HESEKIEL 1 - Oshindonga Bible (ONDB)

Emoniko lyotango lyaHesekiel ta mono Kalunga

Iinamwenyo neadhimo lyOmuwa

1 Mesiku etitano lyomwedhi omutine gwomumvo omutimulongo nomutitatu, ngame, omuyambi Hesekiel yaBusi, sho nda kala pamwe naapongekwa Aajuda pomulonga Kebar muBabilon, egulu olye eguluka nonda mono emoniko lyaKalunga. 2 (Ogwa li omumvo omutitano, sho omukwaniilwa Jehoiakin a li a falwa muupongekwa.) 3 Mwiyaka muBabilonia pomulonga Kebar ondu uvu Omuwa ta popitha ndje, noshikaha she osha thinda ndje.

4 Onda ligamene nonda mono okambiya taka zi kuumbangalantu, ka fa oshikogo oshinene sha geta omulilo, newangandjo lye shi kunduka olya li lya hanya. Mokati kasho omwa li eadhimo tali tayima, lya fa oshikushu sha hanya. 5 Mokati kokambiya onda ndhindhilike mo iinamwenyo ine molupe lwomuntu, 6 ihe kehe shimwe shomuyo osha li shi na iipala ine nomawawa gane. 7 Omagulu gayo oga li gu ukilila, noya li yi na omakondo ga fa gongombe. Taga adhima ga fa oshikushu sha kwehulwa. 8 Kakele kiipala ine nomawawa gane, kehe shimwe oshi na iikaha ine, oshikaha shimwe kohi yewawa kehe. 9 Omawawa gaali goshinamwenyo kehe oga li ga yalalekwa taga gumathana nogoshikwawo. Mokweenda oyu ukilila owala, inayi punguluka.

10 Oshinamwenyo kehe osha li shi na iipala ine: komeho oshipala shomuntu, kolulyo oshipala shonime, kolumoho oshipala shongombe nokonima oshipala shekodhi. 11 Omawawa gaali goshinamwenyo kehe oga li ga yeluka ga gumathana noondungu dhomawawa goshinamwenyo kehe she shi egama, nomawawa gaali oga li ga lambalala olutu lwasho. 12 Oshinamwenyo kehe osha li sha tala koombinga adhihe ne, onkee ongundu ya vulu okuya shaa hoka ya hala, pwaa na epunguluko lyasha.

13 Mokati kiinamwenyo omwa li sha sha geta sha fa onyeka, tashi inyenganyenga aluhe. Omulilo ogwa li gwa yaka gu na omalaka taga igandjana. 14 Iinamwenyo oya telagana nokuuka huka naahwiyaka ngeshelo lyolwaadhi.

15 Sho nda tongolola iinamwenyo, onda mono omagulutemba gane ga guma pevi; okugulu kumwe okwa li kombinga yoshinamwenyo kehe. 16 Omagulutemba agehe gane oga li ga faathana, shaa nkoka otaku adhima kwa fa emanya li na ondilo, noshaa hoka okwa li ku na okugulutemba okukwawo kwe ku shigakana mokati, 17 opo okugulutemba kehe otaku ngoongola mokati koombinga adhihe ne. 18 Omigoyo dhomagulutemba odha li dhu udha omeho. 19 Shaa hoka iinamwenyo tayi uka, nomagulutemba oko taga uka pamwe nayo; niinamwenyo nge tayi yeluka po pevi, nomagulutemba osho taga ningi wo. 20 Iinamwenyo otayi yi shaa nkoka ya hala, nomagulutemba otaga ningi naanaa, ngaashi iinamwenyo tayi ningi, oshoka iinamwenyo otayi ga utha. 21 Onkee shaa tuu iinamwenyo tayi yi nenge tayi thikama nenge tayi uka mombanda, nomagulutemba osho naanaa taga ningi wo.

22 Kombanda yomitse dhiinamwenyo okwa li ondunda ya tungwa momamanya gokristali taga adhima. 23 Iinamwenyo oya li meni lyondunda, shaa shoka sha yalaleka omawawa gaali gu uka pushoka shi li pusho, noshi isiikile nomawawa gaali. 24 Ondu uvu oshihomo shomawawa gayo, sho tayi papama mokutuka. Oshihomo shoka osha fa shefuta, sha fa oshihomo shetangakwiita enene, sha fa oshihomo shaKalunga Omunankondoawike. Nge ya lambele, otayi gonyo omawawa gayo, 25 ihe natango oshihomo otashi pupu pombanda yondunda komitse dhayo.

26 Kombanda yondunda yayo okwa li sha sha fa oshipangelapundi sha ningwa mosafire, nokoshipangelapundi kwa kuutumba nakukala a fa omuntu. 27 Olupe lwe olwa fa eadhimo lyoshikushu shi li meziko lya hanya. Koombinga adhihe ota tayima uuyelele wo wene. 28 Meadhimo omwa li omalwaala agehe guutamvula. Osho sha li olupe lweadhimo lyOmuwa.