Omuwa ta geele aatondi ye
1 Ileni, ne iigwana ayihe! Gongaleni ne mu pulakene. Uuyuni auhe nane amuhe mwa kala kombanda yevi, ileni mu pulakene. 2 Omuwa okwa geela iigwana ayihe nomatangakwiita gayo. Okwe ga pangulile okuyonwa po. 3 Omidhimba dhawo itadhi ka fumvikwa; otadhi ka langathana nokwoolela nkoka nokunika; oondundu otadhi ka tiligana ombinzi. 4 Etango, omwedhi noonyothi otadhi ka nyanyauka, sigo dha ningi ontsi. Ewangandjo otali ka gonywa lya fa ondhinga yembo, noonyothi otadhi ka gwa mo dha fa omafo taga yagumuka komiviinu nenge komikwiyu.
5 Omuwa okwa longekidha egongamwele lye megulu, nongashingeyi otali ka dhipaga Edom, aantu tuu mboka ya pangulilwa okuyonwa po. 6 Egongamwele lye otali ka gwayekwa ombinzi yawo noofu ngaashi ombinzi niinkene yoonzigona noyiikombo mbyoka hayi yambwa omafikilondjambo. Omuwa ota ka yamba omafikilondjambo ngaka moshilando Bozra; ota ka ninga omatselelo omanene moshilongo Edom. 7 Aantu otaa ka gwila po ya fa oonyati oondumentu noya fa oontsezi oongundjuka, nevi otali ka tiliganekwa kombinzi nolya siikilwa kiikagadhi. 8 Ndika olyo ethimbo ndyoka Omuwa ta ka mangulula Sion nota ka geela aatondi yaSion.
9 Omilonga dhaEdom otadhi ka ninga ontopo yonka, nevi otali ka ninga osulufuli. Evi alihe otali ka pya lya fa oteya. 10 Otali ka pya omutenya nuusiku, nolwithi otalu ka tsinagala mo aluhe sigo aluhe. Evi otali ka kala lya mbugala sigo omapipi nomapipi, nokape na we ngoka te ende mulyo sigo aluhe. 11 Omahwiyu nomadhilakola otaga ka lala oshilongo. Omuwa ote ke shi mbugaleka ishewe, ngaashi sha li nale peshito. 12 Itaku ka kala omukwaniilwa a lele oshilongo, nomalenga agehe otaga ka kala kaage mo. 13 Omano noondjoho otadhi ka mena mo moongulumbala adhihe nomiilando yomadhingililokuma, nuuyandje nomahwiyu otaga ka kala mo. 14 Iiyaluhwa ohayi tsakanene mo nomambungu, niikombo iindandi ohayi igidhathana. Evukule lyomomilema omo tali ya li konge omulalo. 15 Omahwiyu otaga tungu mo iihandhila yago e taga valele mo omayi, taga tendula uuhwiyugona wago e tage u paluthile mo. Oontsa oko tadhi ka gongala, onkwawo ponkwawo.
16 Shi konakoneni membo lyOmuwa lyiishitwa yi na omwenyo ne mu leshe shoka tali ti. Kape na nando oshimwe shomiishitwa mbika tashi kana po noshaa na oshikwawo. Omuwa okwe shi popi shi ningwe; oye mwenemwene te ke yi gongela. 17 Omuwa oye mwenemwene te yi topolele evi e te yi pe uuthiga wayo, yi kale mo okuza kepipi nepipi.
© Oshindonga Bible © Bible Society of Namibia, 2008.
