1 Esiku ndyoka Omuwa ota ka leka egongamwele lya tsa nekukutu, a tse nalyo Leviatan, eyoka ndyoka li na ontuku, Leviatan, eyoka ndyoka hali nifauka nokungolyauka, evovo lyomefuta, note li dhipaga po.
Oshitsambe shOmuwa
2 Esiku ndyoka Omuwa ota popi oshitsambe she e shi hokwa a ti: 3 “Otandi shi langele e tandi shi tekele omeya ethimbo alihe. Uusiku tandi shi tonatele nomutenya tandi shi keelele, pwaa kale ngoka te shi yono po. 4 Oshitsambe itandi shi geele we. Ngele osha mena owala omano noondjoho, otandi dhi vudha mo noku dhi fika po. 5 Ihe aatondi yaantu yandje ngele oya hala egameno lyandje, naa hangane nangame. Eeno, naa hangane nangame.”
6 Momasiku tage ya oluvalo lwaJakob otalu ka tsama ngaashi omuti, Israel ota ka temuna oongala nokututuma. Evi otali ka udha iiyimati mbyoka taa imitha.
7 Israel ina geelwa kOmuwa noonkondo noina kanitha aantu oyendji ngashika aatondi ye. 8 Omuwa okwa geele aantu ye, sho e ya tumu muupongekwa. Okwe ya kuthitha mo ombepo ondhigu yokuuzilo. 9 Uulunde waIsrael otau ka dhimwa po ashike, ngele omamanya giiyambelo yoshipagani taga ka tatulwa ga ninge ga fa omamanya gokaalaka ga nyanyulwa, noitapa thigala nando oshiyambelo shiitsinino nenge iiyelekela yoshikalungakiintu Asheera.
10 Oshilandohote osha ningi omakulukuma gowala. Osha mbugalekwa sha fa eputu lyowala. Osha ningi uunapelo wiimuna, moka tayi gondjo e tayi gugula mo. 11 Iitayi yomiti nge ya kukuta, otayi teka ko, naakiintu otaye yi tyaya po, yi ninge iikuni. Molwaashoka aantu kaa uvite ko, Kalunga Omushiti gwawo ite ya sile ohenda nenge e ya uvitile ando olukeno.
12 Mesiku ndyoka, okuza kuEufrat sigo okongamba yaEgipiti, Omuwa ota ka gongela aantu ye oogumwe noogumwe a fa omuntu ta yele iilya te yi yoolola metutu.
13 Uuna esiku ndyoka nali ya, enkuma otali ka hikwa, li ithane Aaisraeli ayehe aapongekwa kuAssur nokuEgipiti. Otaa ke ya notaa ka longela Omuwa muJerusalem kondundu ye ondjapuki.
© Oshindonga Bible © Bible Society of Namibia, 2008.
