Gog, oshilongitho shaKalunga
1 Omuwa okwa lombwele ndje a ti: 2 “Muna gwomuntu, hunganekela Gog, omukwaniilwa omukuluntu gwiigwana yaMeshek naTubal mevi lyaMagog. Mu kondjitha 3 u mu lombwele kutya ngame, Omuwa Omupangeliawike, omutondi gwe. 4 Otandi ke mu galukila, tandi mu tula ondjolo moondjego e tandi mu kookolola po pamwe naakwiita ye ayehe. Etangakwiita lye olyo enenenene li na uukambe naakayili yawo ye na iikeleketi. Omukwiita kehe a humbata ehuuyanza ye a homata egongamwele. 5 Aantu ya za kuPersia, Kush naLibia, oye li pamwe nayo, naayehe oye na omahuuyanza nomagala giiyela. 6 Aakwiita ayehe yomavi Gomer naBet Togarma muumbangalantu oye li pamwe nayo, naantu oyendji yomiigwana yilwe. 7 Mu lombwela, i ilongekidhe nomatanga ge agehe ga langele komauta. 8 Nge pwa piti omimvo odhindji, otandi ke mu lombwela a matukile oshilongo moka mwa gongelwa aantu yomiigwana oyindji noye li po yaa na uumbanda wiita. Ota ka homona oondundu dhaIsrael, ndhoka dha li dha mbugala nodha ningi eputu ethimbo ele, ihe ngashingeyi omu na aantu ye li mombili. 9 Oye pamwe netangakwiita lye niigwana oyindji pamwe naye otaa ka homona ya fa oshikungulu nongiikogo tayi kwidhidhike evi.”
10 Omuwa Omupangeliawike ota lombwele Gog ta ti: “Esiku uuna tali ya, oto ka pangela ompangela ombwinayi. 11 Oto ka tokola, u homone oshilongo sha weya nokuponokela aantu aanambili ya kala miilando yaa na eshigo lyedhingililokuma moka mu na omiyelo nomakumba. 12 Oto ka hakana nokuyuga aantu mboka ya kala miilando mbyoka ya li ya kumuka po nale. Oya gongelwa ya kongololwa miigwana, nongashingeyi oye na iimuna nuuyamba noye li poompagiila dhuuyuni. 13 Aasheba nAadedan naahalithi yokiilando yokuSpania otaye ku pula: ‘Owa hiya tuu etangakwiita lyoye, opo u homone u hakane nokuyugulula iihakanwa? Owa hala tuu okulikola oshisiliveli noshingoli, iimuna nomaliko, u ye niihakanwa mbyoka ayihe?’ ”
14 Omuwa Omupangeliawike okwa tumu ndje, ndi hunganekele Gog shoka Omuwa te mu lombwele: “Ngashingeyi manga aantu yandje Aaisraeli ye li megameno, oto ka pita mo 15 mehala lyoye lyokokule kuumbangalantu, to wilike etanga enene lyaakwiita ya za miigwana oyindji, ayehe ya kayila uukambe. 16 Oto ka ponokela aantu yandje Aaisraeli wa fa oshikungulu tashi taakana oshilongo. Esiku otali ya, uuna tandi ke ku tuma, u homone evi lyandje, opo ndi ulukile iigwana, nkene ndi li, ndi holole uuyapuki wandje mushoka tandi longo mungoye. 17 Ongoye tuu nda li tandi popi nale, sho nda popitha aapiya yandje, aahunganeki yaIsrael, kutya momasiku tage ya otandi ka pendutha omuntu a ponokele Israel.” Omuwa Omupangeliawika oye a popi.
Kalunga ta geele Gog
18 Omuwa Omupangeliawike ota ti: “Mesiku ndyoka Gog ta homona Israel, ondjahi yandje otayi tukuluka. 19 Otandi popi muupyundjahi wandje kutya esiku ndyoka otaku kala ekakamo edhigu mevi lyaIsrael. 20 Oohi noondhila adhihe, iinamwenyo ayihe iinene niishona naantu ayehe kombanda yevi otaa ka kakama molwokutila ndje. Oondundu otadhi ka gwila po, omatayimanya otaga ka mwahuka, nekuma kehe otali ka ihunyina mumwe. 21 Otandi ka tilitha Gog niiponga oyindji. Ongame, Omuwa Omupangeliawike, nda popi. Aantu ye otaa ka taganekelathana omagongamwele. 22 Otandi ke mu geela nelega netiko lyombinzi. Omvula yepoola noompawe mumwe noombadhi, omulilo nosulufuli otandi yi mu lokithile pamwe netangakwiita lye niigwana oyindji mbyoka ya gama kuye. 23 Pahedhi ndjika otandi ka ulukila iigwana ayihe kutya ngame omunene nomuyapuki. Otaa ka tseya kutya ongame Omuwa.”
© Oshindonga Bible © Bible Society of Namibia, 2008.
