Kalunga ta geele Babilon
1 Ndhika odho oohapu dhomahunganeko tadhi popi Babilon, dha hololelwa Jesaja yaAmos kuKalunga.
2 Yelutheni epandela pontundulu kondungu yondundu, mu igidhe aakwiita! Yelutheni omaako mu ya lape, opo ya matukile iiyelo yoshilando shi na uuntsa. 3 Omuwa okwi ithana aakwiita ye oofule yi ihupula, ya hinge iita iiyapuki yo ya geele mboka e ya sila ondjahi.
4 Pulakeneni omundundumo koondundu — omuzizimo gwengathithi enene lyaantu, ombuyagano yiigwana niilongo tayi gongala. Omuwa, Kalunga komatangakwiita, ota dheula aakwiita ye. 5 Otaye ya taa zi kiilongo yokokule kooha dhuuyuni. Mondjahi ye Omuwa ote ya a hanagule po oshilongo ashihe.
6 Memekukwee! Esiku lyOmuwa oli li popepi. Omunankondoawike ote eta ehanagulopo. 7 Nena omake gaantu ayehe otaga ka nemanana, nomukumo gwawo otagu tyololoka. 8 Otaa ka haluka, otaa gwilililwa po kuuwehame ya fa omukulukadhi a adhika koshitheta. Otaa talathana ya sholola, niipala yawo ya pemba kohoni. 9 Esiku lyOmuwa otali ya. Olyo esiku etilithi li na uulaadhi nondjahi ondulu. Oshilongo otashi mbugala, nomulunde kehe ota hanagulwa po. 10 Oonyothi dhokegulu nomakaladhidhi gadho itaga ka minikila we. Etango otali ka kala lya luudha, sho tali piti, nomwedhi itagu toka we.
11 Omuwa ota ti: “Otandi geele evi omoluuwinayi walyo, naakolokoshi omolwomayono gawo. Otandi ka hulitha po uuntsa waatangalali notandi ka thindila pohi omwiityo gwaakolokoshi. 12 Oomboka taa hupu ko, otaa ka pumba ye vule oshingoli. 13 Otandi kakamitha omagulu; nevi otali ka ndjingandjingwa pehala lyalyo mesiku ndyoka, uuna ngame, Omuwa Omunankondoawike, tandi holola ondjahi yandje.
14 “Aakwiilongo mboka ya kala muBabilon, otaa ka ya ontuku kiilongo yawo, ya fa uupundja tau hunuka mokati kaakongo. Otaa halakana ya fa oonzi dhaa na omusita. 15 Shaa ngoka ta adhika, ota ka tsuwa negonga, shaa ngoka ta kwatwa, ota ka dhipagwa po. 16 Uunona wawo otau ka nyanyagulwa montaneho yawo, omagumbo gawo otaga ka yugwa naakulukadhi yawo otaa ka laliwa nayo.”
17 Omuwa ota ti: “Otandi ka sikumudha Aamedia ya matukile Babilon. Kaye na onkwa noshisiliveli noihaa haluka oshingoli. 18 Omatati gawo otaga yaha aagundjuka. Kaye na onge nuuhanona, nuunona itaye u tala nolukeno. 19 Babilonia osho oshilongo sho opala shi vule ayihe, osho uuntsa waantu yasho. Ihe ngame, Omuwa, otandi ka hanagula po Babilon, ngaashi nda ningi Sodom naGomorra! 20 Kape na we mpoka tashi ka kalwa kaantu. Kape na Omuarabia ta dhike mo etsali lye, nokape na omusita ta napithile mo iimuna ye. 21 Otashi ningi ehala lyokugondja oombidhi. Moongulu dhasho omahwiyu taga ka tunga iihandhila, oompo odhi na mo onkalo yadho, niikombo yomokuti otayi ka ndjomboka-ndjomboka apehe. 22 Moongulumbala otamu yogelele oombandje, nomambungu otaga ulula miinyanga yasho. Eeno, ethimbo lyaBabilon olya thikana! Omasiku gasho ga pitilila.”
© Oshindonga Bible © Bible Society of Namibia, 2008.
