Aantu taa pula Jeremia e ya galikanene
1 Oondjayi dhiita adhihe, mwa kwatelelwa Johanan yaKarea naAzaria yaHeshaia, odhe ya naantu ayehe okuza kaanona sigo aakuluntu 2 e taa lombwele ndje taa ti: “Tu kwatha u tu ningile shoka tatu ku pula! Tu galikanena kOmuwa Kalunga ketu. Tu galikanena atuhe twa hupu ko. Otwa li oyendji, ihe ngashingeyi otse aashona yowala, ngaashi u shi wete. 3 Tu galikanena, opo Omuwa Kalunga ketu e tu ulukile ondjila tu na okweenda nayo naashoka tu na okuninga.”
4 Onda yamukula nda ti: “Eewa, onawa! Otandi galikana Omuwa Kalunga ketu, naanaa ngaashi mwe shi pula, noshaa shoka ta ti, otandi shi mu lombwele. Itandi ke mu holeka nando osha.”
5 Oya ti kungame: “Omuwa oye na ninge onzapo yetu yashili noyi shi kwiinekelwa, ngele itatu ka vulika koohapu adhihe ndhoka Omuwa Kalunga ketu te dhi tu tumine. 6 Ngele otadhi tu opalele nenge aawe, otatu ka vulika kOmuwa Kalunga ketu, kungoka tatu indile, u tu galikanene. Otatu ka kala nawa, ngele otatu vulika kuye.”
Omuwa ta yamukula Jeremia
7 Sho pwa piti omasiku omulongo, Omuwa okwa lombwele ndje, 8 ndi ithane Johanan noondjayi adhihe dhiita ndhoka dha li puye, dhi gongale naantu ayehe. 9 Onde ya lombwele nda ti: “Omuwa, Kalunga kaIsrael, ngoka mwa tumine ndje kuye, ndi mu pule, okwa ti: 10 ‘Ngele otamu kala mevi ndika, otandi ke mu tungulula po noitandi mu kumuna po. Otandi ke mu tsika, itandi mu tudha mo. Ehanagulo ndyoka nde li mu undulile, olya sitha ndje oluhodhi. 11 Etheni okutila omukwaniilwa gwaBabilon. Ondi li pamwe nane, notandi mu mangulula miikaha ye. 12 Oshoka ngame omunamutimahenda, otandi mu longo oku mu sila ohenda, e mu pitikile okushuna komagumbo. Ongame, Omuwa, nda popi.’
13-15 “Ihe aantu ne mboka mwa thigalele muJuda, omu na okuvulika kOmuwa Kalunga keni. Inamu tinda okukala mevi ndika. Inamu tya: ‘Aawe, otatu yi tu ka kale muEgipiti, moka itatu ka tsakaneka we iita nenge tu uve onkugo yolugodhi nenge tu se po kondjala.’ Ngele otamu popi ngaaka, nena Omuwa Omunankondoawike, Kalunga kaIsrael, ota ti: ‘Ngele otamu tokola oku ka kala muEgipiti, 16 nena iita tuu mbyoka mwe yi tila, otayi ke mu adha ko, nondjala ndjoka ye mu mbandameke, otayi mu landulile ko, notamu ka sila kuEgipiti. 17 Aantu ayehe mboka taa tokola oku ka kala muEgipiti, otaa ka sa kiita nenge kondjala nenge kelega. Kape na nando ogumwe ta ka hupa ko, kape na nando ogumwe ta ka hunuka koshiponga shoka tandi shi ya undulile.’
18 “Omuwa, Kalunga kaIsrael, ota ti: ‘Ngashika naanaa ongeyo nuupyundjahi wandje wa tilililwe Aajerusalem, osho ongeyo yandje tayi ka tililwa mune, ngele otamu yi kuEgipiti. Otamu ka ninga ehalutho; aantu otaye ke mu dhina notaa tumbula edhina lyeni, nge taa tukana. Ehala ndika itamu ke li mona we.’ ”
19 Onda tsikile ko nda ti: “Omuwa okwe mu lombwele, ne aantu mboka mwa hupile muJuda, mwaa ye kuEgipiti. Onkee tandi mu londodha ngashingeyi 20 kutya ne otamu ningi epuko enene. One mwi indile ndje, ndi mu galikanene kOmuwa Kalunga keni, nomwa uvaneke kutya otamu ka ninga ashihe shoka te mu lombwele. 21 Ngashingeyi onde mu lombwele, ihe ne otamu ekelehi ayihe mbyoka Omuwa Kalunga keni a tumu ndje, ndi yi mu lombwele. 22 Kaleni ano mu shi shi kutya otamu ka sila miita nenge mu se po kondjala nenge kelega moshilongo tuu shoka mwa hala mu ka kale mo.”
© Oshindonga Bible © Bible Society of Namibia, 2008.
