JEREMIA 39 - Oshindonga Bible (ONDB)

Jerusalem tashi teka po

1 Momwedhi omutimulongo gwomumvo omutimugoyi Sedekia sho a li omukwaniilwa gwaJuda, Nebukadnezzar, omukwaniilwa gwaBabilon, okwe ya netangakwiita lye alihe e ta ponokele Jerusalem. 2 Mesiku etimugoyi lyomwedhi omutine gwomumvo gwaSedekia omutimulongo nagumwe, medhingililokuma lyoshilando omwa tsuwa oombululu.

3 (Jerusalem sho sha kwatwa po, omalenga agehe omanene gomukwaniilwa gwaBabilonia oge ya e taga kala pOsheelo shopokati, mu na Nergal Sareser, Samgar Nebo, Sarsekim naNergal Sareser gulwe.)

4 Omukwaniilwa Sedekia naakwiita ye ayehe sho ye shi mono, oya kambadhala ya gwaye mo uusiku ya ye ontuku. Oye ende nondjila tayi uka koshikunino shuuwa, oya pitile mosheelo shi li pokati komadhingililokuma gaali noya yi yu uka lwokesilu lyaJordan. 5 Ihe etangakwiita lyaBabilonia olye ya landula e tali kwatele Sedekia polushandja lu li popepi naJeriko. Oye mu fala komukwaniilwa Nebukadnezzar kuRibla moshikandjo Hamat, noko nkoka Nebukadnezzar e mu pangula. 6 Okwa dhipagitha aana yaSedekia montaneho yaSedekia, okwa dhipagitha wo omalenga omakuluntu gaJuda. 7 Konima yaambika okwa tsipulitha mo omeho gaSedekia e te mu tula momalyenge nokufalwa kuBabilon. 8 Aababilonia oya fike po uuwa nomagumbo gaantu noya kumuna po omadhingililokuma gaJerusalem. 9 Hugunina Nebusaradan, elenga ekuluntu lyaalangeli, okwa kwata po aantu mboka ya li ya hupile moshilando nokwe ya fala oonkwatwa kuBabilon, pamwe naamboka ya adhikile yi igandja kuye. 10 Ihe oohepele dhomoshigwana ndhoka dha li dhaa na sha, Nebusaradan okwe dhi thigi muJuda e te dhi pe iitsambe yomiviinu nomapya.

Jeremia ta mangululwa

11 Omukwaniilwa Nebukadnezzar okwa lombwele elenga ekuluntu lyaalangeli Nebusaradan a ti: 12 “Inda u ka konge Jeremia, u mu sile oshimpwiyu. Ino mu ehameka tuu, ihe mu ningila shoka a hala.” 13 Nebusaradan, pamwe nomalenga omakuluntu ooNebushashan naNergal Sareser nomalenga galwe gomukwaniilwa gwaBabilon, 14 oya kutha ndje molugumbo lwomalangelo. Oya tula ndje moshimpwiyu shaGedalia yaAhikam, omutekulu gwaShafan, ngoka a li e na okuthindikila ndje sigo okegumbo. Osho ngaaka nda thigala mokati koshigwana.

Etegameno lyaEbedmelek

15 Manga nda li molugumbo lwomalangelo, Omuwa okwa lombwele ndje, 16 ndi lombwele Omuetiopia Ebedmelek kutya Omuwa Omunankondoawike, Kalunga kaIsrael, okwa ti: “Otandi ningi shili ngaashi nda ti, otandi ka hanagula po oshilando shika, itashi kala shi na elago. Ihe shika nge tashi ningwa, oto ke shi tala nkene tashi ningwa. 17 Ihe ngame, Omuwa, otandi ke ku gamena, noito ka gandjwa miikaha yaantu mboka wa tila. 18 Otandi ke ku gamena, noito ka dhipagwa nando. Oto ka fadhuka po u na omwenyo, oshoka owi inekela ndje. Ongame, Omuwa, nda popi.”