Eimbilo lyoosa dhaTiro
1 Omuwa okwa lombwele ndje a ti: 2 “Muna gwomuntu, imbila Tiro eimbilo lyoosa, 3 oshilando shoka shi li polungenge lwefuta notashi pindike niigwana yi li komunkulofuta. Shi lombwela shoka Omuwa Omupangeliawike ta ti:
Tiro, oto itangele eopalo lyoye.
4 Egumbo lyoye efuta.
Aatungi yoye oye ku ningi wa fa osikepa yo opala.
5 Iipilangi yoye ayihe oyomikiperesi dha za kondundu Hermon,
olwoondje lwoye olwomusendeli gwokuLibanon.
6 Oomwandi dhokuBaasha omo mwa hongwa iidhugithoti yoye,
noontala dhoye odha pangelwa niipilangi yomikiperesi dhokuKipro,
ya takelwa uulenga womasipa goondjamba.
7 Oothayila dhoye odholiina yokuEgipiti dha hondjelwa uulenga.
Otadhi dhimbululwa nuupu kokule.
Oondunda dhoye dhokugamena kuupyu wetango
odha ningwa nomalapi ga tungika omatiliganembwilili gokontuntu Kipro.
8 Aadhugi yoye oya zi kiilando Sidon naArvad.
Oonkulungulela dhoye mwene odha li aathayili.
9 Omangomba ga pyokoka gokuBiblos
oga pangele shoka sha teka mungoye.
Aathayili ya za akuhe ku na oosikepa,
oya halitha moositola dhoye.
10 “Aakwiita ya za kuPersia, Lidia naLibia, oya yakula metangakwiita lyoye. Oya tsilike omahuuyanza nomagala gawo giiyela moongulu dhaakwiita yoye. Oyo aantu ye ku etele esimano. 11 Aakwiita ya za kuArvad, oya tonatele omadhingililokuma goye, naantu ya za kuGamad, oya langele ooshungo dhoye. Oya tsilike omahuuyanza gawo komadhingililokuma goye. Oyo aantu mboka ye ku pe eopalo.
12 “Owa halitha muSpania nowa landitha iinima yoye yomaludhi ogendji oshisiliveli, osheela oshiluudhe, otina noshumbu. 13 Owa halitha muGreka, Tubal naMeshek nowa landitha iinima yoye, aapika niikwaniipangitho yoshikushu. 14 MuBet-Togarma iinima yoye owe yi pingakanitha noonani, uukambe wolugodhi nomamulutiya. 15 Aarodos oya pindike nangoye; aantu yokomavi ogendji komunkulofuta oye ku pe omayego goondjamba noshiti oshiluudhe mokupingakanitha iinima yoye. 16 Aasiria oya landa nangoye. Oye ku etele omamanya goturkoisi, iiyata iitiliganembwilili, iiyata ya hondjelwa uulenga, ooliina dha tungika, oomba nomamanya gojaspes, ya lande iipindi yoye oyindjiyindji. 17 Juda naIsrael oya futu iipindi yoye niilya, nomagadhi goonyushi, nomagadhi gooholivi noniitoyithi. 18-19 Aadamaskus oya pindike nangoye, niilandithomwa yoye oye yi futu nomaviinu gokuHelbon nomafufu goonzi gokuZahar. Oya pingakanitha iinima yoye nosheela oshiluudhe niitoyithi. 20 Aadedan oya pingakanitha iinima yoye noombanza nomakumbatha gokomitumba dhuukambe. 21 Aayarabia naapangeli yoshilongo Kedar oya futu iipindi yoye noonzigona, noonzi noniikombo. 22 Iipindi yoye aahalithi Aasheba nAarama oya pingakanitha niizimba iitoye, nomamanya ge na ondilo nonoshingoli. 23 Iilando Haran, Kanne naEden, aahalithi yaSheba, iilando yaAssur naKilmad ayihe oya pindike nangoye. 24 Oye ku landitha oonguwo dhuufuuli, iiyata iitiliganembwilili naambyoka ya hondjelwa uulenga, oombanza dhoombapa dha yela noongodhi dha yogohekeka. 25 Iipindi yoye oya humbatwa moosikepa oonene dhoofulaha.
Ongoye owa li wa fa osikepa mefuta
ya longelwa ofulaha ondhigu.
26 Aadhugi yoye sho ye ku fala kefuta,
ombepo yokuuzilo oye ku etele oshiponga
u li kokule nevi.
27 Uuyamba woye auhe wiipindi,
aathayili yoye ayehe naadhugi,
omangomba mokupangela osikepa
naahalithi yoye,
aakwiita ayehe mosikepa —
ayeheyehe oya kanene mefuta,
osikepa yoye sho ya teka.
28 Onkugo yaathayili taa si omeya,
oya tukulutha ewi komunkulo.
29 Osikepa kehe oya thigwa po,
nomuthayili kehe a yi komunkulo.
30 Ayehe otaye ku lili omahodhi omapyu.
Otayi igundu ontsi momitse
yo taa galangata momutoko.
31 Otaye ku ikululile omitse dhawo,
notaa zala omahahi.
Oomwenyo dhawo odha lulilwa
e taa lili.
32 Otaye ku izizimine eimbilo lyoosa:
‘Itatu vulu okuyeleka Tiro,
Tiro ngoka ngashingeyi a mwena mefuta.
33 Uuna iipindi yoye ya kondo omafuta,
owa mana po oompumbwe dhoshigwana kehe.
Aakwaniilwa oya ningi aayamba
okuuyamba womaliko goye.
34 Ngashingeyi owa tekela mefuta;
ou li wa ningina muule wefuta.
Omaliko goye naalongeli yoye
oya ningine mefuta pamwe nangoye.’
35 “Ayehe ya kala komunkulofuta, oya tilithwa koshiponga shoye. Naakwaniilwa yawo otaa haluka, neshololo olya nyolelwa miipala yawo. 36 Wa kana, wa kana sigo aluhe. Aahalithi muuyuni auhe oya haluka, ya tila pamwe oshiponga shoye otashi ya adha wo.”
© Oshindonga Bible © Bible Society of Namibia, 2008.
