Kalunga ti ithana Kores
1 Kalunga ota popi ta ti:
“Mweneni ne mu pulakene ndje, one oontuntu dhokokule!
Ilongekidheni, tu ka kaleni moompangu;
otamu kala mu na ompito yokupopya.
Natu tokoleni, olye ngoka e li mondjila.
2 “Olye ano ngoka e etele omusindani a ziilile kuuzilo
nokwe mu ningi omusindani shaa nkoka ta yi?
Olye te mu pe esindano,
a sinde aakwaniilwa niigwana?
Egongamwele lye otali ya dhengele pevi ya fa ontsi yevi.
Iikuti ye otayi ya hwanukile ya fa iiyagaya tayi pepwa kombepo.
3 Ote ya tidha ta katuka kee na nando ombudhi,
ta kwinyola a fa itaa lyata pevi.
4 Olye ngoka e shi longa nokwe shi toto?
Olye u utha olweendo lwehistoli?
Ngame, Omuwa, onda li petamekolela,
ngame, Omuwa, otandi ka kala pehulilolela.
5 “Aantu yokokule oya mono shoka nda longo;
oya haluka nokukakama kuumbanda.
Omolwashoka ya gongala e taye ya.
6 Oonkulungu otadhi kwathathana nokutsaathana omukumo.
7 Engomba otali kumike omuhambuli gwoshingoli,
nomumbunzi gwoshimenka ota lombwele ngoka ta ndanda poshikalo ta ti:
‘Owa ninga nawa.’
Oyo notaa kwatele oshimenka peha lyasho noomboha.”
Kalunga oku li pamwe naIsrael
8 “Ihe omuntu gwandje Israel,
ngoye Jakob, ngoka nde ku hogolola,
ngoye oluvalo lwakuume kandje Abraham,
9 ngame onde ku kongolola kooha dhuuyuni;
onde ku ithana ko koombinga dhokokulekule,
nonde ku lombwele nda ti: ‘Ngoye omuntu gwandje.’
Inandi ku ekelahi nando, ihe onde ku hogolola.
10 Ino tila — ongame ndi li pungoye!
Ongame Kalunga koye — ino limbililwa!
Otandi ku kankameke e tandi ku kwatha;
otandi ku gamene notandi ku hupitha.
11 “Ayehe mboka taa tsu ondumbo nangoye,
otaa sithwa ohoni e taa sindika.
Ayehe taye ku kondjitha,
otaa ka sa po.
12 Ayehe mboka ya li aatondi yoye,
ito ke ya mona we, nando u ya konge.
Ayehe mboka ye ku hingile iita,
otaa ka pepuka po thilu.
13 Oshoka ongame Omuwa Kalunga koye;
otandi ku tsu omukumo te ti:
‘Ino tila; otandi ku kwatha.’ ”
14 Omuwa ota popi ta ti:
“Ino tila, ezinyo ngoye Israel,
nangoye Jakob, okanima okashuushuu,
oshoka ongame mwene tandi ku kwatha.
Ngame Omuyapuki, Kalunga kaIsrael
ongame tandi ku hupitha.
15 Otandi ku ningi omuhi gwokunyanyagula gu na ondjundo.
Oto ka nyanyagula oondundu noku dhi hanagula po;
oondundu otadhi ka vundulwa
dhi ninge ontsi.
16 Oto ke dhi gunda mombanda;
ombepo otayi dhi pepe po,
notadhi ka halakanithwa koshikungulu.
Nena ngoye oto ka kala u na enyanyu, oshoka ongame Kalunga koye;
oto ka hambelela ndje, ngame Kalunga kaIsrael omuyapuki.”
Iilongandhindhiliko yetembu epe
17 Uuna aantu yandje moluhepo lwawo taa kongo omeya,
uuna oondaathelo dhawo dha kangala kenota,
nena ngame Omuwa otandi ka yamukula omagalikano gawo;
ngame, Kalunga kaIsrael, itandi ke ya etha nando.
18 Otandi ka tondokitha omilonga miikulundundu yomamanya,
noothithiya otadhi ka kunguluka momasilu.
Ombuga otandi yi shitukitha omatope gomeya,
nevi lya kalanda tandi li shitukitha omadhiya.
19 Mombuga otandi ka tsika mo omisedeli,
omithiya, omihombo nomiolivi.
Oontale otadhi ka shituka omakuti gomikiperesi, omipopeli nomihongo.
20 Aantu otaye ke shi mona
notaa ka tseya kutya ngame Omuwa onde shi ningi.
Otaa ka uva ko kutya Omuyapuki, Kalunga kaIsrael oye e shi eta po.
Omuwa oye awike Kalunga
21 Omuwa, omukwaniilwa gwaIsrael ota ti:
“Ne ookalunga kiigwana,
eteni huka oontamanana dheni,
tumbuleni omatompelo geni.
22 Ileni huka ne mu hunganeke shoka tashi ka ningwa,
opo tu shi tseye, uuna tashi ka ningwa.
Fatululileni oompangu iiningwanima yonale,
ne mu tu lombwele kutya otayi ti ngiini.
23 Tu lombweleni, onakuyiwa shoka tayi tu etele,
opo tu ka tseye kutya one ookalunga!
Longeni po uuwanawa nenge uuwinayi;
tu tilitheni ne mu tu haluthe!
24 One yene kamu shi sha,
niilonga yeni osima yowala.
Yaye mboka taye mu hogolola!”
Omuwa ta hunganekele Kores esindano
25 “Onda hogolola omulumentu ngoka a kala kuuzilo
otandi ke mu eta a homone ta zi kuumbangalantu.
Ota ka lyata aapangeli ngaashi omunoko nongeloya lyomuhongi gwiiyuma.
26 Olye gwomune e shi hunganeke, nkene tashi ka ningwa,
opo tatu vulu okutya, omu li mondjila?
Kape na nando ogumwe gweni a popi sha kusho;
kape na ngoka u uva shoka tamu ti.
27 Ngame Omuwa onda lombwele tango Sion onkundana;
onda tumu omutumwa kuJerusalem a ka tye:
‘Aantu yeni otaa galuka!
Eeno, otaye ya kegumbo!’
28 Sho nda tala mokati kookalunga,
kamu na nando ogumwe gwomuyo ta vulu okutya sha;
kamu na nando ogumwe ta vulu okuyamukula omapulo gandje.
29 Tala, ayehe oyo aaniifundja yowala,
itaa vulu okuninga nando oshaashaa.
Iimenka yawo kayi na omwago, ombepo yowala.”
© Oshindonga Bible © Bible Society of Namibia, 2008.
