Okuvalwa kwaSimson
1 Aaisraeli oya yono ishewe kOmuwa, oye nokwe ya gandja miikaha yAafilisti, ye ya pangele omimvo omilongo ne.
2 Pethimbo ndyoka opwa li omulumentu, edhina lye Manoak, gwokoshilongo Soar. Okwa li gwomezimo lyaDan. Omukadhi okwa li ihaa mono uunona. 3 Omuyengeli gwOmuwa okwe mu holokele nokwa ti kuye: “Sigo ongashingeyi ino mona uunona, ihe oto ka kala metegelelo, u vale omumati. 4 Kotoka, waa nwe nando omaviinu nenge omalovu, ngoye waa lye iikulya yi indikwa. 5 Omunona ngele a valwa, ino kulula ko omafufu ge, oshoka okuza kevalo lye ota ka kala omunasiri, a yoololelwa Kalunga. Oye ta ka mangulula Israel miikaha yAafilisti.”
6 Omukulukadhi okwa yi e te shi lombwele omulumentu gwe ta ti: “Omuntu gwaKalunga okwi ile kungame; okwa li omutilithi a fa omuyengeli gwaKalunga. Inandi mu pula nando mpoka a zi, ye ina lombwela ndje nando edhina lye. 7 Ihe okwa lombwele ndje kutya otandi ka kala metegelelo e tii ka vala okamati. Okwa lombwele ndje, ndaa nwe omaviinu nenge omalovu, nenge okulya iikulya yi indikwa, oshoka omumati ota ka kala omunasiri, a yoololelwa Kalunga sigo okesiku lyeso lye.”
8 Nena Manoak okwa galikana Omuwa a ti: “Omuwa, tumununa omuntu gwaKalunga kutse, opo e tu lombwele kutya okamati otatu ka ningi ngiini, nge ka valwa.”
9 Kalunga okwa ningi, ngaashi Manoak a pula. Omuyengeli gwe okwa galukile komukiintu, manga a li omutumba mepya. Omulumentu gwe Manoak ka li puye. 10 Omukadhi okwe ke mu lombwela e ta ti: “Tala! Omulumentu ngoka i ile kungame uunambo, okwe ya ishewe kungame.”
11 Manoak okwa thikama e ta landula omukadhi. Okwa yi komulumentu ngoka e ta ti: “Ongoye tuu omulumentu ngoka a li ta popi namukadhandje?”
Okwa yamukula a ti: “Eeno.”
12 Nena Manoak okwe mu pula: “Ngele oohapu dhoye dha tsakanithwa, omumati oku na okuninga shike? Ota putudhwa ngiini?”
13 Omuyengeli okwa yamukula: “Mukadhoye na dhimbulukwe ayihe mbyoka nde mu hokololele. 14 Na kale itaa li sha shoka hashi zi momandjembele; ke na okunwa omaviinu nenge omalovu, nenge okulya iikulya yi indikwa. Na gwanithe ashihe shoka nde mu lombwele.”
15-16 Manoak ina tseya nando kutya oye omuyengeli gwOmuwa. Onkee okwa ti kuye: “Kwatha ndje alikana, waa ye manga. Tu pitika, tu ku telekele onyama yonkombwena.”
Ihe omuyengeli okwa ti: “Nando ondi kale mpaka, itandi ka lya oondya dhoye. Ihe ngele wa hala, u dhi longekidhe, dhi fikila Omuwa omayambo.”
17 Manoak okwa yamukula: “Tu lombwela edhina lyoye, opo tu ku simaneke, uuna oohapu dhoye tadhi ka tsakanithwa.”
18 Omuyengeli okwa pula: “Omolwashike mwa hala okutseya edhina lyandje? Edhina lyandje eholekwa.”
19 Manoak okwa kutha onkombwena niilya iishona, noposhiyambelo shemanya okwe yi yambele Omuwa ngoka ha ningi iikumithalonga.
20-21 Omulilo manga tagu lilima poshiyambelo, Manoak nomukadhi oya mono omuyengeli gwOmuwa ta yelukile kegulu momalaka gomulilo. Manoak okwa dhimbulula nduno kutya nani omulumentu oye omuyengeli gwOmuwa, oye nomukadhi oya tsu iipala yawo pevi. Inaa mona we omuyengeli.
22 Manoak okwa ti komukadhi: “Otu shi kutya tse oyokusa naanaa, oshoka otwa mono Kalunga.”
23 Ihe omukadhi okwa yamukula a ti: “Ando Omuwa a li a hala oku tu dhipaga, ando ina taamba omayambo getu; ando ine tu ulukila ayihe mbika nenge ando nena ine tu hokololela iinima ya tya ngeika.”
24 Omukulukadhi okwa pulumutha okamati noye ka luku Simson. Okanona oka koko, Omuwa nokwe ka laleke nuuyamba. 25 Oonkondo dhOmuwa nodha tameke oku mu koleka, manga a li pokati kaSoar naEshtaol montanda yaDan.
© Oshindonga Bible © Bible Society of Namibia, 2008.
