Hesekiel ti ikulula
1 Omuwa okwa ti: “Muna gwomuntu, kutha egongamwele lya tsa, u ikulule. Viha omafufu agehe e to ga topola iitopolwa itatu. 2 Oshititatu shago shi lungunithila moshilando, ekondeka nge lya piti. Kutha ishewe oshititatu, shi tetagula po negongamwele lyoye e to shi halakanithile pondje yoshilando. Oshihupe shi halakanithila mombepo, ongame notandi shi landulitha egongamwele lya pweywa mo. 3 Thiga po omafufu omashona, u ga dhingile momigoyo dhoonguwo dhoye. 4 Kutha ishewe gamwe e to ga umbile meziko, u ga lungunithe po. Okuza kugo omulilo otagu yaka sigo okoshigwana shaIsrael ashihe.”
5 Omuwa Omupangeliawike ota ti: “Tala kuJerusalem. Onde mu tula pondingandinga yuuyuni, a kundukwa kiilongo. 6 Ihe Jerusalem okwa tsu ondumbo niipango yandje e ti igalaleke uulunde we e vule iigwana yilwe, e vule okwaavulika kwiilongo ye mu kunduka. Jerusalem okwe ekelehi iipango yandje nokwa tindi okudhiginina omautho gandje. 7 Jerusalem, pulakena ngashingeyi shoka ngame, Omuwa Omupangeliawike, tandi ti. Omolwashoka inoo vulika koompango dhandje noino dhiginina omautho gandje, owa yono nokuyonenena, u vule iigwana ye ku kunduka. Owa lambalala ontshingo. 8 Onkee ano ngame, Omuwa Omupangeliawike, tandi ku lombwele kutya ngame omutondi gwoye. Otandi ke ku pangula epangulo montaneho yiigwana. 9 Molwiinima mbyoka wa ningi handi yi tondo, otandi ka geela Jerusalem egeelo inaandi li mu geela nale noitandi ke shi ninga we. 10 Molwashika aavali muJerusalem otaa ka lya po oyana, naanona otaa ka lya po aakuluntu yawo. Otandi ke mu geela nokuhalakanithila koombinga adhihe mboka ya hupu ko ye na omwenyo.
11 “Onkee ano ngame, ngaashi ndi na omwenyo — ndhika oohapu dhOmuwa Omupangeliawike — oshoka owa nyateke otempeli yandje nuulunde owindji niihuna mbyoka wa ningi, otandi ke ku teta po pwaa na ohenda. 12 Oshititatu shimwe shaantu yoye otashi ka sa po kelega moshilando; oshititatu oshikwawo otashi ka dhipagwa po komagongamwele pondje yoshilando; noshititatu shahugunina otandi ke shi halakanithila mombepo noku ya landula negongamwele.
13 “Oto ka kala u uvite uupyundjahi wandje wa pupyala, sigo tandi geyuluka. Uuna ayihe mbika tayi ningwa, oto ka hempulula kutya ongame Omuwa nde shi ku lombwela, sho nda geyithwa kuukolokoshi woye. 14 Omupitipo kehe gwomiigwana ye ku kunduka, ote ke ku sheka a thikama kokule.
15 “Uuna tandi geye muupyundjahi ndi ku pangule, iigwana ayihe ye ku kunduka, otayi ka haluka. Otayi ke ku tala nuunyanyali e tayi ku nyenkele. 16 Otandi ka hulitha po eloolo lyeni notamu ka sa po kondjala. Otamu ka hepekwa kondjala ya fa iikuti ya upikwa tayi mu hanagula po. 17 Otandi ka tuma ondjala niilikama yi lye po aana yeni. Otamu ka sa kuuvu nokokutilwahi kwombinzi. Otandi mu undulile iita, yi mu dhipage po. Ongame, Omuwa, nda popi.”
© Oshindonga Bible © Bible Society of Namibia, 2008.
