Uusama waIsrael
1 Omuwa ota ti:
“Otamu dhiladhila nda tidha po aantu yandje,
ya ye ngaashi omulumentu ta henge po omukadhi?
Ngele osho, ombapila yehengano oyi li peni?
Otamu dhiladhila nde mu landitha po muupika
nda fa omuntu ta landitha po oyana, ya ninge aapika?
Aawe, omwa yi muupongekwa omolwoondjo dheni yene;
omwa tidhwa po molwomayono geni.
2 “Omolwashike kaakwa li nando ogumwe, sho nde ya?
Omolwashike kaakwa li ngoka i itaale, sho ndi ithana?
Oshikaha shandje sha ningi oshifupi oku mu kwatha?
Onda pumbwa oonkondo, ndi mu mangulule?
Noshipango shandje otandi kukutike efuta,
nomilonga otandi dhi shitukitha ombuga.
3 Egulu otandi li zaleke onguwo onduudhe
e tandi li siikilitha oshako onduudhe.”
Evuliko lyomupiya gwOmuwa
4 Omuwa Omupangeliawike
okwa longo ndje shoka ndi na okutya,
opo ndi koleke mboka ya gundila po.
Ongula kehe ota ladhipike ndje,
opo ndi uve shoka ta nongeke ndje.
5 Omuwa okwa thitulula omakutsi gandje.
Ngame inandi mu tinda, inandi shuna monima.
6 Ombunda yandje nde yi pe mboka ya dhenge ndje.
Ngame inandi ya kankeka, sho ya tuku ndje,
sho ya dhakagula oombenzi dhandje
noya hiyile ndje omayeye moshipala.
7 Omasheko gawo inaga alula ndje,
oshoka Omuwa Omupangeliawike oha kwatha ndje.
Ondi idhigupaleke, opo ndi ya idhidhimikile.
Onda tseya kutya itandi sithwa ohoni,
8 oshoka Kalunga a kala ndje popepi
noye tu utha ndje omuyuuki.
Olye ta tompele ndje uuwinayi?
Natu tongololathaneni!
Omutamaneki gwandje olye?
Oye na tsakaneke ndje!
9 Omuwa Omupangeliawike ota popile ndje.
Olye ihe ta tompele ndje uuwinayi?
Aatamaneki yandje ayehe otaa kana po;
otaa kulupa ya ninge iinyakwi ya lika koothithi.
Ekumagidho lyokwiinekela Omuwa
10 Amuhe ne mboka hamu simaneke Omuwa
nohamu vulika kiipango yomupiya gwe,
epola ndyoka tamu ende, otali vulu okuluudha nayi,
ihe inekeleni Omuwa, ituleni muKalunga keni.
11 Amuhe mboka hamu pangele ompangela okuyonagula po yalwe,
otamu ka hanagulwa po koompangela dheni yene.
Omuwa oye mwene ta ka ninga ayihe mbika;
otamu ka hepekwa kuuwehame mboka wa tulwa po.
© Oshindonga Bible © Bible Society of Namibia, 2008.
