Omuwa ta pangula iimenka
1 Omuwa okwa lombwele ndje a ti: 2 “Muna gwomuntu, taalela lwokoondundu dhaIsrael, u dhi lombwele oohapu dhandje. 3 Lombwela oondundu dhaIsrael, dhi pulakene oohapu dhOmuwa — dhi uve shoka ngame, Omuwa Omupangeliawike, tandi shi lombwele oondundu niikulundundu, omakolombongo nomasilu. Otandi ka tuma egongamwele, li hanagule po omahala mpoka aantu haa saagelele iimenka. 4 Iiyambelo otayi ka kumunwa po, niiyambelo yiitsinino otayi ka teywa po. Aantu ayehe otaa ka dhipagelwa koshipala shiimenka yawo. 5 Otandi ka halakanitha omidhimba dhAaisraeli; iipongo yawo otandi ke yi halakanithila piiyambelo yawo. 6 Iilando ayihe yaIsrael otayi ka hanagulwa po, opo iiyambelo yawo ayihe niimenka yawo yi ka nyanyagulwe po; iiyambelo yawo yiitsinino otayi ka teyagulwa po, naayihe mbyoka ya ninga, otayi ka hula po. 7 Aantu otaa ka dhipagelwa apehe, naamboka taa ka hupa ko, otaa ka tseya kutya ongame Omuwa.
8 “Otandi ka hupitha yamwe, ya hunuke edhipago notaa ka halakanithilwa mokati kiigwana, 9 moka taa ka kala aapongekwa. Otaa ka dhimbulukwa ndje nokutseya kutya onde ya geele noinandi ya sila ohenda, oshoka oomwenyo dhawo kadhi na uudhiginini, odhi iteka ndje noya hokwa iimenka peha lyandje. Oyo notaa ka mbilingwa kuuwinayi wawo nokiihuna mbyoka ye yi longo. 10 Otaa ka tseya kutya ongame Omuwa, nomakumagidho gandje kage shi owala omagandagulo.”
11 Omuwa Omupangeliawike ota ti: “Hakela omake goye, tutulitha oompadhi dhoye. Kuga onkugo omolwiihuna ayihe niilonga yuupwidhi ya longwa kuIsrael. Otaa ka sa kiita, kondjala nokelega. 12 Mboka yokokule otaa kwatwa kuuvu e taa si; mboka yopopepi otaa ka dhipagelwa molugodhi; mboka taa hupu ko, otaa ka sa po kondjala. Otaa ka uva uupyundjahi wandje. 13 Omidhimba otadhi halakanene mokati kiimenka, dha kunduka iiyambelo, dha halakanena koshikulundundu kehe oshile, koondungu dhoondundu, momuzile gwomuti kehe omutalala nomomwandi kehe omunene — opehala kehe mpoka ya li haa yambele iimenka iitsinino. Nena shaa ngoka ota ka tseya kutya ongame Omuwa. 14 Eeno, otandi ka tagananeka oshikaha shandje notandi hanagula po oshilongo shawo. Otandi ke shi mbugaleka okuza kombuga yokuumbugantu sigo okoshilando Ribla muumbangalantu. Itandi ka hupitha nando ehala limwe lya kalwa kAaisraeli. Otaa ka tseya kutya ongame Omuwa.”
© Oshindonga Bible © Bible Society of Namibia, 2008.
