Ammon ta hunganekwa
1 Omuwa okwa lombwele ndje a ti: 2 “Muna gwomuntu, hunganekela oshilongo Ammon. 3 Ya lombwela ya pulakene shoka ngame, Omuwa Omupangeliawike, tandi ti: Owa li wa nyanyukilwa okumona otempeli yandje ya nyatekwa, okutala evi lyaIsrael lya mbugalekwa nokumona Aajuda taa yi muupongekwa. 4 Owa li wa nyanyukwa, ihe otandi etha omazimo gomombuga yokuuzilo ge ku sinde. Otaa ka yunga oontanda dhawo moshilongo shoye e taa kala mo. Otaa ka lya iiyimati notaa ka nwa omahini goye. 5 Oshilando Rabba otandi shi shitukitha uunapelo woongamelo, noshilongo ashihe Ammon eputu lyokunapa oonzi, opo u tseye kutya ongame Omuwa.”
6 Omuwa Omupangeliawike ota ti: “Owa hakele nomake nokunuka kenyanyu. Owa dhini oshilongo Israel. 7 Molwaashoka we shi ningi, otandi ke ku gandja miikaha yiigwana yilwe mbyoka tayi ke ku yuga. Otandi ke ku hanagula po thiluthilu noito ka ninga we oshigwana nenge u kale noshilongo shoye mwene. Nena oto ka tseya kutya ongame Omuwa.”
Moab ta hunganekwa
8 Omuwa Omupangeliawike okwa ti: “Molwaashoka Moab a popi ta ti: ‘Juda okwa fa iigwana yilwe,’ 9 otandi ka ponokelitha iilando mbyoka ya shiga ongamba yaMoab, mwa kwatelelwa iilando yo opala — Bet Jeshimot, Baal Meon naKiriataim. 10 Otandi ka sinditha Moab komazimo gomombuga yokuuzilo pamwe naAmmon, opo Moab kaa ninge we oshigwana. 11 Otandi ka geela Moab, notaa ka tseya kutya ongame Omuwa.”
Edom ta hunganekwa
12 Omuwa Omupangeliawike okwa ti: “Aaedom oya galulile Juda ondjahi yonyanya, nondjahi ndjoka ye etele Edom ondjo. 13 Ngashingeyi otandi tseyitha kutya otandi ka geela Edom notandi dhipaga aalumentu ayehe niimuna. Otashi ka ninga eputu okuza koshilando Teman sigo okoshilando Dedan, aantu notaa ka dhipagelwa molugodhi. 14 Oshigwana shandje Israel otashi ka galulila Edom ondjahi omolwandje, notashi ka ninga Edom a tililwe ondjahi yandje ondhigu. Edom ota ka tseya kutya oku mu galulila ondjahi yandje otaku ti ngiini.” Omuwa Omupangeliawike oye a popi.
Filistia ta hunganekwa
15 Omuwa Omupangeliawike okwa ti: “Aafilisti oya galulile aatondi yawo ondjahi ondhigu e taye ya hanagula po muutondwe. 16 Omolwashoka tandi tseyitha kutya otandi ka ponokela Aafilisti noku ya komba po. Otandi ka yonagula po ayehe mboka ya kala kooha dhefuta. 17 Otandi ke ya geela noonkondo e tandi ya galulile ondjahi. Otandi ya poolele ondjahi yandje. Nena otaa ka tseya kutya ongame Omuwa.”
© Oshindonga Bible © Bible Society of Namibia, 2008.
