Iipango Omulongo
(Eks. 2:1-17)1 Moses okwa hiya Aaisraeli ayehe e ta ti kuyo: “Aaisraeli ne, pulakeneni oompango adhihe ndhoka tandi mu pe nena. Dhi ilongeni, ne mu vulike kudho shili. 2 Omuwa Kalunga ketu okwa hangana natse pondundu Sinai. 3 Ina hangana nootatekulu ayeke, ihe onatse atuhe mboka tu na omwenyo ngashingeyi. 4 Mpeyaka pondundu okwa popi nane oshipala noshipala e li momulilo. 5 Onda li nda thikama pokati keni nOmuwa pethimbo ndyoka nonde mu lombwele shoka a ti, oshoka omwa li mwa tila omulilo noinamu londa kondundu.
“Omuwa okwa ti: 6 ‘Ongame Omuwa, Kalunga koye, nde ku tembudha muEgipiti, moka wa li omupika.
7 “ ‘Ino kala u na ookalunga yalwe koshipala shandje.
8 “ ‘Ino ihongela efano lyashaashoka megulu nenge kombanda yevi nenge momeya kohi yevi. 9 Ino inyongamena kiimenka nenge u yi galikane, oshoka ongame Omuwa, Kalunga koye, omulaadhi; otandi geele mboka ye tonde ndje nomaluvalo gawo sigo okepipi etitatu netine. 10 Ihe otandi sile ohenda omapipi gomayuvi gaamboka ye hole ndje nohaa vulika koompango dhandje.
11 “ ‘Edhina lyandje ino li tumbulila iinima yowala, oshoka ongame Omuwa, Kalunga koye, tandi geele ayehe mboka taa tumbulile edhina lyandje iinima yowala.
12 “ ‘Dhimbulukwa esiku lyEsabati ngoye u li yapule, ngaashi ngame Omuwa Kalunga koye nde shi ku lombwele. 13 Ou na omasiku gahamano moka to longo, 14 ihe esiku etiheyali olyo esiku lyevululuko lya yapulilwa ndje. Mesiku ndyoka kape na ngoka ta longo — ngoye mwene, aamwoye, aapika yoye, oongombe, uusino nenge iimuna yoye yilwe naakwiilongo ya kala moshilongo sheni. Aapika yoye oye na okuvululukwa, naanaa ngaashi ngoye mwene to ningi. 15 Dhimbulukwa kutya owa li omupika muEgipiti, moka ngame Omuwa, Kalunga koye, nde ku tembudha mo noshikaha shandje shoonkondo nokwooko kwa taganana. Omolwashoka tandi ku lombwele, u dhimbulukwe esiku lyevululuko.
16 “ ‘Simaneka ho nanyoko, ngaashika Omuwa Kalunga koye e ku lombwele, opo u kale u na elago nomwenyo omule mevi ndyoka Omuwa Kalunga koye te li ku pe.
17 “ ‘Ino dhipaga.
18 “ ‘Ino hondela.
19 “ ‘Ino yaka.
20 “ ‘Ino lundila mukweni
21 “ ‘Ino haluka omukiintu gwamukweni; ino haluka egumbo lye, aapika ye, oongombe dhe, uusino we nenge shaa shoka she.’
22 “Mbika oyo iipango Omuwa e yi mu pe amuhe, sho mwa li mwa gongala pondundu. Okwa popi newi lyendundumo e li momalaka gomulilo nomoshikogo sha zigakana nokwa gandja iipango mbika nohasha shilwe. Okwe yi nyola kiipelende iyali yomamanya e te yi pe ndje.”
Aantu ya tila
(Eks. 20:18-21)23 “Ondundu ayihe sho ya li ya yaka omulilo nomu uvu oshihomo tashi zi muuluudhe thokothoko, aawiliki yeni naakuluntu yomazimo geni oye ya kungame 24 e taa ti: ‘Omuwa Kalunga ketu okwe tu ulukile uunene we neadhimo lye, sho twe mu uvu ta popi e li momalaka gomulilo! Nena otwa mono kutya nani otashi vulika omuntu ta kala ngaa e na omwenyo, nando Kalunga okwa popya naye. 25 Omolwashike tatu hupula oomwenyo dhetu? Omulilo nguka omunene otagu tu lungunitha po. Otatu si shili, ngele tatu uvu Omuwa Kalunga ketu ta popi ishewe. 26 Oku na tuu omuntu a kalele e na omwenyo, u uvile Kalunga ta popi momalaka gomulilo? 27 Moses, shuna e to pulakene ayihe mbyoka Omuwa Kalunga ketu ta ti. Galuka ihe u ye u tu lombwele shoka e ku lombwele. Otatu ke shi pulakena nokuvulika.’
28 “Omuwa sho e shi uvu, okwa lombwele ndje a ti: ‘Ondu uvite ko shoka aantu mbaka ya ti noye li mondjila. 29 Ando ya kale aluhe osho yu uvite ngaaka! Ando ya kale aluhe taa simaneke ndje e taa vulika kiipango yandje ayihe, opo ya kale nawa nomaluvalo gawo sigo aluhe! 30 Inda u ke ya lombwele, ya shune komatsali gawo. 31 Ihe ngoye, Moses, oto kala mpaka pungame, notandi ke ku pa iipango, omautho noompango dhandje adhihe. Yi nongeka Aaisraeli, opo ya vulike kuyo mevi ndyoka tandi li ya pe!’
32 “Aaisraeli ne, kaleni ano tamu dhiginine nawa ashihe shoka Omuwa Kalunga keni e shi mu lombwele. Inamu kala tuu inaamu vulika koompango dhe adhihe. 33 Vulikeni kudho adhihe, opo mu kale nawa nomu vule okukala mevi ndyoka tamu ke li lala.”
© Oshindonga Bible © Bible Society of Namibia, 2008.
