1 Omuwa okwa lombwele ndje 2 e ta ti: “Eyeletumbulo ndika olyashike, aantu taye li tumbululula moshilongo Israel?
‘Oohekulu oya lile omagongwa gomandjembele,
nomayego goyana oga ningi uuge.’
3 “Oshili ngaashi ngame Kalunga omunamwenyo,” Omuwa Omupangeliawike ta ti, “itamu ka tumbululula we eyeletumbulo ndika muIsrael. 4 Omwenyo gwomuntu kehe ogwandje, omwenyo gwahe nomwenyo gwomwanamati ogwandje. Omuntu ngoka ta yono, oku na okusa.
5 “Natu tye oku na omuntu omwaanawa, omuyuuki nomunashili. 6 Iha simaneke iimenka yAaisraeli noiha li oohula dha saagelelwa pomahala giinonoma yuupagani. Iha nyateke omukiintu gwamushiinda she nenge a lale nomukiintu e li komwedhi. 7 Iha kotokele nenge a yuge mukwawo. Oha shunitha shoka a pelwe ombambyona; noha palutha aasindjala nokuzaleka aanankayi. 8 Iha pula ontanitho yiimaliwa ya liwa ongunga. Oha tindi okulonga uuwinayi e ta tokola etokolo lyu uka moontamanana. 9 Omuntu a tya ngaaka oha vulika kiipango yandje noha dhiginine omautho gandje. Oye omuyuuki nota kala e na omwenyo,” Omuwa Omupangeliawike osho ta popi.
10 “Natu tye ihe, omuntu a tya ngaaka oku na omwanamati ha yugu ye ha dhipaga, ha ningi iinima mbyoka 11 inaayi ningwa kuhe. Oha li oohula dha saagelelwa pomahala giinonoma yuupagani noha hondele aakulukadhi yaantu. 12 Oha kotokele oohepele, oha yugu, ye ha tindile shoka a pelwe ombambyona. Oha yi komahala giinonoma yuupagani, oha simaneke iimenka yi nyanyalitha, 13 oha li ongunga yiimaliwa, a mone ontanitho. Ota kala ngaa e na omwenyo? Aawoo! Ite gu mono! Okwa longo iihuna ayihe mbika, onkee ota ka sa. Ota ka kala e na uusama weso lye mwene.
14 “Natu tye natango, omuntu nguka omutiyali oku na omwanamati, ngoka e wete iihuna ayihe tayi longwa kuhe, ihe ye ita landula oshiholelwa shahe. 15 Iha simaneke iimenka yAaisraeli noiha li oohula dha saagelelwa pomahala giinonoma yuupagani. Iha hondele omukiintu gwamukwawo 16 nenge a hepeke omuntu nenge e mu yuge. Oha shunitha shoka a pelwe ombambyona. Oha palutha aasindjala noha zaleke aanankayi. 17 Oha tindi okulonga uuwinayi noiha li oongunga dhiimaliwa, a mone ontanitho. Oha dhiginine omautho gandje e ta vulika kiipango yandje. Oye ita si moluulunde wahe, ihe ota kala shili e na omwenyo. 18 Ihe he, ngoka a kotokele, a yugu nokwa longele aantu uuwinayi, okwa si moluulunde we mwene mboka a ningi.
19 “Ihe ne otamu pula tamu ti: ‘Omolwashike omwana inaa hepekwa omoluulunde wahe?’ Eyamukulo olyo ndika kutya omwana okwa ningi shoka shu uka nosho opala. Okwa vulika kiipango yandje ayihe e te yi dhiginine nawa. Onkee ta kala shili e na omwenyo. 20 Ngoka ta yono, oye e na okusa. Omwana ita hepekelwa uulunde wahe, nahe ita geelelwa uulunde womwana. Omuyuuki ota galulilwa uuwanawa molwiilonga ye iiwanawa, ihe omukeenakalunga ota geelelwa uuwinayi e u ningi.
21 “Omukeenakalunga ngele ote etha uulunde we e ta dhiginine iipango yandje, ngele ota longo shoka shu uka nosho opala, ita ka sa; ota kala e na omwenyo. 22 Uulunde we otau dhimwa po; nota kala e na omwenyo, oshoka okwa ningi shoka shu uka. 23 Ondi nyanyukilwe ando eso lyomukeenakalunga?” Osho Omuwa Omupangeliawike ta pula. “Aawe, ihe onda hala, i itedhulule, opo a kale e na omwenyo.
24 “Ihe omuyuuki ngele ote etha uuyuuki we e ta tameke okulonga uuwinayi, iilonga yiihuna ayihe mbyoka hayi longwa kaakaanakalunga, ota kala tuu e na omwenyo? Aawe! Kape na nando uuyuuki mboka a ningile tau dhimbulukiwa we. Ota ka sa moluukolokoshi nuulunde we.
25 “Ihe ne natango otamu ti: ‘Omuwa ita ningi nawa nando.’ Pulakenii ndje, ne Aaisraeli! Otamu dhiladhila kutya omukalo gwandje gwokuninga iinima mbika kagu li mondjila. Ne one kaamu li mondjila. 26 Omuyuuki ngele te etha okulonga uuyuuki nota tameke okuyona e ta si, ota si moluuwinayi mboka a longo. 27 Omukeenakalunga ngele te etha uulunde we e ta ningi shoka shu uka noshiwanawa, ota hupitha omwenyo gwe. 28 Okwa dhimbulula shoka ta ningi e te etha okuyona, onkee ano ita si shili, ihe ota kala e na omwenyo. 29 Ne Aaisraeli otamu ti: ‘Shoka Omuwa ta ningi, inashi uka nando.’ Otamu dhiladhila kutya omukalo gwandje inagu uka? Ndishi ne one kaamu li mondjila.
30 “Ngashingeyi ngame, Omuwa Omupangeliawike, otandi mu lombwele ne Aaisraeli kutya otandi ka pangula kehe gumwe gwomune pailonga ye. Etheni uulunde mboka tamu ningi, inamu etha uulunde u mu hanagule po. 31 Etheni iilonga ayihe yuulunde mwe yi longo ne mu kale mu na ombepo ompe nomwenyo omupe. Omolwashike mwa hala okusa, ne Aaisraeli?” 32 Omuwa Omupangeliawike ota ti: “Ngame itandi nyanyukilwa eso lyomuntu. Itedhululeni, opo mu kale mu na omwenyo.”
© Oshindonga Bible © Bible Society of Namibia, 2008.
