Jesus oye omuyambi gwetu omukuluntu
1 Ehuku lyaashoka tatu popi olyo ndika: Tse otu na omuyambi omukuluntu a tya ngaaka, ngoka a kuutumba kolulyo lwoshipangelapundi shOmunankondo megulu. 2 Oye ota longo oshilonga shuuyambi muuyapukielela kokutya, motempeli yoyene ndjoka ya tungwa kOmuwa, hakomuntu.
3 Omuyambimukuluntu kehe okwa langekwa, a kale ta yambele Kalunga omagano nomayambo giinamwenyo. Onkee ano nomuyambi gwetu omukuluntu Jesus okwa li e na okukala e na sha shoka ta yamba. 4 Ando okwa li kombanda yevi, ando ke shi nando omuyambi, oshoka aayambi mboka haa yamba omagano pampango yAajuda, oko ye li. 5 Iilonga yuuyambi mbyoka taa longo oyo efano nomuzizimba gwaashoka shi li megulu. Ngaashi naanaa Moses a li a lombwelwa kuKalunga pokutunga etsali, sho a ti: “Tala nawa, opo u longe ashihe palupe lwefano ndyoka u ulukilwa kondundu.” 6 Ihe Jesus okwa pewa oshilonga shuuyambi oshinene shi vule shawo, ngaashi wo ehangano ndyoka a longekidha pokati kaKalunga naantu, oli vule ndiyaka, oshoka olyi ikwatelela komauvaneko omawanawalela.
7 Oshoka ehangano lyotango ando olya li lya gwana, ando inaku pumbiwa we etiyali. 8 Onkee Kalunga ota gandja uusama kaantu ye, sho ta ti:
“Omasiku otage ya, Omuwa osho ta ti,
uuna tandi ka dhika ehangano epe pokati ketu nAaisraeli
nonezimo lyaJuda.
9 Ndika itali yelekwa nehangano ndyoka nda ningile noohekulu,
sho nda li nde ya hili mokwaako
e tandi ya tembudha muEgipiti.
Ihe inaa dhiginina ehangano lyetu nayo.
Onkee onde ya etha, Omuwa osho ta ti.
10 Ndika olyo ehangano ndyoka tandi ka ninga nAaisraeli konima yomasiku ngoka,
Omuwa sho ta ti:
Ompango yandje otandi ke yi tula momadhiladhilo gawo,
notandi ke yi nyolela momitima dhawo.
Otandi ka ninga Kalunga kawo,
nayo otaa ka ninga aantu yandje.
11 Kape na nando ogumwe ta ka longa omukwashigwana she,
po pwaa na ngoka ta ka lombwela omungandjawo ta ti:
‘Tseya Omuwa,’
oshoka ayehe otaa ka tseya ndje okuza komudhinwa sigo okomunenentu.
12 Otandi ke ya sila ohenda e tandi dhimi po omayono gawo,
noitandi ka dhimbulukwa we oondjo dhawo.”
13 Kalunga mokupopya ehangano epe, lyotango okwe li tala kutya olya kulupa; naashoka sha kulupa nosha mana ko ethimbo lyasho, otashi ka hula po mbala.
© Oshindonga Bible © Bible Society of Namibia, 2008.
