Kalunga ta geele aanandumbo
1 “Ondi imonithile mboka inaa pula ndje nonda monika kumboka inaa konga ndje. Onda lombwele oshigwana inaashi ithana edhina lyandje nda ti: ‘Ongame ngu, ongame nguka.’ 2 Ondi ilongekidha aluhe ndi tsakaneke aantu yandje, mboka ya tangalala nohaa longo uuwinayi notaa landula oondjila dhawo yene. 3 Otaa hindi ndje aluhe notaa geyitha ndje. Otaa yamba miikunino yiinonoma notaa fike iitsinino kiiyambelo yuupagani. 4 Otaa ka hungila moombila nomomakololo, yo taa pula aathithi. Otaa li onyama yoshingulu nomuhoka gwonyama ya saagelelwa iimenka. 5 Otaa lombwelathana taa ti: ‘Kala kokule natse, otse aayapukilela, ino tu guma!’ Itandi vulu okwiidhidhimikila aantu ya tya ngaaka — ondjahi yandje yoku ya geela oya fa omulilo ihaagu dhimi.
6 “Onda tokola nokuli, nkene tandi ya geele. Epangulo lyawo olya nyolwa li li koshipala shandje. Itandi mwenene shoka ya ningi; otandi ke ya futila 7 oondjo dhawo noondjo dhoohekulu. Oya fikile iitsinino komahala giinonoma koondundu noya sheke ndje nayi. Otandi ya geele, ngaashi iilonga yawo yonale ye shi ilongele.”
8 Omuwa ota ti: “Kaku na ngoka ta yono po omandjembele omawanawa, oshoka otamu zi omaviinu. Nangame wo itandi ka yona po aantu yandje ayehe. Otandi ka hupitha mo mboka haa longele ndje. 9 Otandi ka holola oluvalo muJakob nomuJuda, oomboka taa ka thigulula oondundu dhandje. Aantu yandje aahogololwa taye ke dhi thigulula, naapiya yandje oko taa ka kala. 10 Otaa ka longela ndje notaa ka litha oonzi dhawo niimuna yawo momalundu gaSharon muuninginino nomEsilu lyomalwa muuzilo.
11 “Ihe otashi ka kala shi ili kune mboka hamu etha Omuwa nohamu dhimbwa Sion, ondundu yandje ondjapuki, one mboka hamu yalele Gad oshililo nohamu hangele oshikalunga Meni omalovu. 12 Otamu ka sa tamu dhipagwa, oshoka inamu itaala, sho nde mu ithana nenge mu pulakene, sho nda popi. Omwa hogolola shoka inaashi opalela ndje nomwa ningi shoka oshiwinayi koshipala shandje. 13 Onkee tandi mu lombwele kutya mboka haa longele ndje nohaa vulika kungame, otaa ka kala ye na iikulya niikunuwa ya ha, ihe ne otamu ka sa po kondjala nokenota. Otaa ka kala ye na elago, ihe ne otamu ka kala momupya. 14 Otaa ka imba omahambelelo, ihe ne otamu ka ula nomutima gwa nyanyagulwa. 15 Aantu yandje aahogololwa otaa ka tumbula edhina lyandje, uuna taa thingana. Ngame, Omuwa Omupangeliawike, otandi ke mu dhipaga po. Ihe mboka taa vulika kungame, otandi ke ya lukulula edhina epe. 16 Shaa ngoka moshilongo ta ka pula eyambeko, ota ka pula a yambekwe kuKalunga kashili. Shaa ngoka ta gana, ota ka gana kedhina lyaKalunga kashili. Omalwa gomuuyuni wonale otaga hulu po notaga dhimbiwa.”
Eshito epe
17 Omuwa ota ti: “Tala, otandi shiti egulu epe nevi epe. Iiningwanima yonale otayi ka dhimbiwa thiluthilu. 18 Nyanyukweni nokuligola pombanda omolwaayihe mbyoka tandi yi shiti. Otandi shiti Jerusalem shi ninge oshilando shenyanyu, naantu yasho otaa ka kala ye na elago. 19 Ngame otandi ka nyanyukilwa Jerusalem naantu yasho. Itamu ka kala elilagano nenge ewi lyonkugo. 20 Uuhanona itau ka sila we muumputu, naantu ayehe otaa ka sa ya koka. Ngoka ta si e na omimvo ethele, ota ka talwa a sa omugundjuka unene. Ngoka ta si inaa thikitha omimvo ethele, otaku ka tiwa okwa thingwa. 21 Otaa ka tunga omagumbo, opo ya kale mo yo yene. Otaa ka tsika omiviinu, opo ya lye iiyimati yadho yo yene. 22 Itaa ka tunga omagumbo, yalwe ya kale mo, nenge ya tsike omuviinu dhi ka liwe kuyalwe. Omasiku gaantu yandje otaga ka kala omale ga fa omasiku gomuti. Aahogololwa yandje otaa ka kala ko olule nokunyanyukilwa iilonga yiikaha yawo yene. 23 Itaa ki ihepeka owala, noyana itaye ke ya valela omupya. Otandi ke ya yambeka pamwe noluvalo lwawo sigo aluhe. 24 Manga nokuli inaaya galikana, otandi ya uvu, nomanga inaaya indila ndje, otandi ya yamukula. 25 Embungu nokanzigona otayi ka napela pamwe; onime otayi li omwiidhi ya fa ongombe, neyoka oondya dhalyo ontsi yevi. Kondundu yandje ondjapuki kaku na we ehala mpoka tapu longwa uuwinayi nenge pu yonwe sha.” Osho Omuwa ta popi.
© Oshindonga Bible © Bible Society of Namibia, 2008.
