Ondjimbohambelelo
1 Omuwa, ongoye Kalunga kandje;
otandi ku simaneke nokuhambelela edhina lyoye.
Owa longo iikumithalonga;
muudhiginini woye owa gwanitha oompangela ndhoka wa pangele nalenale.
2 Iilando we yi ningi omakulukuma,
nowa kumuna po oongulushigo dhayo.
Oongulumbala ndhoka dha tungwa kaatondi yetu,
odha kana po sigo aluhe.
3 Aantu yiigwana iinankondo otaa ke ku hambelela;
oto ka tilika miilando yiigwana iidhudhu.
4 Owa palutha oohepele naasindjala,
nowe ya hupitha methimbo lyuuyina.
Owe ya gamene kiikungulu nowe ya shigi kepupyu lyomutenya.
Aadhudhu oya ponoka ko ya fa oshikungulu
5 noya fa oluteni mevi lyomutenya.
Ihe ngoye, Omuwa, owa mweneke aatondi yetu;
oto mweneke omauyagano gaalumentu aadhudhu,
ngaashi omutenya momunzile gwoshikogo.
Kalunga ta hanga oshituthi
6 Kondundu Sion Omuwa Omunankondoawike ota hangele iigwana ayihe oshituthi shoontumba dhomagadhi noshomaviinu ga dhindolekeka. 7 Kondundu ndjika ota ka kayununa po esiikilo ndyoka tali kwidhidhike iigwana ayihe. 8 Omuwa Omupangeliawike ota ka hanagula po eso sigo aluhe. Ota ka theta po omahodhi momeho gaayehe e ta kutha po okudhinwa kwaantu ye muuyuni auhe. Omuwa mwenemwene a popi ngeyi.
9 Esiku ndyoka otaku tiwa: “Kalunga ketu oye nguka! Otwe mu inekela, noye e tu hupitha. Oye Omuwa! Otwe mu inekela notu li nawa ngashingeyi notu na enyanyu, oshoka okwe tu hupitha.”
Kalunga ta geele Moab
10 Omuwa ota ka gamena ondundu Sion, ihe Aamoabi otaa ka lyatagulwa ya fa iiyagaya tayi lyatelwa muuhoho. 11 Otaa ka lapa nomaako gawo ya fa taa yogo ontente, ihe Omuwa ote ke ya fupipika, niikaha yawo otayi ka nemanana. 12 Ota ka kumuna po omapopilongulu gaMoab pamwe nomakuma gago omaleeleka e te ga undulile pevi montsi.
© Oshindonga Bible © Bible Society of Namibia, 2008.
