekwa omahila agehegehe. Osho u na okumangulula shaa ngoka, manga ku na ethimbo.”
10 Onda yamukula: “Olye ta pulakene ndje, sho te popi ndi ya londodhe? Oya tangalala notaa tindi okupulakena elaka lyoye; otaa yolo shoka to lombwele ndje ndi shi tye. 11 Omuwa, ondjahi yoku ya geela otayi lilima mungame wo; itandi vulu oku yi idhidhimikila.”
Omuwa okwa ti kungame: “Yi tilila maanona ye li momapandaanda nomaalumentu aagundjuka ya gongala pamwe; maasamane nomaakulukadhi ongashikwawo; nando oya kulupa, itaa hupu ko. 12 Omagumbo gawo otaga ka gandjwa po kuyalwe, nosho wo omapya gawo naakiintu yawo. Otandi ka geela aantu yoshilongo shika. 13 Ayehe, aagundjuka naakuluntu, oye hole eliko lyiifundja. Nokuli aahunganeki naayambi otaa kotokele aantu. 14 Iilalo yaantu yandje otaa hala oku yi panga taa ti: ‘Oku na ombili,’ ko kwaa na nando ombili. 15 Oya li tuu ya sa ohoni, sho ya longo iihuna mbika? Aawoo, inaa sa nando ohoni; inaa tseya nokuli shoka tayi ti. Otaa ka nganyukila po pamwe naambeyaka yalwe ya pundukila po nale; sho tandi ya geele, otali ka ninga ehulilo lyawo. Ongame Omuwa nda popi.”
Israel te ekelehi ondjila yOmuwa
16 Omuwa ota ti: “Ka thikameni poompagiila mu tale. Puleni omapola goshitonale, puleni ondjila ombwanawa mu ende mo notamu kala nombili.”
Ihe oya ti: “Itatu ende mo.” 17 Omuwa okwa langeke aalangeli ya pulakene elondodho lyenkuma. Ihe oya ti: “Itatu pulakene.”
18 Onkee ano Omuwa okwa ti: “Pulakeneni, ne iigwana, konekeni shoka tashi ka ningilwa aantu yandje. 19 Ngoye evi, pulakena! Aantu mbaka otandi ya undulile oshiponga, iiyimati yiineya yawo, oshoka inaa pulakena oohapu dhandje. 20 Ondi na shike niitsinino taye yi eta tayi zi kuSheba nenge iizimba tayi zi koshilongo shokokule? Itandi ka taamba nando omafikilondjambo gawo nenge ndi mbilipalithwe koontselelandjambo dhawo. 21 Otandi ka teleganitha aantu mbaka e taa punduka. Oohe noyanamati otaa ka sa, nosho tashi ningilwa ookuume naashiinda.”
Ehomono tali zi kuumbangalantu
22 Omuwa ota ti: “Aantu otaa ya taa zi koshilongo shokuumbangalantu; oshigwana oshinankondo tashi zi kokule, oshi ilongekidhila olugodhi. 23 Oye na omatati nomagonga; oyo aageyentu ye na onyanya. Otaa kugu ya fa efuta tali pupu, sho ya kayila uukambe wawo. Oyi ilongekidhila olugodhi ya kondjithe Sion.”
24 Aajerusalem oya ti: “Otu uvu onkundana, nomaako getu oga lemanekwa; otwa kwatwa kehaluko nokuuwehame twa fa omukiintu e na oshitheta. 25 Inamu pita mo, mu ye komapya nenge mu ka ende momapola, oshoka omutondi oku na egongamwele, naakuhe oku na iihuna yowala.”
26 Omuwa ota ti: “Aantu yandje ne, zaleni omahahi ne mu gwaye omutoko. Lileni omahodhi omapyu mwa fa tamu lili omumati epona, oshoka ngoka te ya e mu hanagule po, ota homona mbala. 27 Jeremia, onde ku langeke u ninge omuyeleki gwaantu yandje; ya yeleka nokukonakona iikala yawo. 28 Oyo ayehe aanamanganga, aakukutu ya fa osheela oshikushu nosheela oshiluudhe. Oyo ayehe yo ola, taye endagula taa popi oluhoko. 29 Omupepo otagu pepele, ihe osheela itashi hemuka shi ze omange. Itashi kwatha sha, aantu yandje ya yelithwe, oshoka mboka haa longo uuwinayi, inaa kuthwa mo. 30 Otaa ka lukwa omange, uutale waa na oshilonga, oshoka ongame Omuwa nde ya ekelehi.”
© Oshindonga Bible © Bible Society of Namibia, 2008.
