Eadhimo lyOmuwa tali thigi po otempeli
1 Onda tala kondunda komitse dhiinamwenyo yomawawa nokombanda yayo okwa li sha sha fa oshipangelapundi sha ningwa memanya lyosafire. 2 Kalunga okwa lombwele omulumentu ngoka a zala oonguwo dholiina a ti: “Inda pokati komagulutemba kohi yiinamwenyo e to udhitha omake goye nomakala ga hanya. Ga halakanithila noshilando.”
Onde mu tongolola, sho ta yi. 3 Iinamwenyo yomawawa oya li ya thikama kuumbugantu wotempeli, sho a yi mo, oshikogo oshu udha ehale lyaayambi. 4 Eadhimo lyOmuwa olya yeluka kombanda yaakerubi lyu uka kosheelo shotempeli, nomehale omwa li mwa udha uuyelele. 5 Oshihomo shomawawa gaakerubi osha li shu uvika sigo okehale enene. Osha li tashi pupu sha fa ewi lyaKalunga Omunankondoawike.
6 Omuwa sho a lombwele omulumentu ngoka a zala oonguwo dholiina, a kuthe omakala gamwe mokati komagulutemba ngoka ga li kohi yaakerubi, omulumentu okwa yi mo e ta thikama pokugulu kumwe. 7 Omukerubi gumwe okwa tula oshikaha she momulilo ngoka gwa li mokati kawo, a kutha mo omakala gamwe e te ga tula miikaha yomulumentu ngoka a zala oonguwo dholiina. Omulumentu okwa taamba omakala gomulilo e ta yi.
8 Kohi yewawa kehe lyomukerubi okwa monika sha sha fa oshikaha shomuntu. 9-10 Onda mono wo kutya okwa li ku na omagulutemba gane ga faathana, kumwe okombinga yomukerubi kehe. Omagulutemba otaga adhima ga fa emanya lyokrisoliti, noshaa hoka okwa li ku na okugulutemba okukwawo hoka kwe ku shigakana mokati. 11 Aakerubi nge taa yi, otaa vulu okuuka shaa hoka inaa punguluka. Otaa uka kombinga ndjoka ya hala okuya pwaa na epunguluko lyasha. 12 Omalutu gawo, oombunda, omaako, omawawa nomagulutemba ogu udha omeho. 13 Omagulutemba ngaka oga li ga faathana naangeyaka nda mwene memoniko lyotango.
14 Omukerubi kehe okwa li e na iipala ine, shimwe oshongombe, shimwe oshomuntu, shimwe oshonime nashimwe oshekodhi. 15 (Aakerubi mbaka oyo ngaa mbeyaka nda mwene pomulonga Kebar.) Aakerubi ngele taa yelukile mewangandjo 16 notaa yi, omagulutemba otage ende pamwe nayo. Uuna taa yalaleke omawawa gawo taa tuka, omagulutemba inaga thigala po. 17 Uuna aakerubi taa kankama, omagulutemba otaga kankama wo; uuna aakerubi taa tuka, omagulutemba otaga yi pamwe nayo, oshoka aakerubi taye ga utha.
18 Eadhimo lyOmuwa nolya zi po posheelo shotempeli nolya yi kombanda yaakerubi. 19 Oya yalaleke omawawa gawo e taa tuka po pevi, manga nde ya tongolola, nomagulutemba oga yi pamwe nayo. Oya kankama pomweelo gwotempeli gwokuuzilo, neadhimo olya li kombanda yawo. 20 Onde ya dhimbulula kutya oyo aakerubi mbeyaka nda mwene kohi yaKalunga kaIsrael pomulonga Kebar.
21 Shaa ngoka okwa li e na iipala ine nomawawa gane, nokewawa kehe okwa li ku na sha sha fa oshikaha shomuntu. 22 Iipala yawo oya li ya fa naanaa iipala mbiyaka nda mwene pomulonga Kebar. Shaa ngoka okwe ende u ukilila komeho.
© Oshindonga Bible © Bible Society of Namibia, 2008.
