AATOKOLIHAPU 11 - Oshindonga Bible (ONDB)

1 Jefta, omukwiita ofule gwokuGilead, okwa li omuna gwohonda. He Gilead 2 okwa li e na oyana yalwe nomukadhi. Sho ya koko, oya tidha po Jefta noya ti kuye: “Ito ka thigulula nando osha putate, oshoka nyoko okwi ili.” 3 Jefta okwa yi ontuku yaamwahe e ta ka kala mevi lyaTob. Okwi ihilile ongundu yaantu yaamakaha noye ende ye mu tula mokakuwilili.

4 Konima yethimbo Aayammoni oya hingile Aaisraeli iita. 5 Shika sho sha ningwa, aawiliki yaGilead oya ka tala Jefta kevi lyaTob. 6 Oya ti: “Ila, u tu wilike, opo tu kondjithe Aayammoni.”

7 Ihe Jefta okwa yamukula: “Ne omwa tondo ndje nayi, sigo mwa tidha ndje maandjatate. Omolwashike tamu ya kungame ngashingeyi, sho mwa adhika kuudhigu?”

8 Oya ti kuye: “Otwi igameke kungoye, oshoka otwa hala, tu ye nangoye, tu ka kondjithe Aayammoni, ngoye u wilike aantu ayehe muGilead.”

9 Jefta okwa ti kuyo: “Ngele otamu galulile ndje kegumbo, ndi kondjithe Aayammoni, nOmuwa ta pe ndje esindano, nena otii ka ninga omuleli gweni.” 10 Oya yamukula: “Otwa zimine. Omuwa oye onzapo yetu.” 11 Osho ngaaka Jefta a yi naawiliki yaGilead, naantu oye mu ningi omuleli nomuwiliki gwawo. Koshipala shOmuwa muMispa Jefta okwe endulula oohapu dhe adhihe e dhi popi naawiliki.

12 Nena Jefta okwa tumu aatumwa komukwaniilwa gwaAmmon nelaka tali ti: “Oshike to tamanana natse? Omolwashike to matukile oshilongo shetu?” 13 Omukwaniilwa gwaAmmon okwa yamukula aatumwa yaJefta ta ti: “Aaisraeli sho ya zile muEgipiti, oya kutha po evi lyandje okuza komulonga Arnon sigo omulonga Jabbok nomulonga Jordan. Ngashingeyi li galulila ndje nombili.”

14 Jefta okwa tumununa ko ishewe aatumwa komukwaniilwa gwaAmmon, 15 neyamukulo lye tali ti: “Kashi shi oshili kutya Israel okwa kutha po evi lyaMoab nenge evi lyaAmmon. 16 Shoka sha ningwa, osho shika. Aaisraeli sho ya thigi po Egipiti, oya taula ombuga, sigo okEkololo lyaAkaba, e taa thiki kuKadesh. 17 Nena oya tumu aatumwa komukwaniilwa gwaEdom, ye mu pule epitikilo, ya taakane evi lye. Ihe omukwaniilwa gwaEdom ine ya pitikila. Oya pula ishewe omukwaniilwa gwaMoab, naye ongashikwawo, ine ya pitikila, ya pite mevi lye. Osho nduno Aaisraeli ya kala muKadesh. 18 Nena oya tsikile ya piti mombuga taa dhingoloka evi lyaEdom nevi lyaMoab, handiyaka yomulonga Arnon. Oko ya yungu ontanda, ihe inaa tokola nando Arnon, oshoka ogwa li ongamba yaMoab. 19 Nena Aaisraeli oya tumu aatumwa kuSihon, omukwaniilwa gwAayamori gwokuHeshbon noye mu pula epitikilo, ya taakane oshilongo she, ya ye kevi lyaandjawo. 20 Ihe Sihon ina pitika nando, Aaisraeli ye shi ninge. Okwe eta aakwiita ye ayehe e taa yungu ontanda puJahas nokwa matukile Aaisraeli. 21 Ihe Omuwa, Kalunga kaIsrael, okwa sinditha Aaisraeli ya sindi Sihon niita ye. Osho ngaaka Israel a lala oshilongo ashihe shAayamori mboka ya kala moshilongo shoka. 22 Oya kutha po oshilongo shAayamori ashihe okuza kuArnon muumbugantu sigo oJabbok muumbangalantu nokuza kombuga kuuzilo sigo oJordan kuuninginino. 23 Shika osha ningwa kOmuwa, Kalunga kaIsrael, ngoka a kwatha aantu ye Aaisraeli, ya tidhe po Aayamori. 24 Owa hala, u kambadhale oku li kutha ko? Dhiginina ndyoka wa pewa kukalunga koye Kemosh. Ihe tse otatu ka takamitha ashihe shoka Omuwa, Kalunga ketu, e tu pe. 25 Oto dhiladhila kutya ongoye omwaanawa u vule Balak yaZippor, omukwaniilwa gwaMoab? Okwa homona tuu Israel nenge e ya etela iita nando olumwe? 26 Oshoka pwa piti omimvo omathele gatatu, sho Israel a lala Heshbon naAroer, niilando yomuushiinda wayo, niilando ayihe komunkulo gwomulonga Arnon. Oshike inoo yi kutha ko nale? 27 Aawoo, inandi ku hinda nando okashona. Ongoye to hindi ndje, sho to etele ndje iita. Omuwa oye omutokoli. Oye ta ka tokola pokati kAaisraeli nAayammoni.” 28 Ihe omukwaniilwa gwaAmmon ina pupa ko nokuli kelaka lyaJefta.

29 Ombepo yOmuwa oya lambele Jefta. Okwa taakana Gilead naManasse e ta galukile kuMispe muGilead e ta yi kuAmmon. 30 Jefta oku uvanekele Omuwa: “Ngele oto sinditha ndje Aayammoni, 31 omuntu ngoka ta ka tsakaneka ndje tango ta zi maandjetu, otandi ke mu gandja kOmuwa omayambo, sho te galuka kiita nda sindana. Omuntu ngoka otandi ke mu ninga efikilondjambo.” 32 Osho Jefta a tokola omulonga, a ka kondje nAayammoni; Omuwa nokwe mu pe esindano. 33 Okwe ya thepagula okuza kuAroer nombinga ayihe muushiinda waMinnit, iilando omilongo mbali ayihe kumwe, sigololo Abel Keramim. Opwa li omulape gwowala, Aayammoni noya sindika kAaisraeli.

Omwanakadhona gwaJefta

34 Jefta sho a galukile kegumbo kuMispe, omwana omukadhona okwe ke mu tsakaneka ta tembula ye ta hiki ontunda. Okwa li epona. 35 Sho e mu mono, okwa tuula oonguwo dhe moluhodhi e ta ti: “O, mumwandje! Owa tatula omutima gwandje! Omolwashike wa undulile ndje momupya gu thike mpano? Onda ninga euvaneko nde li uvanekele Omuwa, noite vulu oku li lundulula.”

36 Omwanakadhona okwa ti kuye: “Ngele owa uvanekele Omuwa euvaneko, ninga sho wa ti, u shi ningile ndje. Omuwa ndishi okwe ku pa esindano, sho wa dhenge aatondi yoye Aayammoni.” 37 Ihe okwi indile he a ti: “Ningila ndje shika. Etha ndje manga oomwedhi mbali, ndi ye nookanee kandje koondundu, ndi ka lilile ko uukadhona wandje, sho te si inaandi fukala.” 38 He okwe mu lombwele, a ye, nokwe mu etha, a kale oomwedhi mbali. Okwa yi nookanee ke koondundu nokwa lilile ko uukadhona we, oshoka ina hokanwa noke na oluvalo. 39 Konima yoomwedhi mbali okwa galukile kuhe. Jefta okwa ningi, ngaashi u uvanekele Omuwa, nomwana okwa si manga ye omukadhona.

Shika osha ningile ondjigilile muIsrael. 40 Aakiintu aagundjuka haa yi omasiku gane omumvo kehe oku ka lila omwana omukadhona gwaJefta gwokuGilead.