Yaye ne Aajuda
1 Omuwa okwa lombwele ndje a ti: “Nando oMoses naSamuel ya thikame koshipala shandje ya galikanene aantu mbaka, itandi ya sile nando ohenda. Naa ze po, naa ze koshipala shandje. 2 Ngele taye ku pula taa ti: ‘Otatu yi peni?’ Ya lombwela etokolo lyandje ndika: mboka yu uthilwa elega, otaa yi ya ka se kelega; mboka yu uthilwa egongamwele, otaa yi ya ka dhipagwe; mboka yu uthilwa ondjala, otaa yi ya ka se kondjala; naamboka yu uthilwa okukwatwa, otaa yi muupongekwa. 3 Ongame, Omuwa, nda tokola ndi ya undulile iiponga yopane: otaa ka dhipagelwa miita; omidhimba dhawo otadhi ka kookololwa koombwa; otadhi ka lika po koondhila; iithitukuti otayi ka mana po shoka sha hupu ko. 4 Otandi ya ningi oshinyanyalithi kiilongo ayihe muuyuni omolwiihuna mbyoka Manasse gaHiskia, omukwaniilwa gwaJuda, a longo muJerusalem.”
5 Omuwa ota ti:
“Aajerusalem ne,
olye te ke mu sila ohenda,
nolye ngoka te ke mu nikila uuthigwa?
Olye ta ka myauka po oku mu pula sho mu li po?
6 Ne omwe ekelehi ndje;
ne omwa pilamene ndje.
Otandi taganeke omaako gandje e tandi mu nyanyagula.
Onda vulwa okuloteka ondjahi yandje.
7 Moshilando kehe otandi ke mu umbila mombepo mwa fa etutu.
Otandi mu hanagula po, ne aantu yandje.
Otandi dhipaga aana yeni, oshoka inamu etha oondjila dheni oombwinayi.
8 Moshilongo sheni otamu ka kala aaselekadhi oyendji
ye vule ehekevi mooha dhefuta.
Aalumentu yeni aagundjuka otandi ya dhipagitha po inaa koka,
notashi lilitha ooyina omahodhi omapyu.
Ohaluka yowala tandi ya gwilike uuwehame nehaluka.
9 Omukiintu ngoka a kanitha oyana yaheyali,
ota yi oshitelele e ta fudha mo omwenyo gwe.
Etango lye olya ningine mokati komutenya;
okwa adhika komupya nokwa sithwa ohoni.
One mboka tamu hupu ko,
otandi mu dhipagitha kaatondi yeni.
Ongame, Omuwa, nda popi.”
Jeremia ta nyenyetele Omuwa
10 Yaye ngame, meme sho wa vala ndje, ndi ninge omulumentu gwomaludhi nogwondumbo moshilongo ashihe! Inandi lila omuntu ongunga nenge ndi lilwe ongunga komuntu, ihe ayehe otaa tuku ndje. 11 Omuwa okwa ti: “Oshili, otandi ku mangulula molwelalakano ewanawa; oshili, aatondi yoye otandi ye ku galikanitha mesiku lyoshiponga nomesiku lyuudhigu. 12 (Oku na tuu omuntu ta vulu okuteya osheela, unene osheela sha yaminwa mumwe nuutale woshikushu shokuumbangalantu?)”
13 Omuwa okwa lombwele ndje a ti: “Otandi ka tuma aatondi ya kuthe po uuyamba nomaliko gaantu yandje, opo ndi ya geelele uulunde mboka ya longo moshilongo ashihe. 14 Otandi ke ya longithitha ya longele aatondi yawo moshilongo inaaye shi tseya shito, oshoka ondjahi yandje oya fa omulilo, notayi kala ya hwama sigo aluhe.”
15 Onda popi nda ti: “Omuwa, ou uvite ko. Dhimbulukwa ndje, u kwathe ndje. Galulila aatidhagani yandje uuwinayi. Ino ya idhidhimikila, sigo ya dhipaga ndje. Dhimbulukwa kutya ngame onda shekwa omolwoye. 16 Owa lombwele ndje, nonda pulakene ohapu kehe. Ngame ogwoye, Omuwa Omunankondoawike, nomolwashoka oohapu dhoye dhu udhitha omwenyo gwandje enyanyu nelago. 17 Inandi hepitha ethimbo lyandje paantu yalwe, mokuyola nomokunyanyukwa. Onda vulika komalombwelo goye, ondi ikalele nonda li mondjahi.
18 “Omolwashike tandi hepekwa? Omolwashike iilalo yandje ya nyengathana okwaaludhwa? Oshike itaayi aluka? Owa hala okufundjaleka ndje ngaashi omulonga tagu pwine mothinge?”
19 Omuwa okwa yamukula ta ti: “Ngele to itedhulula, otandi ku galula, noto ka ninga ishewe omupiya gwandje. Peha lyokupopya iinima yowala ngele to uvitha elaka lyomungunda, oto ka ninga ishewe omuhunganeki. Oshigwana otashi ya kungoye, noito pumbwa okuya kusho. 20 Otandi ku ningi ekuma lyoshikushu okukondjitha oshigwana shika. Otashi ke ku kondjitha, ihe itashi ku sindi, oshoka otandi kala pamwe nangoye. Otandi ku gamene notandi ku hupitha. 21 Otandi ku yugulula miikaha yaakolokoshi noyaananyanya. Ongame, Omuwa, nda popi.”
© Oshindonga Bible © Bible Society of Namibia, 2008.
