Ontakumandjimbo yoluhodhi
1 Izizima u imbe ontakumandjimbo yaawa yaIsrael 2 u tye:
“Nyoko okwa li a fa onkoshi onkiintu!
Oya putudhile uunkoshona wayo mokati koonkulunkoshi.
3 Okankoshona kamwe oye ka longo okuyewa;
oka ningi onkoshi hayi kwata aantu.
4 Iigwana oye yi kundana
noye yi tula mekelo.
Onolugoololo ye yi kokele kuEgipiti.
5 Yina ya tegelele, sigo etegameno lya hulu.
Oya tekula okankoshona kayo kalwe.
Oka koko noka ningi onkulunkoshi.
6 Sho ya koko lela,
oyi inyowo pamwe noonkwawo.
Nayo wo oyi ilongo okuyewa
nohayi kwata aantu.
7 Oya teyagula po oohote,
oya kumuna po iilando.
Aanashilongo oya haluka kendundumo lyayo.
8 Iigwana oya gongala yi yi kondjithe;
aantu oya zi akuhe.
Oya tege omatavu gawo
e taye yi tula mekelo.
9 Oye yi tula molugumbo
e taye yi fala komukwaniilwa gwaBabilon.
Oye yi tula melangelo,
opo endundumo lyayo lyaa uvike we koondundu dhaIsrael.
10 “Nyoko okwa li a fa omuviinu gwa tsikwa pomulonga.
Sho kwa li omeya ogendji,
omuviinu ogwa zizi gwi imi oomviinu.
11 Iitayi yagwo oya kolo noya koko,
yi hongwe oondhimbo dhuukwaniilwa.
Omuviinu ogwa koko sigo okiikogo;
shaa ngoka okwe gu mono gwa ziza omuleeleka.
12 Iikaha yomugeyentu oye gu dhakula mo
e tayi gu umbile pevi.
Ombepo yokuuzilo oya kukutike iiyimati yagwo.
Iitayi yagwo oya pomponwa ko;
oya kukuta noya fikwa po.
13 Ngashingeyi ogu li po gwa tsikwa mombuga,
montale, mevi lyaa na omeya.
14 Ekota lyomuviinu olya hwama omulilo,
ngoka gwa lungunitha iitayi niiyimati.
Iitayi itayi ka kola we,
yi hongwe oodhimbo dhuukwaniilwa.”
Ontakumandjimbo ndjika oyoluhodhi; oya ningi eimbilokemo.
© Oshindonga Bible © Bible Society of Namibia, 2008.
