1 Ndhika oohapu dhaJeremia yaHilkia, gumwe gwomaayambi yokuAnatot mOshikandjo shaBenjamin. 2 Oohapu dhOmuwa odha adha Jeremia momumvo omutimulongo nomutitatu gwepangelo lyaJosia yaAmmon, omukwaniilwa gwaJuda, 3 niishewe muuyuni waJehoiakim yaJosia, omukwaniilwa gwaJuda, sigo omomwedhi omutitano gwomomumvo omutimulongo nagumwe gwepangelo lyaSedekia yaJosia, omukwaniilwa gwaJuda, uuna Aajerusalem ya falwa muupongekwa.
Eithano lyaJeremia
4 Omuwa okwa lombwele ndje a ti: 5 “Onde ku hogolola, manga inaandi ku shitila moshivalelo shanyoko, nomanga inoo valwa, onde ku yapula nonde ku lenge omuhunganeki gwiigwana.”
6 Onda yamukula nda ti: “Omuwa Omupangeliawike, kandi shi okupopya, oshoka ngame omunona.”
7 Ihe Omuwa okwa lombwele ndje a ti: “Ino tya, ngoye omunona; inda kaantu mboka tandi ku tumu kuyo, ngoye u ya lombwele ashihe tandi shi ku lombwele, u shi popye. 8 Ino ya tila, oshoka ondi li pungoye notandi ku gamene. Ongame Omuwa nda popi!”
9 Omuwa okwa ganeke oshikaha she ta gumu omilungu dhandje e ta lombwele ndje ta ti: “Tala, otandi tula oohapu dhandje mokana koye. 10 Otandi ku lenge u vule iigwana niilongo, opo u dhikule nokuhalakanitha, u hanagule nokuhata pevi nou tungulule nokutsika.”
Omamoniko gaali
11 Omuwa okwa pula ndje a ti: “Jeremia, ou wete shike?”
Onda yamukula: “Ondi wete oshitayi shomuti omumandeli.”
12 Omuwa okwa ti: “Ou li mondjila, otandi tonata ndi tale oohapu dhandje dhi tsakanithwe.”
13 Omuwa okwa pula ndje ishewe a ti: “Ou wete shike?”
Onda yamukula: “Ondi wete ombiga yi li kuumbangalantu, tayi fuluka, ye endamena kuumbangalantu.”
14 Omuwa okwa ti kungame: “Kuumbangalantu okwo taku zi oshiponga shoka tashi ka adha oonakukala moshilongo, 15 oshoka otandi ithana iigwana ayihe yokuumbangalantu yi ye. Aakwaniilwa yayo otaa ka tula iipangelapundi yawo pomiyelo dhaJerusalem nokukunduka omankolo gasho nokukunduka wo iilando yilwe yaJuda. 16 Otandi ka geela aantu yandje, oshoka oya yono, oye etha ndje, oya yambele iikalunga iikwiilongo noya hambula iimenka e taye yi longele. 17 Jeremia, ilongekidha, u ye u ka lombwele aantu ayihe mbyoka nde ku lombwele u yi ya lombwele. Ino ya tila, opo ndaaye ku tule uumbanda, ngele to kala puyo. 18 Nena ndjika otandi ku ningi oshilando sha kola, ongundhi yosheela nekuma lyoshikushu okukondjitha oshilongo ashihe, aakwaniilwa yaJuda, omalenga, naayambi. Aantu yomoshilongo 19 otaye ke ku kondjitha, ihe itaye ku sindi, oshoka ondi li pamwe nangoye notandi ku hupitha. Ongame Omuwa nda popi.”
© Oshindonga Bible © Bible Society of Namibia, 2008.
