Okutekapo kwaBabilon
1 Ndika ehunganeko tali hunganeke Babilon.
Ngashika iikungulumbepo tayi zi kombuga kuumbugantu, osho omuponokeli ta ziilile kombuga, koshilongo oshitilithi. 2 Ondu ulukilwa emoniko lyiiningwanima iitilithi, emoniko lyomahanagulo.
Matukila, Elam! Media, ninga ekondeka! Kalunga ota ka hulitha po omahepeko ngoka ge etwa kuBabilon.
3 Shoka nda mono nondu uvu memoniko, osha halutha ndje noonkondo, nuuwehame owa kwata ndje wa fa uudhigu womukulukadhi ta thetwa. 4 Omwenyo gwandje otagu nuka mo. Otandi kakama kuumbanda. Onda hala ku toke, ihe ewiwilo otali gelelitha ndje.
5 Memoniko iitaafula tayi yalwa, aayenda ya kuutumbe. Otaa li yo taa nu. Ohaluka taku igidhwa: “Oondjayi, yambukeni! Longekidheni omahuuyanza!”
6 Omuwa okwa lombwele ndje a ti: “Inda u ka langeke omupekapeki; na hokolole shoka ta mono. 7 Ngele ta mono aantu taa ya momusholondondo gwooyaali nooyaali ya kayila uukambe, uusino noongamelo, oku na oku ya ndhindhilika nawa.”
8 Omupekapeki okwi igidha: “Tatekulu, onda thikama pomalangelo uusiku nomutenya.”
9 Ohaluka, oyo mbeya taa ya! Aalumentu ya kayila uukambe ooyaali nooyaali. Omupekapeki okwa popi onkundana ta ti: “Babilon osha teka po! Iimenka ayihe mbyoka ya li haa simaneke, oya tatulilwa pevi.”
10 Aantu yandje Aaisraeli, ne omwa yungulwa mwa fa iilya, ihe ngashingeyi onde mu tomonene onkundana ombwanawa ndjoka ndu uvu kOmuwa Omunankondoawike, Kalunga kaIsrael.
Edom ta hunganekwa
11 Ndika ehunganeko tali popi Edom
Omuntu gumwe okwi ithana ndje e li muSeir a ti: “Mulangeli, uusiku otau hulu po uunake? Mulangeli, uusiku otau hulu po uunake?”
12 Omulangeli okwa yamukula: “Ongula otayi shi, nonando inaku yela natango. Ngele omwa hala okupula ishewe, galukeni.”
Arabia tashi hunganekwa
13 Ndika ehunganeko tali popi Arabia.
Aantu ne yomuDedan, mboka mu na ontanda yiiyendo mombuga yaArabia, 14 gandjeni omeya kaasinota mboka taa ya kune. Aantu ne yomoshilongo Tema, peni oontauki iikulya. 15 Aantu otaa kukuma taa fadhuka po omagongamwele ngoka tage ya dhipaga nokuli, otaa yi ontuku omatati ngoka tage ya yaha nokuli, otaa yi ontuku yiita.
16 Omuwa okwa lombwele ndje a ti: “Omumvo gumwe nge gwa piti po — ngashika omumvo gwondhalate yomuunguli — esimano alihe lyaKedar otali hulu po. 17 Aashona ayeke yomoondjumbeta oofule dhaKedar taa ka hupa ko. Ongame, Omuwa Kalunga kaIsrael, nde dhi popi.”
© Oshindonga Bible © Bible Society of Namibia, 2008.
