Aasita yaIsrael
1 Omuwa okwa lombwele ndje a ti: 2 “Muna gwomuntu, hunganekela aaleli yaIsrael. Hunganeka u ya lombwele shoka ngame, Omuwa Omupangeliawike, tandi ya lombwele. Ote ti: Yaye ne aasita yaIsrael! Ohamu ilitha ne yene, itamu hungu oonzi. 3 Otamu suulula omahini, tamu zala oonguwo dhomafufu goonzi notamu dhipaga tamu li po oonzi dho ondoka. Ihe ne itamu litha oonzi. 4 Ndhoka dha nama inamu dhi sila oshimpwiyu, mu mange ndhoka dha teka ne mu pange ndhoka tadhi ehama, mu galule ndhoka dha puka nenge mu konge ndhoka dha kana. Ihe omwe dhi ningi onyanya. 5 Molwaashoka oonzi dhaa na omusita, odha halakana, niilikama oye dhi dhipaga noku dhi lya po. 6 Onkee oonzi dhandje odha pukila koondundu nokiikulundundu. Odha halakanene kombanda yevi alihe, nokape na ngoka te dhi kongo nenge a kambadhale e dhi pulidhe.
7 “Ne aasita, pulakeneni ano shoka ngame, Omuwa, tandi mu lombwele. 8 Oshili, ngaashi ngame Kalunga omunamwenyo, pulakenii ndje nawa. Oonzi dhandje odha hakanwa kiilikama, mbyoka ye dhi dhipaga noku dhi lya po, oshoka kakwa li omusita. Aasita oya li kaaye na ko nasha noonzi. Oyi ilitha yo yene yo inaa litha oonzi. 9 Onkee ano pulakenii ndje, ne aasita. 10 Ongame, Omuwa Omupangeliawike, te popi te ti, ngame omutondi gweni. Otandi ke mu kutha oonzi dhandje noitandi pitika we, mu ninge aasita yokwiilitha ne yene. Otandi ka yugulula oonzi dhandje miikaha yeni noitandi pitika we, mu dhi lye po.”
Omusita omwaanawa
11 “Ongame, Omuwa Omupangeliawike tandi mu lombwele kutya ongame mwene tandi ka konga oonzi dhandje noku dhi sila oshimpwiyu, 12 ngaashi omusita ta gongele oonzi dhe ndhoka dha halakanithwa e te dhi eta pamwe ishewe. Otandi ke dhi kongolola ko komahala agehe hoka dha halakanithilwa ko esiku lyomuzimbi nolyiikogo yoonzigi.Otandi ke dhi kongolola ko e tandi dhi hupitha. 13 Otandi ke dhi kutha kiilongo yaakwiilongo, tandi dhi gongele pamwe e tandi dhi eta mevi lyadho dhene. Otandi ke dhi fala koondundu nokoothithiya dhaIsrael e tandi dhi napitha momaunapelo gomwiidhi omutalala. 14 Otandi ke dhi napitha nombili moondundu nomomasilu gomwiidhi gweleshuleshu. Otadhi ka napa komahala agehe ga ziza gaIsrael. 15 Ongame mwene tandi ka ninga omusita gwoonzi dhandje notandi ke dhi gondjitha nawa. Ongame, Omuwa Omupangeliawike, nda popi.
16 “Otandi ka konga ndhoka dha kana nokugalula ndhoka dha puka, otandi ka manga ndhoka dha teka nokupanga ndhoka tadhi alukwa. Ihe ndhoka dho ondoka nodhi na oonkondo, otandi ke dhi yonagula po, oshoka ngame omusita tandi ningi shoka shu uka.
17 “Ne oonzi dhandje, ngame, Omuwa Omupangeliawike, otandi mu lombwele kutya otandi mu pangula ne amuhe notandi yoolola oonzi oombwanawa moonzi oombwinayi, ote kutha oonzi miikombo. 18 Ihe inashi mu gwanena nani okulya ashike omwiidhi gweleshuleshu, sho tamu lyatagula ngoka inaamu gu lya! Omwa nu omeya omayelele nomwa vongola ngoka inaamu ga nwa! 19 Oonzi dhandje dhilwe odhi na okulya omwiidhi ngoka mwa lyatagula nokunwa omeya ngoka mwa vongola.
20 “Onkee ano ngashingeyi, ngame, Omuwa Omupangeliawike, tandi mu lombwele kutya mokupangula otandi ka yoolola oonzi ndhoka dho ondoka naandhoka dha nanga. 21 Omwa undula ndhoka tadhi alukwa dhi ye pooha noku dhi tidha dhi ze mo moshigunda. 22 Ihe ngame otandi ka hupitha oonzi dhandje noitandi pitika dhi tsuwe. Otandi ka utha onzi kehe nokuyoolola oombwanawa moombwinayi. 23 Otandi ke dhi pa omukwaniilwa a fa omuntu gwandje David, a ninge omusita gwadho, oye note ke dhi litha. 24 Ongame, Omuwa, tandi ka ninga Kalunga kadho, nomukwaniilwa a fa omuntu gwandje David ota ka ninga omuleli gwadho. Ongame nda popi. 25 Otandi ka hangana nadho ehangano ndyoka tali dhi gamene. Otandi ka mana mo iilikama ayihe iigeyi moshilongo, opo oonzi dhandje dhi kale dhaa na ombudhi momalundu notadhi ka lala nokukothela momigulu.
26 “Otandi ke dhi yambeka noku dhi kaleka dha kunduka ondundu yandje ondjapuki. Oko hoka tandi ke dhi yambeka niihomo yomvula, uuna dhe yi pumbwa. 27 Omiti otadhi ka ima iiyimati, omapya otaga ka vala iilya, noshaa ngoka ota ka kala nombili moshilongo shawo yene. Uuna tandi tokola omalyenge gaantu yandje noku ya mangulula miikaha yaapiki yawo, nena otaa ka tseya kutya ongame Omuwa. 28 Iigwana yaapagani itayi ke ya yuga we, niilikama itayi ke ya dhipaga we noku ya lya po. Otaa ka kala ye na ombili, nokaku na ngoka te ya halutha we. 29 Otandi ke ya pa omatathapya e tandi hulitha po ondjala moshilongo. Iigwana yilwe itayi ke ya sheka we. 30 Shaa ngoka ota ka tseya kutya otandi gamene Israel, noyo aantu yandje. Ongame, Omuwa Omupangeliawike, nda popi.
31 “Ne oonzi dhandje, oshigunda shoka tandi palutha, one aantu yandje, nangame oKalunga keni,” Omuwa Omupangeliawike osho ta ti.
© Oshindonga Bible © Bible Society of Namibia, 2008.
