Okunyanda ekondeko lyaJerusalem
1 Kalunga okwa popi a ti: “Muna gwomuntu, kutha ondhopi, yi tula komeho goye, e to thaneke kombanda yayo oshilando Jerusalem. 2 Shi tula ekondeka: shi fulila omukanka, shi ndumbilila omutuni, shi yungila oontanda noku shi kundukidha niikumunithi yekuma. 3 Kutha oshikangwa shosheela e to shi dhike sha fa ekuma pokati keni noshilando. Taalela koshilando. Oshi li mekondeka lyoye. Shika otashi ningi endhindhiliko koshigwana Israel.
4-5 “Langela kolumoho lwoye, ngame notandi ke ku tsika oondjo dhoshigwana Israel. Oto ka kala omasiku 390 to hepekwa omolwoondjo dhawo. Onde ku geelele esiku limwe omolwomumvo gumwe gwepangulo lyaIsrael. 6 Ngele wa vulilwa ko, galukila kolulyo lwoye, u hepekelwe oondjo dhaJuda omasiku omilongo ne — esiku limwe omolwomumvo gumwe gwepangulo lyawo.
7 “Omeho goye ga nzanena mo ekondeka lyaJerusalem. Shi takela omunwe, u shi hunganekele. 8 Otandi ke ku manga, opo waa wape okugalukila kolupati olukwawo, sigo ekondeka lya piti.
9 “Kutha osiima, iishokelya, omakunde, oofukwa, omahangu nosiima yoombo ndatu. Yi ninga oshikwiila shohwangalahwahwa. Shika osho to ka lya omasiku 390, sho wa langela kolumoho. 10 Oto ka pitikilwa uusila wekopi limwe mesiku, u ninge oshikwiila, notashi kala sigo esiku lya landula ko. 11 Oto ka kala wo u na ondjele yomeya gokunwa, oompamba mbali mesiku. 12 Ou na okutema omulilo gwomapumba gaantu omakukutu, e to yothele ko oshikwiila montaneho yawo e to shi li po.”
13 Omuwa okwa popi a ti: “Shika otashi hungunine Aaisraeli kutya oye na okulya iikulya mbyoka yi indikwa kompango, uuna tandi ya halakanithile niilongo yaapagani.”
14 Onda yamukula nda ti: “Aawe, Omuwa Omupangeliawike! Kandi na okwiinyateka. Okuza kuunona wandje inandi lya onyama yoshinamwenyo shi isila nenge sha lika kiilikama. Inandi lya nando iikulya ya talika ya nyata.”
15 Kalunga okwa ti: “Onawa nduno, otandi ku pitika u longithe omapumba goongombe, opo u yothele ko oshikwiila shoye.”
16 Okwa tsikile ko a ti: “Muna gwomuntu, otandi ka hulitha po okugandja oshikwiila muJerusalem. Aantu yamo otaa ka lulilwa nokusa oshimpwiyu, ngele taa hawalekwa iikulya mbyoka taa li nomeya ngoka taa nu. 17 Otaa ka sa olunagela molwompumbwe yiikulya nomeya; otaa ki ihupula notaa ka thithonoka po omoluulunde wawo.”
© Oshindonga Bible © Bible Society of Namibia, 2008.
