Hosea nomukulukadhi kee shi kwiinekelwa
1 Omuwa okwa ti kungame: “Inda natango e to kala ishewe u hole omukiintu e li moluhondelo nomuholi gwe. Kala wu mu hole, ngaashi ngame ndi hole natango oshigwana shaIsrael, nando oya yi kiikalunga noye hole okuyambela iimenka omayambo giiyimati.”
2 Opo ihe nda futu iimaliwa iisiliveli omulongo niitano nooshako ne dhiishokelya, ndi mu kulile. 3 Onde mu lombwele: “Kala ethimbo ele nangame; ino ya moluhondelo naalumentu yalwe. Osho nangame wo ote ningi nangoye.” 4 Osho ngeyi Aaisraeli otaa ka kala ethimbo ele yaa na aakwaniilwa nenge aawiliki, yaa na omayambo nenge oongudhimanya dhiidhila, yaa na iikalunga nenge iihongwamenka. 5 Ihe ethimbo otali ya, uuna oshigwana shaIsrael tashi ka galukila natango kOmuwa Kalunga kawo nokomuna gwaDavid, omukwaniilwa gwawo. Nena otaa ka tila Omuwa notaa ka taamba omagano omawanawa kuye.
© Oshindonga Bible © Bible Society of Namibia, 2008.
