Kalunga ta sile Israel oshimpwiyu
1 Omuwa okwa lombwele ndje, 2 ndi ka uvithile aantu ayehe muJerusalem kutya Omuwa ota ti ngeyi:
“Otandi dhimbulukwa eopalo lyuugundjuka woye,
ohole yoye momasiku guufuko woye,
nkene wa landula ndje mombuga,
montale moka ihaamu kunwa.
3 Israel, ngoye ogwandjelela,
ngoye eliko lyandje eyapuki.
Ayehe mboka ye ku ningi nayi,
oyi ipetha ombedhi noya adhika koshiponga.
Ongame, Omuwa, nda popi.”
Okuyona kwoohekulu yaIsrael
4 Uveni oohapu dhOmuwa, ne oluvalo lwaJakob, ne omazimo agehe gaIsrael.
5 Omuwa ota ti:
“Oohokulu oya mwene ndje ombedhi yashike?
Oshike she ya pilamenitha ndje?
Oya ka simaneka iimenka yaa na omwago,
noyo yene ya ningi aanima yowala.
6 Inaa kala ye na ko nasha nangame,
nando onde ya hupitha muEgipiti
nonde ya pandakanitha ombuga,
eha lyoontale nolyomakolombongo,
evi lya kalanda lya nika iiponga,
moka mwaa na nando olye,
nokaku na ngoka he li tokola ando.
7 Onde ya eta mevi lyo ondoka,
opo ya nyanyukilwe eteyo lyalyo nuuwanawa walyo wulwe.
Ihe oya shundula evi lyandje
noya nyateke oshilongo nde shi ya pe.
8 Aayambi inaa pula ya tye: ‘Omuwa oku li peni?’
Aayambi yandje mwene oya ningi kaaye shi ndje.
Aaleli oya tsu ondumbo nangame;
aahunganeki oyu uvitha medhina lyaBaal
noya longele iimenka yaa na omwago.”
Omuwa ta tamaneke aantu ye
9 “Onkee ano ngame Omuwa
tandi tamaneke aantu yandje,
notandi ka tamaneka aatekulu yawo.
10 Indeni kuuninginino kontuntu Kipro,
ne mu tume yamwe lwokuuzilo koshilongo Kedar.
Otamu ka mona kutya
kaku na nando osha sha fa mbika sha ningilwe nale.
11 Kaku na oshigwana shilwe sha pingakanithile ookalunga yasho,
nando yo yene kaye shi ookalunga.
Ihe aantu yandje oya pingakanitha ndje po,
Kalunga ngoka e ya simanekitha.
Oya pingakanitha ndje naashoka kaashi na ekwatho.
12 Onda lombwele eyalelo, li tale nuugelele
noli kumwe tali zi omahwilili.
13 Oshoka aantu yandje oya yono paali:
Oya pilamene ndje, othithiya yomeya omanamwenyo,
noyi ihupile omithima dhawo yene,
omithima dhiipopo, ndhoka itaadhi vulu okukala nomeya.”
Uuhethi waIsrael
14 “Israel ke shi omupika;
ina valelwa nando omuupika.
Omolwashike ano a ningi oshihakanwa shaatondi?
15 Oye mu gonene ya fa oonime;
oya mbugaleke oshilongo she,
niilando ye oya kumunwa po.
Oya thigwa po owala.
16 Eeno, aalumentu yokuMemfis naTakpanhes
oya kunya omutse gwe gu ninge ongwala.
17 Israel, ongoye mwene we shi iyetele!
Owe etha ndje, Omuwa Kalunga koye,
sho nda li tandi ku enditha nondjila.
18 Omolwashike to yi kuEgipiti,
u ka nwe omeya gaNiili?
Omolwashike to yi kuAssur,
u ka nwe omeya gaEufrat?
19 Uuwinayi woye mwene otau ku pangula,
nokupilamena ndje kwoye otaku ku tokola.
Oto ka koneka, nkene sha puka noshilulululu,
sho we etha ndje, Omuwa Kalunga koye,
noino inekela ndje we nando.
Ongame, Omupangeliawike Omuwa Omunankondoawike, nda popi.”
Israel ta tindi okulongela Omuwa
20 Omuwa Omupangeliawike ota ti:
“Israel, owe ekelehi ndje nalenale;
owa tindi okuvulika kungame nokulongela ndje.
Owa longele iikalunga yoluvalo koondundu adhihe oondeendeka
nomomizile dhomiti adhihe omitalala.
21 Onde ku tsike ngaashi omuviinu gwa hogololwa,
ombuto ya hogololekeka.
Ihe tala utale, nkene wa tya!
Owa fa omuviinu gwaa na oshilonga nogwo ola.
22 Nando u iyoge nomeya gomutoko
nenge nothewa yekoha,
ondi wete natango oontongo dhoondjo dhoye.
23 Oto vulu ngiini okutya ino inyateka,
nokutya ino longela Baal?
Tala, nkene wa yono molusilu;
tala shoka wa ningi.
Owa fa ongamelo ongundjuka ya nikula,
notayi pwampwauka yu uka huka naahwiyaka,
24 tayi tondauka nombuga.
Ngele ya nikula, olye ta vulu oku yi pangela?
Ondumentu ndjoka ye yi hala,
itayi pumbwa okwiivulitha;
otayi monika nuupu pethimbo lyenikulo.
25 Israel, ino matuka, sigo oompadhi dhoye dha kala owala,
nomuligu gwoye tagu kukuta kokulandula iikalunga.
Ihe oto ti: ‘Aawe! Ite vulu okushuna.
Ondi hole iikalunga iikwiilongo notandi yi landula.’ ”
Israel okwi ilongele okugeelwa
26 Omuwa ota ti: “Aaisraeli ne, otamu ka sithwa ohoni ngashika omufuthi ngoka a adhikilila. Aakwaniilwa, omalenga, aayambi naahunganeki yeni otaa ka sithwa ohoni. 27 Amuhe mboka tamu ti, omuti ogwo ho nemanya olyo nyoko, otamu ka sithwa ohoni, oshoka omwa pilamene ndje peha lyokugalukila kungame. Ihe uuna tamu adhika kuudhigu, otamu ithana ndje ndi ye oku mu hupitha.
28 “Iikalunga mbyoka wi ihambulile, oyi li peni? Nayi ku hupithe, sho wa adhika kuudhigu — ngele otayi shi vulu! Juda, omwaalu gwiikalunga yoye ogu thike pamwe nomwaalu gwiilando yoye. 29 Oto tamananene shike? Omolwashike wa tsu ondumbo nangame? 30 Onde ku geele, ihe inashi eta uuwanawa. Ino pitika, ndi ku tule mondjila. Aahunganeki yoye owe ya dhipaga wa fa onime ya pindjala. 31 Aaisraeli ne, pulakeneni shoka tandi popi. Kune ano onda fa ombuga, onda fa oshilongo shomilema shi na iiponga? Omolwashike ano tamu ti, otamu ningi shoka mwa hala noitamu galukile we kungame? 32 Omukadhona oha dhimbwa tuu uulenga we nomufuko ofeyi ye? Ihe aantu yandje oya dhimbwa ndje omasiku ogendji gaa shi kuyalulwa. 33 Ku na uudhigu washa okumona ondjila, ngele oto kongo aaholi yiipala. Eeno, nuuwinayi womukiintu otau konekwa mungoye. 34 Oonguwo dhoye odha nyata kombinzi yoohepele naakaanandjo, hakombinzi yaakolokoshi.
“Onkene tuu 35 oto ti: ‘Kandi na ondjo; oshili, Omuwa ina geela ndje.’ Ihe ngame, Omuwa, otandi ke ku geela, molwashoka wa tindi okuzimina kutya ou na ondjo. 36 Owi iningi gwowala, sho wi igameke kiikalunga yiigwana yilwe. Oto ka sithwa ohoni kuEgipiti, naanaa ngaashi wa ningilwe kuAssur. 37 Naankoka oto ka za ko wi ikwata ombandamutse, molwashoka Omuwa okwe ekelehi mboka wa li wi inekela, noito ka kwathwa kuyo.”
© Oshindonga Bible © Bible Society of Namibia, 2008.
