Etakumo lyaIsrael
1 Akutu, andola u tuule egulu omusa e to kulukile pohi! Oondundu ando dhi hemukile koshipala shoye, 2 ngaashi omulilo tagu fike po iihwa notagu fulukitha omeya! Kulukila pohi, u tseyithile aatondi yoye edhina lyoye nou kakamithe iigwana koshipala shoye. 3 Okwa li ethimbo, sho we ya e to longo iilonga iitilithi mbyoka inaatu yi tegelela nando; oondundu odhe ku tala e tadhi kakama. 4 Noshitonale kaku na ngoka omakutsi ge gu uvile nenge omeho ge ga tonatele kalunga gulwe a fa ngoye ngoka ho longo to popile ngoka te ku inekele. 5 Oto tsakaneke mboka taa mono enyanyu tali zi megwanitho lyuuyuuki, oyo tuu mboka haa dhimbulukwa, nkene wa hala ya kale. Ando twa li ngaaka aluhe, ando otwa hupithwa. Owe tu geele, ihe otwa tsikile okuyona. 6 Atuhe otwa yono; niilonga yetu iiwanawa oya nyata ayiheyihe. Omolwomayono getu otwa fa omafo ga kukuta notaga pepwa po kombepo. 7 Kape na ngoka a galukile kungoye momagalikano; kape na ngoka te ya kungoye a kwathwe. Owe tu iholeke nowe tu etha omoluulunde wetu.
8 Ihe, Omuwa, ongoye tate. Tse eloya, ngoye omuhongi gwiiyuma. Owe tu shiti, 9 onkee ino tu geela nenge u dhimbulukwe omayono getu sigo aluhe. Otse aantu yoye; tu sila ohenda. 10 Iilando yoye iiyapuki oya ningi ombuga, eeno, Sion osha ningi ombuga, Jerusalem eputu lyowala. 11 Otempeli yetu ondjapuki noya simana, moka ootatekulu ye ku simanekele, oya fikwa po nomulilo, nuuyamba wetu auhe wa lala momakulukuma. 12 Omuwa, ayihe mbika itayi ku inyengitha? Ito ka ninga po sha, sho to tu hepekitha shi vulithe poonkondo dhetu?
© Oshindonga Bible © Bible Society of Namibia, 2008.
