Esimano lyaSion
1 Ligola, ngoye omuntimbe,
ngoye ngoka inoo vala!
Kugilila nokunyanyukwa newi lyopombanda, ngoye ngoka inoo thetwa,
oshoka Omuwa ota ti,
omuthigwapo oku na oyana oyendji ye vule aana yomuhokanwa.
2 Tamununa etsali lyoye li ninge enene;
oongodhi dhalyo dhi hilila kokule
noomboha dhadho dhi dhengela muule.
3 Oto ka taandelitha oongamba dhoye koombinga adhihe.
Oluvalo lwoye otalu ka lala iilongo mbyoka iigwana yilwe yi yi na ngashingeyi.
Iilando ya mbugala otayi ka udha aantu.
4 Ino tila — ito ka sithwa we ohoni; ito ka fupipikwa we.
Oto ka dhimbwa ohoni yomuufuko woye,
noito dhimbulukwa we ezaza lyomuuselekadhi woye.
5 Omushiti gwoye oye omusamane gwoye,
Omuwa Omunankondoawike olyo edhina lye.
Kalunga kaIsrael omuyapuki ote ku hupitha —
oye omupangeli gwuuyuni auhe.
6 Israel, owa fa omufuko e ethiwa komulume
noku li moluhodhi olululu.
Ihe Omuwa ote ku ithana,
u galuke ta ti:
7 “Onde ku etha okathimbo okashona,
ihe otandi ku galula nesilohenda enene.
8 Muupyundjahi onde ku iholeke oshipala shandje okathimbo,
ihe otandi ku sile ohenda hayi kalelele.”
Omuwa omukulili gwoye osho ta ti.
9 “Muuyuni waNoa ondu uvaneke kutya
efundja lyaa ye ko we kombanda yevi.
Ngashingeyi otandi uvaneke,
ndaaye ku geele we nomagandambadhi nenge ndi ku dhenge.
10 Oondundu nando odhi dhikuke po,
niikulundundu nando oyi kakame,
esilohenda lyandje itali ku thigi po,
nuukuume wetu nangoye itau teka po.”
Omuwa naku ku silohenda osho ta ti.
Jerusalem oshipe
11 Omuwa ota ti:
“Omunamupya ngoye, omutelaganithwa kiikungulu
nopwaa na ngoka e ku hekeleke!
Otandi ku tungulula nooagate,
nomakankameno goye noosafire.
12 Ooshungo dhoye otandi dhi tungulula noorubini,
omiyelo dhoye nookristali,
nedhingililokuma nomamanya gondilo.
13 “Ongame mwene tandi ka longa aantu yandje,
notandi ya pe elago nombili.
14 Eutho nuuyuuki otau ke ku koleka.
Uukolokoshi otau ka kala kokule nangoye,
ito pumbwa okutila.
Omahalutho oga gamuka ko, itage ku hedha popepi.
15 Ngele oku na ngoka te ku matukile,
kashi shi pazimino lyandje;
ngoka te ku kondjitha, ota ka teka po.
16 “Tala, ongame nda shiti omuhambudhi,
ngoka ta pepele omupepo ta hambula iikuti.
Ongame nda shiti wo omukwiita,
ngoka ta longitha omatati a dhipage.
17 Oshikondjitho kehe tashi hambulwa shi ku kondjithe,
itashi tompola sha.
Nelaka kehe tali ku tamaneke,
oto li tompele ondjo.
Otandi ka popila aapiya yandje
e tandi ya pe esindano.”
Omuwa oye a popi.
© Oshindonga Bible © Bible Society of Namibia, 2008.
